Isuan bōrzong dān amanchū
Mt.6:9 -15
11
1 Hatuka nikhat chu Isuan mun khata asēna bōr avazonga.
Bōr azong suale azolāi ngāi bila angkhatin:
“Puma,
Johan azolāi ngāi ei manchū anga koinīm bōr azongna dān na manchū ro ba,”
ati na.
2 Hatuka amān akōm u na:
“Bōr na zong u le hintin hin ti
u chachak ro:
‘Chungvāna koini na Pa,
Na raming ānthiang lalchi om
rase.
Na ram hong tung rase.
Chunga na malung do anga,
Philām om rase.
3 Anikhuan tina koini ranga
nēk sāk na pe ro.
4 Koini ranga āsia ana thō
ngāi nei madual anga,
Koinīn nei masial ngāi um na
madual ro.
Hanūk chu ansinna tianga na
ruai nō tān,
āsia nāta na
mazōk ro,’
ti u ro,”
ati na.
5 Hanūk chu ama dēnin akōm u na:
“Nangni bila mi tu khatin mo mal dōn sela.
Hanūk chu zān chim ripa akōma asēna:
‘Mala,
ruti anthum bak na lei manpūk di ro ba.
6 Asik chu ka mal khual anzin khat ka kōm ahong atunga,
akōma apēk rang itē dōn lāi makung,’
vati sela.
7 Hatuka amalpān insūng āta:
‘Na hong manpōn lāi nō ro.
Atun han phing suakkhār ankal kēng ani zei.
Hanūk chu ka nāi ngāi um ka bila azāl phing u kēng.
Anthuia itē na hong pe thei nō ning,’
ati na amasanga.
8 Tenchu kei na ti ani u zei,
amal ei ni sika anthuia avapēk ngal nōkām nisela amān anzakna buia ei zongtit sika anthuia ei nāng tuk pei ei vapēk rang kēng.
9 Hasik han kei na ti ani u zei,
zong u ro,
na pēk unti.
Ravān u ro,
man un na ti.
Atōk u ro,
na rang u na suakkhār malong inti.
10 Asik chu azong takin ei man.
Anvān takin ei mu.
Hanūk chu antōk takin aranga suakkhār anlong pe,
ani na.
11 Nangni kāra hova pa mo,
na nāi u ngāiin ruti zong u le lung apēk rang na ni u?
Hanūk chu ngā zong ule,
ngā rathūla marūl apēk rang na ni u?
12 Hanūk chu ārti zong u le āinuvet apēk rang na ni u?
13 Hasika han,
nangni mi salui ngāi lua mana,
na nāi u ngāi chu neinun āsa apēk na thei u ten,
anvāna na Pa u vāng chu azong tak kōma ituk ātama mo Ratha Ānthiang ei na pēk u rang,”
ati na.
Isua le Beelzebul
14 Hanūk chu Isuan raluai angkhat chong thei lui ha arazūla.
Raluai arazūl suale chu hava chong thei lui ha ahong chong len theia.
Hatuka mipui ngāi chu aboi adong u na.
15 Tenchu abil u na mi senkhatin:
“Hiva mi hi raluai ngāi rēng Beelzebul sika kēng raluai ngāi ei razūl thei hile,”
ati u na.
16 Hanūk senkhatin chu ama ansinna rang anga anvān āta sinsiana azong u na.
17 Isuan ei mandon u ngāi ariata akōm u na:
“Ram tin hi ama le ama andui ten ei chiam ani na.
Hanūk chu insūngkuam ama le ama andui ten ei chiam ani na.
18 Soitān um ama le ama andui ten aram hontin mo ei anding thei rang?
Hasika han:
‘Hiva hi Beelzebul sika kēng raluai ei razūl,’
nei na ti u sika kei na ti u.
19 Koiin Beelzebul sika raluai ngāi kei razūl aniten,
nangni na nāi u ngāi le tu sika mo ei razūl u ha?
Hasik han amāni ngāi ha nangni ngāi rui aril la chang unti.
20 Tenchu koiin Pathian kut le raluai ngāi kei razūl sika,
Pathian ram chu na kōm u na ahong atung sua kēng ani zei.
21 Mi rāt khatin kut tūk adōna rāl raliang le anthuama ain arung ten,
aneinun ngāi ha azōk hiaia rung thei inti.
22 Tenchu ama nēka arāt khatin ahong suama amandōk ten,
ei anngamna rālthuam dōra apotpe zita aneinun ngāi um athek pe zit inti.
23 Tukareng ka tianga a om nōk chu anadui ani na.
Hanūk chu ka bila mankhom lui chu anānthek pe ani na.
24 Hatuka chu ratha annīm chu miring sūng āta asuakle pōng ansana mun aroka ti buina rama achei titira.
Hatuka pōngansana rang mun man mak:
‘Kei suakna ka in dēna kīr rēt ka ti,’
ati na.
25 Hatuka ahong akīr rēta hava mun ha anphiat vanga asāi vanga ahong muna.
26 Hava suale chu asēna,
ama nēka āsiat ratha annim atei sari pei ahong ruaia ahong alūtpuia.
Hatuka hava miring dingmun chu machīna nēka āsiat riam,”
ati na.
27 Hatuka Isuan hiva chong ngāi aril lāi tak han mipui bil āta nupang khat ankhēka:
“Nāi avonga nang anānzir nupang chu ravān āsa kēng.
Hanūk chu ranuti nei nēkna ranu suam um ravān āsa kēng,”
ati na.
28 Isuan amasanga:
“Hava nēka han Pathian chong ariata azī ngāi kēng ravān āsa ual,”
ati na.
Jona kōma sinsiana
Mt.12:38 -42
29 Hatuka mipui ahong pung riam le chu Isuan akōm u na:
“Atun tak huna rual athar ngāi hi āsiat u ba!
Amānīn sinsiana arok u na,
tenchu deari Jona sinsiana rong nōk chu akōm u na sinsiana anpēk nō ni.
30 Asik chu Jona ha Ninevi khopuia mi ngāi ranga sinsiana ei ni anga Miring Nāi Pasal hi atun lāi taka huna mi ngāi ranga sinsiana nīn ti.
31 Sim ram tianga rēngnu chu atun taka hiva huna rual athar mi ngāi bila rui anril tika anding intia amāni ngāi ha āsia la manlōnti.
Asik chu Solomon ei hianna rui ariat ranga ramual kōlkil ei mongna tenpei āta ahonga.
Tenchu en u ro,
Solomon nēka alian khat hiva hin ala om.
32 Ninevi khuana mi ngāi rui anrilna tika atuna hiva huna mi ngāi bila anding untia amāni ngāi ha āsia la manlōnti.
Asik chu Jona achong rila amalung amakhīr u na.
Tenchu en u ro,
Jona nēka alian khat hiva hin ala om,”
ati na.
Na taksana lēm lehan ankhīna
33 Hatuka:
“Mīn lēm abela tutēn anthupna muna siak ngāi mak.
Mun thuaiam siak ngāi mak.
Tenchu alūt ngāi ei ēl thei u na ranga ei chuangna muna kēng mīn ei siak ngāi.
34 Na mit u hi na tak pumpui u ranga lēm ani na.
Na mit adam ten na tak pumpui um ei ēl ani na.
Tenchu hava ha adam nōk ten,
na tak pumpui um azīng khap rang ani na.
35 Hasik han na sūng u na ra-āng ha ei zīng nōkna ranga anrēng ro.
36 Lēmin ei na ēla nei vār u anga na tak pumpui u hi azīng abuia vār un na ti,”
ati na.
Vān aduai aruk ngāi
37 Hatuka Isua chong aril suale Pharisi khatin bu nēk ranga ahong mathēma,
hatuka avalūta bu nēk ranga ansuta.
38 Hatuka Pharisi hān Isua chu bu nēk māna kut ei rasūk nōk amu na aboi donga.
39 Hankēng Pumān akōma:
“Nangni Pharisi ngāi khuri le khēng ngāi chu apang tiang na manthiang u na.
Tenchu na sūng u tiang chu huat anhamna le om āsia tina ābit kēng na ni u.
40 Āmo ngāi!
apang asinpu hān asūng um ei sin ni mak mo?
41 Tenchu na kōma nei dōn ngāi ha anriang ngāi ranga pe u ro.
En u ro,
hankēng na rang u na aloma anthiang zit inti.
42 Nangni Pharisi ravān abui ngāi!
Asik chu nangnīn anmarim ahui,
lēngmasēr,
anna chi tin dōra sōma angkhat nei pēk u chachak ani na.
Tenchu rui adik le Pathian ditna chu nūksīr na son u chachaka.
Tenchu hava ngāi ha māk luia hiva ngāi um nei zī kiar u ranga anāng ani na.
43 Nangni Pharisi ravān abui ngāi!
Asik chu ankhōmna ina sutmun ansāng le bazar muna mīn ei na mōk u rang ha nei zōt ual u chachak ani na.
44 Nangni Dān mīnchū le Pharisi ravān abui ngāi le phuazekām ngāi!
Asik chu nangni hi thān mun andang luia mīn achunga ei anlōina ang na ni u,”
ati na.
45 Hatuka Dān ariatpu ngāi bila mi khatin akōma:
“Mīnchūpu,
hiva ngāi nei tina hin koini ngāi um mualphui nei na sak kēng hile,”
ati na.
46 Hatuka amān amasanga:
“Nangni Dān ariatpu ravān abui ngāi!
Asik chu puak arik antakpa ngāi ha mi chunga nei manpēl u.
Tenchu nangnīn hava puak ha na kut chal mērte le ngal athottet rang ti u mak che na.
47 Nangni ravān abui ngāi!
Asik chu nangnīn na chipui u ngāiin ei that u deari ngāi thān chunga lung nei phun u chachak.
48 Hasika han na chipui u ngāiin om ei thō u ngāi ha nei poma nei riatpui u na ani na.
Asik chu amānīn athat u na nangnīn athān u ngāi na manliang u na.
49 Hava sika han Pathian hiannān hintin hin ati na:
‘Akōm u na deari ngāi le kuitīr ngāi tīr ka tia,
asen chu lei that untia,
asen chu lei sinsak unti,’
ati na.
50 Hava sika han maniapūr anpiang len āta deari ngāi dōra thisen asuak phuba chu hiva huna mi ngāi tak chunga lāk ka ti ati na.
51 Hava ha Abel athisen suak len āta Zakaria thisen asuak ten peia phuba ha hiva huna mi ngāi tak chunga ei lāk rang ani na.
Zakaria vāng chu māichām le mun ānthiang kongkāra ei that u ani na.
52 Nangni Dān ariatpu ravān abui ngāi!
Asik chu hianna anlongna ranga chabi ha na rotpui u na.
Nangni len um lūt u mak chena hanūk chu alūt rang anuam ngāi um na khār u na,”
ati na.
53 Hatuka amāni kōma hava chong ngāi aril suale Dān mīnchū ngāi le Pharisi ngāiin chunga achān atak asi sabak u na,
chong ril ngāi ha arakel rerēt u na.
54 Asik chu achong ril amasial vinga asūr ranga ei pūt chian u ani na.