Samari nupang
Isuan achongpui
4
1 Hatuka Johan anēka Isuan zolāi ātam aman changa baptisma ei pēk rui ha,
Pharisi ngāiin ariat u zei ti,
Pumān alei riata.
2 Tenchu Isua ama lenin baptisma ei pēk om mak,
azolāi ngāi kēng baptisma apēk u chachak.
3 Hatuka Judia ram amāk suana Galili rama akīr rēta.
4 Hatuka Samari ram apala ankān ngēt ei nāng ani na.
5 Hava han Samari rama khua angkhat araming Sukar ei ti u han asēna,
hava ha Jakobin anāi pasal Joseph akōma mun ei pēkna kōl ani na.
6 Hava han Jakob atīkhur um a om a.
Hanūk chu Isua kal achōia ei pōng sika tīkhur kōla ansut raka om a.
Hava lāi tak ha sūnchimrip
ani na.
7 Hava han Samari nupang khat tī luak ranga ahonga,
Isuan akōma:
“Tī nēk rang na pē ro ba,”
ati na.
8 Asik chu azolāi ngāi ha sāk anchōk ranga khopuia asē ani u na.
9 Hankēng Samari nupang hān akōma:
“Nang Jihudi pasal,
hatuka koi Samari nupang,
hontin mo ka kōma tī nēk ranga nei na zong?”
ati na.
Asik chu Jihudi ngāi le Samari mi ngāi hi itē anzomna dōn u mak.
10 Isuan amasanga:
“Pathian neinun pēk le tī nēk ranga na pēk ro ati na na kōma ana zongpu hi riat tānla chu nang kēng akōma azong rang ni na ti ba.
Hatuka amān hava damna tī ha na pēk inti ba,”
ati na.
11 Hatuka nupang hān akōma:
“Ka pu,
tī luakna itē dōn mak che na,
hatuka tīkhur um ānthūkpa ani na,
hanle hovan āta mo hava damna tī ha nei man?
12 Koini na pu Jakob nēka ulian mo na ni?
Amān hiva tīkhur hi koini ei na pēka,
ama apum len le anāi ngāi dōra le ama ta sake manli ei dōn dōrām ei nēk u chachak,”
ati na.
13 Isuan akōma:
“Tukareng hiva tī ānēk tak chu atī anrāl rēt inti.
14 Tenchu tukareng tī ānēk ranga kei pēk tak chu tāituana atī anrāl lāi nō ni,
tenchu akōma tī kei pēk ha asūng āta tāituan damna ranga tī nār hong luang inti,”
ati na.
15 Hatuka nupang hān akōma:
“Ka pu,
hano ten hava tī ha na pe ro ba,
ka tī ei anrāl lāi nōkna ranga hanūk chu hi tenpei ala tī luak kei hong lāi nōkna ranga,”
ati na.
16 Isuan akōma:
“Na ruathar vakui tānla hivan hong kīr rēt ro,”
ati na.
17 Nupangin amasanga:
“Ruathar dōn makung,”
ati na.
Isuan akōma:
“ ‘Ruathar dōn makung,’
nei ti ha ādik.
18 Asik chu ruathar rangā pei na dōn sua zei,
atuna nei dōn hi na ruathar
ni mak.
Hava nei ti ha ādik ani,”
ati na.
19 Nupangin akōma:
“Ka pu,
deari khat kēng nei ni rang ti hi ka na riat zei.
20 Koini na pu ngāiin hiva muala Pathian abiak u chachaka,
tenchu nangnīn,
mīn Pathian ei biakna rang mun chu Jerusalem khopuia kēng ei ni rang nei ti u,”
ati na.
21 Isuan akōma:
“O Nupang,
ka chong hi iam ro,
Pa nei biak u na rang hun chu ahong asuak rang ani zei.
Hiva mual ronga ni mak,
Jerusalem khopui rongām ni mak.
22 Nangnīn nei riat u nōk ha nei biak u,
koini chu nei riatpu hi kēng nei biak chachak.
Asik chu Jihudi nāta kēng sandamna chu ei hong rang.
23 Tenchu hun ahong asuak rang ani zei,
atun len ahong asuak kēng ani zei.
Hava hun tika taktaka ābiak ngāiin Pa chu Ratha le chongtaka biak unti.
Asik chu Pain hava anga ābiak ngāi kēng ei ravān.
24 Pathian chu Ratha ani na,
ama ābiak ngāiin ratha le chongtak ngēta kēng ei biak u rang,”
ati na.
25 Nupang hān akōma:
“Krista antipu Mesia,
ha ahong rang ani zei ti ka riat.
Ama chu ahong tika aloma na hong manriat kiar inti,”
ati na.
26 Isuan akōma:
“Nang ana chongpui koi hi ama ka ni zei,”
ati na.
Zolāi ngāi Isua lehan anlop rēt
27 Hatuka hava lāi tak han azolāi ngāi ahong akīr u na,
nupang le alei chong chu aboi amandong u na.
Hanum nisela tutēn:
“Hong zāt mo nei zong?
Ichanga mo ama le nei chong?”
ati na ankel ngam om u mak.
28 Hatuka nupang chu Tikola amāka khua tiang asēna mi ngāi kōma avarila:
29 “Hong u ta,
ka sinthō dōra alom peia ana riat pe zit mi khat na hong enpui u ta,
ama so Krista anti ha ni nō ni mo?”
ati na.
30 Hatuka khua nāta asuak u na ama kōma ahong u na.
31 Hava hun kāra han azolāi ngāiin akōma:
“Rabbi,
hong ne ta ro ba,”
ati u na.
32 Tenchu Isuan akōm u na:
“Nangnīn nei riat u nōk ruti asāk rang ka dōn,”
ati na.
33 Hasika han azolāi ngāi amāni le amāni ankel u na:
“Ama ei sāk ranga hongte mo ahong achōi pe kukui mo om?”
ati u na.
34 Isuan akōm u na:
“Anatīrpu ei zōt sin āthō le asin āzui hi kēng koi ka ranga ruti.
35 Nangnīn bu ātna rang ahun tha manli ala om ti u mak che mo?
En u ro,
kei na ril ani u zei,
tang u tānla lui tiang en u ta,
atun lena bu āt ranga amin kēng ani zei.
36 Bu ātpu chu alō amana,
aman tāituan damna ranga ei mantīng kēng.
Asik chu a-ātpa le ātūpa anruala arāisān theina ranga.
37 Asik chu:
‘Angkhatin ātu,
hanūk angkhat a āt ani,’
ti hiva chongkam hi hiva taka hin ei dikna ani na.
38 Na sin thō u nōkna muna sāng āt ranga kei na tīr u.
Mi tei ei pōngna muna nangnīn mara akham ranga nei vānchel u kēng,”
ati na.
Samari rama mi
tamtakin Isua aiam
39 Asik chu nupangin:
“Ka sin thō dōra alom peia ana ril pe zit,”
ati na chong ei ril sika Samari rama mi tampān Isua chu aiam u na.
40 Hasika han Samari mi ngāiin Isua kōma ahong u na,
amāni bila a om ranga amathēm u na.
Hasika han ama chu hava han nīnni a om a.
41 Hanūk chu atei mi ātampān Isua chong ngēta a iam u na.
42 Hatuka amāni ngāi hān nupang kōma:
“Atun chu nangin nei na ril sika a iam ni lāi mak me,
koini ngētin achong nei rangāia nei riat ani zei.
Ama hi taktataka maniapūr Sandampu,
Krista kēng ani zei,”
ati u na.
Malal nāi pasal
Isuan amandam
43 Hatuka chu nīnni suale hava mun āta asuaka Galili rama asēna.
44 Isua ama ngētin arila,
‘Deari chu ama ei omna khuana lalchi man ngāi mak,’
ti chong hi ei ril ani na.
45 Hasika han Galili rama ahong asuak le Galili mi ngāiin alei phām u na.
Asik chu Jerusalem khopuia pānta a om lāi asin thō ngāi ei mu zit u ani na.
Asik chu amānīm pāntana asē ani u na.
46 Hatuka chu Galili rama Kana khuana tī gerepzu ei man changna muna Isua ahong atung rēta.
Hatuka Kapernaum khuana malal insūngkuana ulian khat,
anāi pasal dam lui a om a.
47 Isua Judia ram āta Galili rama ahong ti ei riat phing le akōm asēna anāi pasal āndam ranga ahong rang avamathēma.
Asik chu hava nāi pasalte ha āthi rang totō ani zeia.
48 Hatuka Isuan akōma:
“Sinsiana ngāi le tichang abui sin ngāi na mu u nōk ten iam thak u nō ta ni,”
ati na.
49 Hatuka malalpa hān akōma:
“Ka pu!
ka nāi pasalte athi mān son na hong pe di ro ba,”
ati na amathēma.
50 Isuan akōma:
“Sē pei ta ro,
na nāi pasal adam zei,”
ati na.
Hatuka Isuan akōma ei ti ha a iama ei sē ani na.
51 Hatuka lampuia asē susūng han asuak ngāi hān alei vāntong pui u na:
“Na nāi pasalte alei dam zei!”
ati u na.
52 Hatuka chu ama hān akōm u na ei damna ahun le amāpha arakela.
Amāni hān:
“Mizān sūn dār khat han arāitunin ei mathān ani zei,”
ati u na.
53 Havan tin han Isuan akōma:
“Na nāi pasal adam zei,”
ati lāi taka hun tak ha ani zei ti apān ariata.
Hatuka ama le ainsūngkua mi alom u na a iam u na.
54 Judia ram āta Galili rama ahong suana hiva hi Isuan sinsiana ei thō voi annina ani na.