Pilat matona Isua aruai u
23
1 Hatuka chu mipui anchun ngāi dōra alom u na anthuia,
Isua chu Pilat kōma aruai u na.
2 Hintin hin achunga chong āsia avamantung u na:
“Amān koini na nam ngāi hi aselna tianga ei ruaia.
Kaisar akōma siachōi apēk rang um ei khār,
hanūk chu Krista ati na rēng khat ka ni,
ati nām na riat,”
ati u na.
3 Hasika han Pilatin Isua kōma:
“Nang hi Jihudi ngāi rēng mo na ni?”
ati na arakela.
Isuan amasanga:
“Nang len kēng ati na ni,”
ati na.
4 Hankēng Pilatin chāizūng ngāi le mipui vāntāng ngāi kōma:
“Hiva miring tak chunga ei siatna itē mu makung hile,”
ati na.
5 Tenchu amānīn ther khakhaka ati riam u na:
“Hiva mi hīn Galili ram len āta aphuta,
hiva mun tenpeia ahonga Judia ram pumpuia mun tina mi ei manchūna lehin mi dōra ei malum sabak kēng ani zei,”
ati u na.
Herod matona Isua aruai u
6 Pilatin hava chong ariata,
ama hi Galili rama mi ei ni le ei ni nōk arakela.
7 Hatuka chu ama ha Herod ei vong rama mi ani ti ariat le chu Herod akōma amathuan rēta.
Asik chu hava lāi han Herod um Jerusalema a om ani na.
8 Hatuka Herod hān Isua alei muna achān arāi alei sāna.
Asik chu aphā mān āta ama ruia thang ātampa alei riat sika amu rang ei phām sabak ani na.
Hanūk chu ama kōm āta tichang abui sinsiana khat ei thō amu ranga aderdīn ani na.
9 Hatuka amān chong ātampa ankelna adōna,
hanum nisela Isuan itē masang pial mak.
10 Hava han chāizūng alian ngāi le dān mīnchū ngāi anding u na amānīn ankhēk chunga āsia amanlō u na.
11 Hatuka Herod le asipai ngāiin mualphui asaka,
mani ēro athō u na.
Hatuka kultāi asapa khat amansil u na Pilat akōm dēn atīr rēt u na.
12 Hava mān ha chu Herod le Pilat hi anngoi u lui ani na,
tenchu hava nikhua nāta amāni chu mal anchang ani u zei.
Isua ei that u
rang chong amasat.
13 Hatuka Pilatin chāizūng alian ngāi le ruiril aliana ruaitu ngāi dōra le anam u na ulian ngāi dōra mipui vāntāng apāia mun khata aman chuna.
14 Amān akōm u na:
“Hiva mi hi na nam u ngāi selna tianga aruai nei ti u sika ka kōma nei hong ruai u ani na.
Tenchu rangāi u ro,
na makung u na achālaka ka radēka,
hiva miring tak chunga āsia nei hong manlō u na chong ngāia hin itē ei siatna angkhatte ngal mu makung hile.
15 Herod um nisela ei mu nōk sika koini kōma ei hong tīr rēt ani na.
Hiva mi hīn thīna rang khopa āsia ei thō itē om mak.
16 Hasika han,
sinsak ka tinga,
mazōk rēt ka ti,”
ati na.
17 Zōkna pānta hun kipa mi salui ankhum khat hi amāni ranga ei mazōk pe ngēt chachak ranga chong ha amāni kōma arila.
18 Hanum nisela amāni chu mun khata ankhēk u na:
“Hiva miring hi pei ro!
Barabba ha
na mazōk pe ro!”
ati u na.
19 Barabba ha kho tina anbuaipu le mi that sika lung ina ankhum ani na.
20 Tenchu Pilatin Isua anzōk rang ei zōt sika akōm u na hava chong dēn ha aril rēta.
21 Tenchu ankhēk riam u na:
“Ama chu krosa tār ro!
Krosa tār ro!”
ati
u na.
22 Pilatin voi anthum changna akōm u na:
“Ichanga mo?
Hiva mi hīn hong mo āsia ei thō?
Koi chu thīna rang khopa itē masial ei thō mu makung,
hasika han ka zēm suale mazōk ka ti,”
ati na.
23 Tenchu amāni ha anringa ankhēk riam u na ama chu krosa atār khakhak ranga atitit u na.
Hantin han amāni le chāizūng alian ngāi hē anring riama.
24 Hatuka Pilatin amāni ei zong u ang taka ei thōthei u na ranga ruirilna amasāta.
25 Hatuka anbuaina le mi that sika lung ina ankhuma om ei zong u chu amāni ranga ama zōk pe na.
Tenchu Isua chu amāni ei zōt u ang taka akut u na abetōka.
Isua Krosa antār
26 Hatuka Isua aruai u lāi han,
Kurini khuana mi khat araming Simon,
khua nāta ahong ha achunga kros āsiak u na Isua anūk azīna anput ranga ama chu asūr u na.
27 Mipui ātampān anūk azī u na,
hanūk abil u na nupang ātampām anchela.
Hava ngāi ha ama sika arōp arachuma,
achap sabak u na.
28 Isuan amāni tiang anhoia:
“Jerusalem nupang ngāi,
koi ka sika chap u nō ro.
Tenchu nangni le na nāi u ngāi ranga chap u ro.
29 Asik chu en u ro:
‘Avonsūnga nāi vong lui le arōp suama ranuti pe lui,
nupang aching ngāi chu ravān asa kēng,’
nei ti u na rang nikhua ahong asuak rang ani zei.’
30 Hava hun tika chu:
‘Mual alian ngāi kōma:
“Koini na chunga na hong del
ta ro.”’
Hanūk chu,
mual āsīnte ngāi
kōma:
“Koini na hong khum ta ro,”
(Hos.10:8 )
ti ūnti,’
ati na.
31 Thing aring tak chung ngala mīn hintin hin athō u ten thing achār sua vānga chu ituk mo ei thō u rang ani na,”
ati na.
32 Hatuka chu abila anni āsia thō ngāi athī rang dēn aruai u na.
33 Hatuka araming “Lu ru mun” ei ti u han avasuak ule hava han krosa atār u na.
Abila āsia thō ngāi achang tiang
khat avoi tiang khat atār u na.
34 Hatuka Isuan:
“Ka Pa,
amāni ngāi madual ro,
asik chu imo ei thō u amānīn ei riat u nōk kēng,”
ati na.
Hava suale chu apuan ngāi chu ravān enna athōna ansem u.
35 Mipui ngāi andinga a en u na,
amāni bila khuana ulian ngāiin:
“Mi tei ngāi chu amān ama zōk theia,
tenchu ama hi Pathianin ei athang Krista aniten,
aninga anzōk ta rase ba,”
ati na mani ēro athō u na.
36 Hatuka sipai ngāiin um ahong u na mani ēro athō u na akōma athūr anchel zu annēk rang ahong pēk u na.
37 Hatuka amānīn:
“Jihudi ngāi rēng na ni ten,
na ninga anzōk ta ro ba,”
ati u na.
38 Hatuka alu chung tianga hiva lekhapēk atār u na:
“HIVA MI HI JIHUDI NGĀI RĀNG,”
ati na lekha anziak ani na.
Hava ha Grik,
Latin,
Hebrai chonga anziak ani na.
39 Āsia thō anni krosa ei mathōi u ngāi bila angkhatin Isua ēlsēl athōna:
“Nang hi Krista ha nani ngēt ten,
na ninga anzōk tānla,
koinīm na mazōk ta ro ba,”
ati na.
40 Tenchu atei angkhatin chu han tina ei masang sika angōna arakōka:
“Nang hi Pathian ngal achi mak che mo?
Nang um han tin dēn kēng nei tong hale.
41 Koini chu ansinsakna aman rua ngal kēng na ni.
Koini chu nei man rang anga nei man ani zei.
Tenchu hiva mi hīn chu itē ei siatna abui kēng,”
ati na.
42 Hava suale Isua kōma:
“Puma,
rui aril ranga na rama na hong tika na riattit ro,”
ati na.
43 Isuan amasanga:
“Chong tataka kei na ril ani zei,
avian koi ka bila paradisa vatungin na ti,”
ati na.
Isua athī
44 Hatuka chu sūn dār sōmleianni len āta khului dār anthum tenpei ramual pumpui ahong azīng khupa.
45 Anīn ēl lāi mak,
hanūk chu biak ina mun ānthianga puan anzār ha alāi
taka anthēta bong anni achanga.
46 Hatuka Isua anringpana ankhēka:
“Ka Pa,
nang na kuta ka ratha ka na pēk,”
(Sām 31:5 )
ati na.
Hava chong aril suale arang achāta.
47 Sipai raza aruaipūn hava ngāi aloma amu na Pathian amanpāka:
“Chong taktaka hiva mi hi mi dik tak kēng hile,”
ati na.
48 Hatuka hava om ngāi a en ranga mipui ahong dōrān hava ngāi amu u na amalung arachum tira akīr u.
49 Tenchu amēl riat ngāi dōra le Galili ram āta ahong anūk azī nupang ngāi chu rālkhat āta athīra anding chian u na.
Isua thāna anphūm
50 Hatuka chu en ro,
araming Joseph ati na mi khat a om a,
ama ha ruiril aliana mi khat,
mi sa le mi dik ani na.
51 Ama hi Jihudi ngāi khua Arimathāia mi ani na.
Hanūk chu ama hi hava ngāi mandon le malung anrualpui zet lui mi ani na.
Pathian ram alei angāk chian ani na.
52 Ama hi Pilat kōma asēna Isua aruak avazonga.
53 Hatuka aruak chu avamasuma,
puan annēm le athuama,
lung ankhuar thān khura avasiaka.
Hava han tutē lān siak ngāi lui ani na.
54 Hava nikhua ha pōngansa nikhua ranga ansinna nikhua ani na.
Hatuka chu pōngansa nikhuam anphut rang ani zeia.
55 Hatuka Galili ram āta ahong nupang ngāiin anūk azī
tir u na thān chu avamu u na,
hanūk chu aruak um hontin mo ei siak u ati na avaen u na.
56 Hatuka akīr u na,
marim ahui le ansin sariak hanūk chu ankhua zāt marim ahui avasin u na.
Dān anga pōngansa nikhuana pōng ansa u na.