Isuan Sōmleianni ngāi atīr
9
1 Hatuka chu Isuan zolāi Sōmleianni ngāi chu mun khata akuia.
Raluai ngāi dōra chunga thōtheina ranak le ningneina hanūk chu rikhua-rāikhuatin andam ranga ningneina apēka.
2 Hava suale Pathian ram rui le ana ngāi avāndam ranga atīra.
3 Hatuka akōm u na:
“Khual anzinna ranga,
rāimol mo,
marsa mo,
bu mo,
sum mo,
kultāi rabo mo itē chōi u nō ro.
4 Hatuka nangni ana lei antung u in tak pei han om chian u ro,
hava khua na māk u māseng chu.
5 Hatuka mīn ana mantung ngal u nōk ten amāni tak chunga anriatna apēk anga hava khua na māk ule na ke philvut athinga māk u ro,”
ati na.
6 Hava suale chu asuak u na khua tina thang ahui avaril u na.
Hatuka muntina asē u na mi ngāi avamandam
u na.
7 Hatuka lal Herod hān hava ngāi thang dōra alei riata atina chang re mak.
Asik chu mi senkhatin:
“Johan kēng athi nāta ahong anthui rēt ni zei ni,”
ati u na.
8 Mi senkhatin:
“Elija kēng ahong anlang rēt ni zei ni,”
ati u na.
Hanūk senkhatin:
“Tian lāia deari ngāi bila angkhat ahong anthui rēt kēng ani zei,”
ati u na.
9 Hatuka Herodān:
“Johan chu alu ka mantan sua zei hale!
Hanle,
atuna hiva athang kei riat rēt hi le tu mo?”
ati na andona.
Hatuka ama antongpuina hēr aravāna.
Isuan mi asāng rangā avāi
10 Hatuka akuitīr ngāi ahong akīr rēt u na ei varil ei vathō u ngāi dōra akōma ahong ril kiar u na.
Hatuka amāni rang ha abingtena mi buina ual muna aruaia Betsaida khua ei ti u han asēpui vāta.
11 Hanum nisela mipui ngāiin ariat u na anūk azī u na.
Hatuka amān hava ngāi ha alei phāma Pathian ram rui alei manchūna.
Hanūk chu andam anāng ngāi kōma alei mandama.
12 Hatuka nikhua ahong abui rang tiang dām han Sōmleianni ngāi akōm ahong u na:
“Anāi uala khua le bung a om ngāia ei variak thei u na rang le hanūk chu nēk le sāk ei man thei u na ranga mipui ngāi hi mansēta ro ba.
Asik chu hiva nei omna mun hi mibuina mun kēng,”
ati u na.
13 Amān akōm u na:
“Nangni ngāiin hongte mo anēk asāk ranga pe u ro,”
ati na.
Hatuka amānīn:
“Hiva dōra mipui ngāi ranga hin nēk sāk na varachōk nōk ten koinīn ruti rangā le ngā anni bak rong nōk chu atei itē dōn mak me hile,”
ati u na.
14 Asik chu pasal chian ngal asāng rangā dām ani u na.
Tenchu azolāi ngāi kōma:
“Mipui ngāi sōmrangā sōmrangā senga antānga mansut u ro,”
ati na.
15 Azolāi ngāiin havantin anga athō u na aloma amansut kiar u na.
16 Hatuka ruti rangā le ngā anni ha alāka chungvān tiang atanga rāisān chong aril chunga aphela.
Hatuka mipui ngāi matona āsem ranga azolāi ngāi kōma apēka.
17 Hatuka alom u na anēk asāk u na akhop kiar u na.
Hanūk chu ei nēk maniang u adi anōi ngāi ha azolāi ngāiin amankhōm u na kok sōmleianni ala bita.
Peterin Isua rui apuang
18 Ni khat chu Isua athei daka bōr avazong lāi han,
azolāi ngāi um abila a om u na.
Hankēng akōm u na:
“Mipuiin koi hi tu mo ei na ti u?”
ati na arakela.
19 Hatuka amānīn:
“Mi senkhatin:
‘Baptispu Johan’ ana ti u.
Hanūk senkhatin:
‘Elija’ ana ti u.
Senkhatin:
‘Tian lāia deari bila tu mo khat ahong anthui rēt kēng ani zei,’
ana ti u,”
ati na amasanga.
20 Amān:
“Hanle nangnīn koi hi tu mo nei na ti u?”
ati na arakela.
Peterin:
“Nang chu Pathian Krista kēng na ni,”
ati na amasanga.
21 Hatuka hava ngāi rui ha mi kōma ril u nō ro ati na akhāra.
22 Amāni kōma:
“Miring Nāi Pasal hi antakna tam ei la tiar ngēt rang ala ni na.
Pātar ngāi,
chāizūng ngāi le Dān mīnchū ngāiin ei la peia ei la that u rang ala ni na.
Ama chu ei thi ngēt rang ani na,
tenchu nīnthum nikhuana ahong anthui rēt rang kēng,”
ati na arila.
23 Hatuka ama dēnin alom u na ranga:
“Tukareng ka nūk ana honga zī zōt tak chu aninga anngilphat rase.
Anikhuana akros anputa na hong zī rase.
24 Tukareng ei damna anzōk zōt tak chu machān inti.
Tenchu tukareng koi ka sika ei damna anchān tak chu mazōk inti.
25 Mīn maniapūr pumpui ngal hi ata manchang zit sela,
tenchu aninga anpeia ei damna amachān anten aranga imo ei nemna?
26 Mīn koi le ka chong sika anān zakpui tak chu koi um anzakpui ka ti.
Hatuka Miring Nāi Pasal,
ama ei lianna le,
Pa ei lianna le avānpalāi ānthiang ngāi ei lianna lehan ahong tika hava nāi ha chu anzakpui ka ti.
27 Chong tataka kei na ril ani u zei,
hiva muna anding ngāi bila mi senkhat chu Pathian ram amu u māseng thīna tem luia om rang a om,”
ati na.
Isua amēl anteina mual
28 Hatuka hiva chong ngāi aril suana ni riat ansuale Isuan Peter,
Johan,
Jakob ngāi ha aruaia bōr azong ranga muala avakalpuia.
29 Hatuka bōr azong lāi han amēl ahong anthūla,
apuan rasil ngāi ha avār raheia aēl zuaka om a.
30 Hatuka pasal annīn achongpuia anlanga,
hava ngāi ha Mosi le Elija ani u na.
31 Anlian sabaka anlianga anlang u na,
hanūk chu hava mun ei māk rang rui le hava ha Jerusalem khopui āta ei sua rang ruia Isua achongpui u na.
32 Tenchu Peter le alōm ngāi chu amit akhuna anvuang sabak u na.
Nukhōna ahong ahar u le ei lianna le akōla mi anni anding ngāi chu amu u na.
33 Hatuka hava mi anni ngāi hān Isua anthānpui u rang tiang Peterin Isua kōma:
“Anānchupu,
hiva hin koini chu om ila chu āsa rang ba!
Asik chu chubuk in anthum sin intia,
nang na rang angkhat,
Mosi rang angkhat,
Elija rang angkhat,”
ati na.
Tenchu Peterin achong ril rang ngāi ha anriat lui ani na.
34 Hatuka chong ala ril lāi tak han ansūm ahong anlanga amāni ahong mankhuna.
Ansūma alūt u lāi han arathāta u na.
35 Hatuka ansūm āta hē khat ahong anthanga:
“Hiva hi ka Nāi Pasal,
koiin kei thang mi ha ani,
ama hē hi rangāi u ro,”
ati na.
36 Hatuka hava hē ha ahong anthang suale chu Isua rong athei daka anlanga amu u na.
Azolāi ngāi chu chong kuluia adāi reka a om u na.
Hava lāia ei mu u ngāi ha tū tē kōma ril u mak.
Raluai ei sūr pasal sanāite
khat Isuan amandam
37 Hatuka chu hanūk zīng khuavār rēta mual āta ahong achum u le mipui ātampān antongpui ranga alei maruang u na.
38 Mipui bil āta mi khat anringpana ankhēka:
“Mīnchūpu,
ka nāi pasal ana honga en pe ranga ka na mathēm,
asik chu ama rong hi ka nāi pasal nei,
ati na.
39 Raluain asūr le anringpana ankhēka ei dēng rak le annōka acher huan ei suak chachak ani na.
Havan tin han asinsak babang lehan ei māk zām chachak ani na.
40 Na zolāi ngāi kōma na razūl pe u ro ati na kei mathēm u,
tenchu na razūl pe thei u mak,”
ati na.
41 Hatuka Isuan amāni rang:
“O nangni iamna bui ngāi le ei phua bui ngāi!
Ituk ten mo na bil u na kei la om a hanūk chu ituk ten mo kei na la diar u rang?
Na nāi pasal ha hiva hin hong ruai ro,”
ati na.
42 Nāi pangte ahong ruai u lāi tak han raluain phila adēng raka achālaka annōka.
Tenchu Isuan raluai rang ha angōna nāipangte ha amandama,
apa kōm dēna apēk rēta.
43 Hatuka mi dōrān Pathian ei lianna zia amu u na aboi adong sabak u na.
Isuan ei thō ngāi dōra sika aboi amandong u na,
azolāi ngāi kōma ati na:
44 “Chong kei na ril u rang ngāi hi na kuar sung sadim u ro.
Miring Nāi Pasal hi monisi ngāi kuta anrapa anbetōk rang ani zei,”
ati na.
45 Tenchu achong ril ngāi ha hong zāt ei ti na mo ha amānīn riat u mak.
Asik chu ei riat thei u nōkna ranga hava ha anthuptit ani na.
Hanūk chu hava ngāi rui ha ankel ranga ngam u mak.
Tu mo alian khīt?
46 Hatuka azolāi ngāi bila han tu mo alian khīt rang ati na amāni le amāni ankhalna adōn u na.
47 Hankēng Isuan amalunga ei mandon u ariata,
nāipangte
khat akeia akōla amandinga.
48 Hatuka akōm u na:
“Tukareng ka raminga hiva nāipangte aphām tak chu koi ana phām kēng,
hatuka koi ana phām tak chu koi ana honga tīr aphām kēng.
Asik chu nangni ngāi bila asīn khīt hi alian khīt chang inti,”
ati na.
49 Hankēng Johanin:
“Anānchūpu,
mi khatin na raminga ratha sia ei razūl na mu le chu koinīn nei khār ani na.
Asik chu ama ha koini na nūk ana zī bila mi ni mak,”
ati na.
50 Isuan:
“Khār u nō ro.
Nangni anadui u nōk mi chu na tiang u na akop kēng,”
ati na.
Samari khua khata mi ngāiin Isua alei phām nōkna rui
51 Hatuka chungvāna ei kalna rang hun ahong anāi le chu Jerusalem khopui tianga asē ranga anhoitita.
52 Hankēng amatona mi chu alei tīra ama ranga hongte mo ansūk pe u na ranga.
Hatuka Samari ngāi khua angkhata avalūt u na.
53 Tenchu ama ha Jerusalem avalūt rang ei ni sika havana mi ngāiin lei phām u mak.
54 Hava ha azolāi ngāi bila Johan le Jakob hān amu u na:
“Puma,
hiva mi ngāi ei kāng zit u na ranga anvān āta moi hong chul sela,
na zōt mo?
Asik chu Elija hām hantin han athō hale,”
ati u na.
55 Tenchu Isua amāni tiang anhoia:
“Hong zāt ratha dōn miring mo na ni u hava ha anre u lāi mak che ati na angōna.
56 Asik chu Miring Nāi Pasal hi miring damna apei ranga ahong ni makung,
tenchu damna apēk ranga ahong kēng ka ni,”
ati na.
Hatuka khua ateia asē u na.
Isua nūk azī ei lu zia
Mt.8:19 -22
57 Hatuka lampuia kal achōi u lāi han mi khatin akōma ahonga:
“Puma,
nang nei sē na taka kei na hong zī rang,”
ati na.
58 Isuan akōma:
“Siāl ngāiin khur adōna,
chunga vā ngāiin rabu adōna,
tenchu Miring Nāi Pasal alu siakna rang mun dōn mak,”
ati na.
59 Mi atei khat kōma:
“Ka nūk na hong zī ro,”
ati na.
Tenchu amān Puma:
“Ka pa rong hi aphūm ranga na mansēbak ro,”
ati na.
60 Isuan akōma:
“Āthī ngāiin āthī chu phūm u rase.
Tenchu nang pei Pathian ram ruia tang vahāi ro,”
ati na.
61 Hanūk chu mi atei khat rēt um:
“Puma,
na nūk na hong zī ka ti.
Tenchu ka insūng mi ngāi le rong anthānpui bak rong,”
ati na.
62 Tenchu Isuan akōma:
“Tukareng phāi arīt lāi taka lānggol akuta asūra nūk anhoi chu Pathian ram alua thei rua ni mak,”
ati na.