Isuan anthēmna achul
4
1 Hatuka chu Isua Ratha Ānthiang abita Jordan dung āta ahong akīra,
Rathān philchār rama aruai lena.
2 Hava han sūn sōm manli diabol anthēmnana achula.
Hava lāi han itē ei sāk om mak.
Tenchu nikhua ahek riam le chu avon ahong anchāma.
3 Hankēng diabolin akōma:
“Nang chu Pathian Nāi Pasal nei ni sika hiva lung hi ruti ei chang theina ranga chong pe ro ba,”
ati na.
4 Isuan akōma:
“Miringin ruti duai le dam ngāi mak,
tenchu Pathian bāia chong asuak le adam ani ti anziak kēng,”
(Dān. 8:3 )
ati na amasanga.
5 Hankēng diabolin mual ansāngpa khata avakalpuia,
mit khaprip kāra maniapūra ram pumpui aman muna.
6 Hatuka diabolin akōma:
“Hiva ngāi dōra chunga ningneina le anlianna ngāi aloma na pēk ka ti.
Asik chu ka kōma anbetōk sua kēng ani zei.
Hanūk chu kei zōt tak kōma kei pēk rang kēng.
7 Hasika han anbok laka nana mōk ten aloma na ta chang zit inti,”
ati pe na.
8 Hasika han Isuan akōma:
“Soitān,
ka kōm āta ankhāi ta ro!
Asik chu
‘Puma na Pathian rong kēng
nei mōka ama dorbo nei
dom rang,’
(Dān.6:13 )
ti anziak kēng” ati na amasanga.
9 Hatuka diabolin Jerusalema aruaia Pathian biak in chungsīpa avamandinga.
Hatuka akōma:
“Nang chu Pathian Nāi Pasal nei ni sika hivan āta thuaia antōm ro.
10 Asik chu:
‘Amān avānpalāi ngāi
anasan ranga chong
pēk intia,
11 Na ke ngāi lunga ei vade
nōkna ranga akut ule
na lei madōm unti,’
(Sām 91:11,12 )
ti anziak kēng,”
ati pe na.
12 Isuan akōma:
“Puma na Pathian chu mansin nō ro,
(Dān.6:16 )
ti anziak kēng,”
ati na amasanga.
13 Hatuka diabolin anthēmna tin le amathēm suale ahun ahong asuak rēt rang māseng akōm āta amāk tota asēna.
Nazaret khuana
Isua mīn amaniang
14 Hatuka chu Isua Ratha Ānthiang sin thōtheina lehan Galili rama ahong akīr rēta,
aram pumpuia han ama rui
chu anthanga.
15 Hatuka chu Jihudi ngāi anchunna in tina avamanchūna mi dōrān ama chu aman pāk u na.
16 Hatuka chu ei lian ei seina Nazaret khuana ahong asuaka.
Hatuka pōngansa nikhuana ei thō babang anga Jihudi ngāi anchunna ina avalūta Pathian lekhabu anpore ranga andinga.
17 Hatuka deari Isaia lekhabu apēk u na,
lekhabūnzual ha aphonga hiva chong anziakna hi a muna:
18 “Puma Ratha chu ka
chunga ahong a om zei,
Asik chu anriang ngāi
kōma thang ahui antung
ranga amān ei na hong aruat ka ni na.
Malung āsiat ngāi andam
rang le
Ankhit ngāi kōm zōkna
thang aril ranga.
Achō ngāi kōma mit vārna
apēk rēt rang le
ansinsaka om ngāi
anzōkna apēk ranga.
19 Hanūk chu Puma arāisānna
kum apuang ranga ahong
antīr ka ni na,”
ati na.
20 Hatuka lekhabu ha azuala hasōndompu kuta apēk suale ansuta.
Hanūk chu Jihudi ngāi anchunna ina mi dōra mit chu ama tiang rong ama hoi chian u na.
21 Hatuka amāni kōma:
“Avian hin hiva Pathian lekhabūna chong nei rangāi u hi ei hong kipna ani zei,”
ati na.
22 Hatuka akōm u na ama chong ei rila,
amūr āta chong athum asuak ngāi sika han amalung atōna ariat u na:
“Hiva mi hi Joseph anāi pasal ha ni mak mo?”
ati u na.
23 Hatuka amān akōm u na:
“Nangnīn hiva ankhīna chong hi nei na ril ngēt u rang nīnti:
‘Daktor,
na thetheia andam ta ro.
Kapernauma nei thō le nei sin ngāi koinīn na lei riat ngāi ha hiva na khuanām thō ta ro,’
nei ti u rang,”
ati na.
24 Hanūk chu amān ati rēta:
“Taktaka kei na ril ani u zei,
deari chu akhuana anpom ngāi mak.
25 Hanūk chu nangni ngāi hi taktaka kei na ti ani u zei,
Elija ahun lāi han kum anthum thāruk anvān ankhār rapa ram pumpuia māitām alianpa achula.
Hava lāia Israel ngāi kāra arōng ātampa a oma.
26 Hanum nisela Elija chu tutē kōma asē ranga antīr mak.
Tenchu Sidon rama Zarephat khuana arōng khat kōma kēng asē ranga ei antīr ani na.
27 Hanūk chu deari Elisha hun lāi han Israel ngāi kāra aphār ātampa a oma.
Tenchu amāni kāra tutē angkhat ngal adam om u mak,
Suria rama Nāman rong nōk chu,”
ati na.
28 Hatuka chu Jihudi ngāi anchunna ina mi a om dōra hava chong ariat u na achālaka atak asi sabak u na.
29 Anthui u na ama chu khopui āta atuar chiana amasuak u na.
Hatuka chu rōl rahana ansul ranga akhua u ei omna mual sīpansāng ten pei aruai u na.
30 Tenchu ama ha mipui malāi tak āta arēla arotpāta asēna.
Isuan rathasia arazūl
Mk.1:21 -28
31 Hava suale ama ha Galili rama khua angkhat Kapernaum khuana asēna.
Hatuka Pōngansa nikhuana mipui ngāi kōm amanchūna.
32 Ami manchūna ha mipui ngāi achālaka aboi adong u na.
Asik chu ami manchūna ngāi ha ning anei sabaka chong ei ril ani na.
33 Hatuka Jihudi ngāi anchunna ina han ratha sian ei sūr mi khat a oma.
Hava nāi ha hē anringpana ankhēka:
34 “O!
Nazaret Isua,
koini ranga hong mo nei na thō rang?
Koini ana pei ranga ahong mo na ni?
Nang tu mo na ni ti ka na riat.
Nang chu Pathian Mi Ānthiang khat na ni,”
ati na.
35 Hankēng Isuan akōma angōna:
“Dāi rek ta ro,
hava miring sūng āta hong suak ro,”
ati na.
Hankēng hava ratha sian alāi u taka adēng raka,
adūk na luia asuaka asēna.
36 Hatuka mipui ngāi alom u na aboi adong u na,
amāni le amāni ankel u na:
“Hiva ang anchūna hi hong mo tāk!
Ningneina le thōtheina adōna rathasia ngāi kōm chong apēka suak ro ati le ei suak u hi!”
ati u na.
37 Hatuka hava rama mun tina araming chu anthanga anthek zei.
Isuan mi tampa amandam
38 Hatuka Isua chu anthuia Jihudi ngāi anchunna in āta Simon ina avalūta.
Hava lāi tak han Simon ātarpi ha anrik sabaka ana ani na.
Hasik han ama ranga amathēm pe u na.
39 Hankēng ama ha akōla avāndinga rāitun angō pe na.
Hankēng rāitunin amathān lena.
Hatuka ama chu anthui lena amāni ranga haso adom pe na.
40 Hava suale ani alūt rang tiang natna tinrenga rikhua tong ngāi ha aloma ama kōma ahong ruai u na.
Hankēng amān achung u chipa akut āsiaka amandam vanga.
41 Hanūk rēt chu mi tampa asūng āta ratha sia ngāi um asuak u na.
Hatuka chu ankhēk u na:
“Nang Krista,
Pathian Nāi Pasal kēng na ni,”
ati u na.
Tenchu amān hava ngāi ha angōna,
asik chu ama ha Krista ani ti ei riat u sika achong ranga phal mak.
42 Hava suale khua ahong avār le ama chu asuaka mibuina muna asēna.
Hanūk chu mi dōrān ama ha arok u na,
hatuka akōm ahong u na amāni amāka mun ateia asē ranga akhāp u na.
43 Tenchu amān akōm u na:
“Khua tei ngāi ām Pathian ram thang ahui hi avaril ka nāng.
Asik chu hava ngāi anthin rang piala hong antīr ka ni na,”
ati na.
44 Hava suale amān Galili rama Jihudi ngāi anchunna in tina chong avarila.