Sipai raza aruaipu iamna rui
Mt.8:5 -13
7
1 Hatuka chu mipui ngāi kōma aril rang dōr aril
suale Kapernaum khuana avalūta.
2 Hava han sipai raza ruaipu khat asuak dam lui āthi ranga a oma.
Ama ha aruaitupān achān ei madit ani na.
3 Hatuka sipai raza ruaipu hān Isua rui ei riat phingle asuak ahong andam ranga Jihudi pātar bila mi senkhat amathēma atīra.
4 Hatuka chu Isua kōma avasuak ule apūttita amathēm u na:
“Ama ranga hiva sin nei thō pe rang hi ama chu aman rua kēng.
5 Asik chu amān koini nam ngāi hi lungkham ana muna.
Hanūk chu nei ankhōmna in ngāi hi amān ei na mansin pe kēng,”
ati u na.
6 Hava sika han Isua chu amāni bila asē lena.
Hanūk chu in avasuak u rang vit le sipai raza ruaipu hān hiva chong hi alei varil ranga ami ngāi atīra:
“Puma,
hong pōng lele lāi nō ro.
Hanūk chu ka ina anān tung rua mi ngal ni makung.
7 Hava sik han na kōma hong rua ngal ni makung.
Tenchu na chong na manchōi duai ro,
ka suak chu hong dam bō ni.
8 Asik chu koi len um mi khat thunuaia om ka ni na,
ka sipai ngāi um ka thunuaia om ani u na.
Hava ngāi ha angkhat pei kōma:
‘Sē ro,’
ka ti ten asēna.
Hanūk chu angkhat kōm rēta:
‘Hong ro,’
ka ti ten ahonga.
Ka suak um:
‘Hiva hi thō ro,’
ka ti ten athō chachak,”
ati na.
9 Isuan hiva chong ariata amalung atōna,
hatuka anūk azī mipui ngāi tiang anhoia,
kei na ril ani u zei:
“Israel ngāi bila hiva dōr iamna lian adōn hi la mu ngāi makung,”
ati na.
10 Hatuka mi ei tīr ngāi ina ahong akīr u na asuak ana chu adama ei hong mu u ani na.
Isuan arōng pasal sanāite
khat athī nāta amathui
11 Hatuka chu hava sua phing Isua chu khua angkhat Nain ei ti u han asēna.
Ama bila azolāi ātampa le mipui ngāiin azī u na.
12 Hatuka chu khopui suakkhār avasuak vit u le enta,
mi ngāiin āthi khat ahong razōn u na.
Hava mi ha anūn ei nei salep nāi pasal khat dak ani na.
Hava nupang ha arōng ani rēta.
Akhuana mi ātampa ama bila a om ani u na.
13 Hankēng Pumān arōngnu chu amuna achālaka amalung apōnga akōma:
“Chap lāi nō ro,”
avati na.
14 Hankēng akōla asēna atolāi avatōna anzōn ngāi chu anding len u na.
Hatuka amān:
“Ruatharte,
anthui ro kei na ti,”
ati na.
15 Hatuka chu athī chu anthuia ei chong len ani na.
Hankēng Isuan anu kōma amanlōn rēta.
16 Hatuka mi dōra arathāta na Pathian amanpāk u na:
“Koini na bila deari alianpa khat kēng ahong anthui ani zei hile!
Pathianin ami ngāi hi ei na hong en kēng ani zei,”
ati u na.
17 Hatuka chu hava rui ha anthanga Judia ram dōra le aravēla ram tina antheka.
18 Hankēng Johan azolāi ngāiin akōma hava rui ngāi dōra aril u na.
19 Hankēng Johanin azolāi anni ngāi akuia Isua kōma aman sēna:
“Ahong rangpu alei anril ha nang mo na ni zei?
Ole mi tei khat mo na lei ngāk rang?”
ati na avamankela.
Isua le Baptispu Johan
Mt.11:2 -19
20 Hatuka chu Johanin mi ei tīr ngāi ha Isua kōma ahong u na:
“Baptispu Johanin:
‘Ahong rangpu ei ti u ha mo na ni zei?
Ni mak mi tei khat mo na lei ngāk rang?’
ati na ankel ranga na kōma amān ei na hong tīr na ni,”
avati u na.
21 Hava lāi tak han Isuan ana ngāi,
rikhua dōn ngāi le raluain ei sūr ngāi mi tampa amandama.
Hanūk chu mit achō ngāi ātampa amit amanvār pena.
22 Hava sika Isuan Johan azolāi ngāi kōma amasanga:
“Kīr u tānla nei mu u le nei riat u ngāi dōra Johan akōma hintin hin vaman thei u ro.
Mit achō ngāi amit avār zei.
Ake khor ngāi kal achōi u zei,
aphār ngāi anthiang u zei.
Hanūk chu kuar asēt ngāi akuar avār u zei,
āthi ngāi anthui rēt u zei.
Hanūk chu anriang ngāi kōma thang ahui anril zei ati na varil u ro.
23 Hanūk chu tukareng ka chunga malung dō nōkna nei lui chu ravān āsa kēng,”
ati na amasanga.
24 Hatuka chu Johan amitīr ngāi akīr sua ule Isuan mipui ngāi kōma Johan arui arila:
“Hong zāt a en rang mo philchār rama nei sē u chachak?
Thinthīn ei sēm māiluang a en rang mo nei sē u?
25 Ani nōk ten hong zāt a en rang mo nei sē u?
Ole puan annāl ansil mi khat a en rang mo nei sē u?
Tenchu ni mak,
asik chu havan tina puan anthangpa ngāi ansil le ahui ahēka a om ngāi chu rēng ina kēng ei om u.
26 Hanle hong mo a en ranga nei sē u,
na ril u ta?
Deari khat a en mo?
Ani lele,
kei na ti ani u zei,
deari nēka alian khat kēng nei vamu u.
27 Pathian lekhabunā hintin hin ama ruia anziaka:
‘Enta,
na matona ka palāi chu
ka tīr zei.
Amān na matona na lampui
chu asin ranga na tīr pe
ka ti,’
(Mal.3:1 )
ati na.
28 Kei na ti ani u zei,
nu vonsūng anzir ngāi kāra hin Johan anēka deari ālian tutē om lāi mak.
Hanum nisela,
Pathian rama mi sīn khīt ngal ama ranga chu alian khīt ei la ni rang,”
ati na.
29 Hanūk chu aloma mipui dōra le siachōi ansuang ngāi um Pathian chu ādik ani ati na apom kiar u na.
Asik chu hava ngāi ha Johan akōma baptisma lāk ani u na.
30 Tenchu Pharisi ngāi le Dān mīnchūpu ngāi ha Johan akōma baptisma lāk ni u mak,
hasik han amāni ranga Pathianin ei mansūk ha pom zōt u mak.
31 Hatuka Pumān:
“Atun tak hua khūk athar ngāi hi hong le mo kei mankhī u rang?
Hong le mo kei manrual u rang?
32 Hiva ngāi hi nāipang bazār muna ansuta amāni le amāni anpāi u anga:
‘Nangni ranga theilia na tuma,
tenchu lām u mak chena.
Ningbuina la nei thō,
tenchu
chap u mak chena,’
ati ngāi
ang ani u na.
33 Asik chu Baptispu Johan ahonga bu sāk nēk mak,
hanūk chu zu ne mak.
Hasika nangnīn:
‘Raluain ei sūrpu,’
na ti u na.
34 Koi Miring Nāi Pasal chu ka honga ka hong nēka,
ka hong sāka.
Hasika han nangnīn:
‘En u ta,
ānruakpa,
zu nēkpa,
siachōi ansuang ngāi le mi salui ngāi mal so,’
nei na ti u.
35 Hanum nisela hianna nāi ngāiin ei rasua dōra ādik ani ti apom rua ani,”
ati na.
Āsia thō nupang khatin
Isua sariak amanthi
36 Hanūk chu Pharisi ngāi bila mi khatin ama bila bu nēk ranga Isua amathēma.
Hatuka Pharisi ina avalūta bu nēk ranga ansuta.
37 Hanūk chu hava khopui han nupang khat hi om āsia thō a oma.
Amān Pharisi ngāi ina Isua bu nēk rang asē ti ei riat le longvār bodola sariak marim ahui achōia asēna.
38 Hatuka chu Isua anūk tiang andinga ake thuaia achapa,
amit rathi lehan ake ngāi aman chōp zita,
asam lehan ahui pena.
Hanūk chu ake atum pena sariak marim ahui lehan akhua pena.
39 Hatuka chu bu nēk ranga akuipu Pharisi hān hava ha amuna amalung sūnga hintin hin amandona:
“Hiva mi hi deari tak aniten ama ahonga atōnpu nupang hi hong zāt āsia thō mo ei ni rang ti hi ei riat thei rang kēng ba!”
ati na.
Sum antāng mi anni ngāi rui
40 Hanūk chu Isuan Pharisi Simon rang amasanga:
“Simon,
na kōm alakte chong aril rang ka dōn,”
ati na.
Hatuka amān:
“O Anānchūpu,
ril ro ba,”
ati na.
41 Hatuka Isuan:
“Sum āneipa khatin mi anni kōma hin sum amantānga,
angkhatin denari razarangā,
hanūk angkhatin denari sōmrangā antāng u na.
42 Sum antāng ei thuanna rang itē ei dōn u nōk sika aninīn amadual rita.
Atun chu amāni anni bila tu mo amān ādit ual ni tāk?
Na man thei ta,”
ati na.
43 Simonin amasanga:
“Kei mandon anga antāng ātam uala andualna achangpu chu ādit ual chak ni,”
ati na.
Isuan:
“Rui nei ril ha ādik sabak kēng,”
ati na.
44 Hatuka chu nupang tiang anhoia Simon kōma:
“Hiva nupang hi na mu mo?
Na ina ka honga,
ka ke rasūkna rang tī na pe mak chena.
Ama chu amit rathi le ka ke amanchōpa asam le ei na hui pe.
45 Nang chu ka biang ngal tum mak chena,
tenchu hiva nupang chu ka hong alūt lena ka ke ei tum hi la mong mak.
46 Nang chu ka lu sariak khua mak chena,
tenchu amān chu sariak marim ahui le ka ke ei na khua pe.
47 Hava sika han,
kei na ti ani zei,
āsia ei thō ātampa dōra ka madual pe sua zei.
Asik chu amān ei na ditna hi ātam ani na.
Tenchu ātōmtena andualna achangpu chu atōmte dēn kēng anditna ei dōn rang,”
ati na.
48 Hankēng Isuan nupang kōma:
“Āsia nei thō ngāi dōra ka na madual pe zei,”
ati na.
49 Hatuka ama bila bu nēk ranga ansut ngāi amalung u chipa:
“Āsia thō ngal andual thei hiva mi hi tu mo?”
ati u na.
50 Hatuka Isuan nupang kōma:
“Nei iamna lehan na zōk zei.
Phūkdāi taka sē ro,”
ati na.