Nikodem Isuan amanchū
3
1 Hatuka chu Pharisi ngāi bila mi khat araming chu Nikodem a om a.
Ama hi Jihudi ngāi ruaitu khat ani na.
2 Ama ha zāna Isua kōma ahonga:
“Rabbi,
Pathian kōm āta āhong mīnchūpu nei ni koinīn na riat,
Pathian achunga a om nōk ten hiva sinsiana nei thō ngāi hi tutēn thōthei nō ni,”
ati na.
3 Hatuka Isuan akōma:
“Taktaka kei na ril ani zei,
tukareng anzir thar nōk ten,
Pathian ram mu thei nō ni,”
ati na amasanga.
4 Nikodem hān akōma:
“Mi atar suale hontin mo ei anzir rēt thei rang?
Anu vonsūnga voi anni ei lūta mo ei anzir rēt rang?”
ati na.
5 Isuan amasanga:
“Taktaka kei na ril ani zei,
tukareng tī le Rathāna anzir nōk ten,
Pathian rama lūt thei nō ni.
6 Taksāna anzir chu taksa,
Rathāna anzir chu ratha ani na.
7 Anzir thar rēt u ro,
kei na ti hi na chang man dong nō ro.
8 Thīnthi hi ei zōtna tiang taka kēng ei sēm,
arasa chu na riat,
tenchu hovan āta āhong mo,
hon tiang mo ei sē rang chu riat thei mak che.
Tukareng Rathāna anzir chu hantin dēn han ei om rang ani,”
ati na.
9 Nikodem hān amasanga:
“Hava ha hontin mo ei ni thei rang?”
ati na.
10 Isuan akōma:
“Nang hi Israel ngāi mīnchūpu na ni na,
hanum hiva ngāi hi nei la riat
nōk mo?”
ati na amasanga.
11 “Taktaka kei na ril ani u zei,
koinīn nei riat hi nei ril,
nei mu hi nei riatpui chachak ani na,
hanum nisela koinīn nei riatpuina chu pom u mak che na.
12 Ramual rui ka na ril u lua mana na iam u mak che na,
vānram rui vāng chu ril inlāng hontin mo iam thei u na ti?
13 Anvān āta ahong achum mi rong nōk chu tutē anvāna akal la om ngāi mak,
hava ha koi Miring Nāi Pasal,
anvāna a om ha ka ni zei.
14 Hatuka chu Mosīn philchār rama marūl ei tār anga koi Miring Nāi Pasal hi antāra kei la om ngēt rang ala ni na.
15 Tukareng ana iam tak chu pei anchang nō ni,
tenchu tāituan damna man inti.
16 Hintin hin Pathianin maniapūr ādita,
a Nāi Pasal nei salep ei hong pēk,
tukareng Nāi Pasal a iam tak chu pei anchang nō ni,
tenchu tāituan damna kēng ei man ani zei.
17 Maniapūr rui āril ranga Pathianin a Nāi Pasal maniapūra ei hong tīr ni mak,
tenchu maniapūrin ama zāra damna ei man theina ranga ei hong tīr kēng.
18 Tukareng ama a iam tak chu Pathianin āsia manlō nō ni,
tenchu ama a iam nōk tak kēng atun āta kēng āsia ei manlō sua ani zei.
Pathian Nāi Pasal nei salep raminga ei iam nōk sika.
19 Āsia anlōna chu hiva hi ani:
‘Ra-āng maniapūra ahonga,
tenchu mīn ra-āng nēka āzīng ādit u na,
asin thō u ngāi dōra āsia ei ni sika.
20 Tukareng āsia āthō tak chu ra-āng anmumāk kēng,
ra-āng tiang um hong mak.
Havan tin han ni nō sela chu āsia ei thō ngāi dōra ei anlang pe rang ani na.
21 Tenchu chongtak āthō dōra chu ra-āng tianga ahong u na,
asik chu asin thō ngāi Pathian āta āsuak kēng ti ei anlang theina ranga,’ ”
ati na.
Isua rui ariatpui
Baptispu Johan
22 Hava suale Isua azolāi ngāi lehan Judia rama asē u na.
Sova son amāni ngāi bila avaom a baptisma apēka.
23 Johan um Salim khua kōla Ainona baptisma ei pēk chachak ani na.
Asik chu hava han tī tam sabak a om ani na.
Hatuka mi ngāi asē u na Johanin baptisma alei pēka.
24 Asik chu hava lāi han Johan chu ankhumna ina ānkhum la ni mak.
25 Hatuka chu Johan azolāi ngāi le Jihudi senkhat ānthiangna dān ruia ankhalna adōn u na.
26 Hava suale Johan akōm ahong u na:
“Rabbi,
enta,
Jordan dung varāla na bila om,
aruia nei na manriatpu hān,
sova son mi baptisma apēka mi dōra ama kōma asē zit zei,”
ati u na.
27 Johanin amasanga:
“Anvān āta Pathian pēk ani nōk ten,
miringin itē ei man om mak.
28 Koi chu Krista ni makunga,
amatona ranga Pathianin ei na tīr kēng ka ni ati na,
kei na ril u na riat u zei hale.
Nangni len hi anariatpui na ni u.
29 Muinu āruaipu chu mākpa ani na.
Mākpa alōm hān andingpuia achong alei anngāipu chu ama rōl ei riat sika achān arāi asāna.
Havan tin dēn han arōl kei riat sika ka rāisānna chu ei tung.
30 Ama chu ei ansōn riam rang anāng,
koi chu annuai riam rang ka ni.
31 Chung tiang āta āhong chu alom pei chunga chung annung tak kēng.
Maniapūr āta āhong chu maniapūr mi ani na,
maniapūr rui dēn kēng ei ril.
Anvān āta āhong chu alom pei chunga chung annung ani na.
32 Amān ei mu le ei riat ngāi dōra ei riatpui ani na,
tenchu amān ei riatpuina tutēn āpompui om mak.
33 Ama ei riatpuina āpom tak chu Pathian chu ādik ani,
ti ei riatpui kēng.
34 Pathianin ei hong tīr chu Pathian chong kēng ei ril.
Pathianin ama Ratha hi amāi chaka ei pēk ni mak.
35 Pain Nāi Pasal ādita,
ama kuta alom peia apēk zita.
36 Tukareng Nāi Pasal a iam tak chu tāituan damna aman zei,
tenchu tukareng Nāi Pasal achong a iam nōk tak chu damna reng mu nō ni.
Tenchu achunga Pathian taksitna kēng ei om ani zei,”
ati na.