Isua anvāna akal
1
1 O Theophila,
na kōma simrachi mānsa kei na maziak ngāi ha Isua asin thō le ei manchū dōra aphut len āta arui ngāi dōra ani na.
2 Anvān tianga ei kalna hun ahong asuak māsenga asin thō ngāi rui ha,
Ratha Ānthiang zāra ei athang akuitīr ngāi kōma chong apēk suana rui ngāi kēng kei ril ani na.
3 Antakna atiar suale amāni ngāi kōma aninga anlanga.
Ariat theina andangna ātampa lehan amāni kōma adama anlanga.
Ni sōm manli amāni kōma anlanga Pathian ram rui chu ala ril tira.
4 Hatuka chu amāni bila avān khōma han:
“Jerusalem khopui chu māk u nō ro,”
ati na chong apēka.
“Tenchu Pa chongtin ngēt,
koi ka kōma nei riat u ha ngāk u ro.
5 Asik chu Johanin tīna baptisma ei na pēk u ani na,
koi chu Ratha Ānthianga baptisma na pe u ka ting.
Hiva hi nikhua nāite suale hong suak inti,”
ati na.
6 Hasika han amāni chu anchun u lehan akōma arakel u na:
“Puma,
atun hin mo Israel kōma ram nei manding rēt rang ani zei?”
ati u na.
7 Amān akōm u na:
“Pān ahun le anikhua chu ama aning neina le ei zēk kēng,
nangni ngāi riat ranga anphal ni mak.
8 Tenchu Ratha Ānthiang na chung u na ahong le ranak man un na ti.
Hatuka Jerusalem khopui,
Judia ram le Samari ram pumpuia le ramual kōl kil ei hek ten pei ka chong ariatpu chang un na ti,”
ati na.
9 Amān hiva chong ngāi aril suale a en susūng u na anvāna akala,
amāni mit varāla ansūmin ahong khuma.
10 Ama akal lāi han chungvān tiang a en chian u na,
hatuka enta,
pasal anni puan ngui ansila akōla anding u na.
11 Amānīn:
“O Galili rama mi ngāi,
ichang mo chungvān tiang atanga nei anding chian u?
Hiva Isua ngēt hi na kōm u nāta anvāna Pathianin ei lāk ha la hong kīr rēt inti.
Anvāna akala nei mu u anga
hin ama chu la hong rēt inti,”
ati u na.
Juda rathūla
Matthia anthang rui
12 Hava suale chu Maruan mual ei ti u nāta Jerusalem khopuia akīr u na.
Hava mual ha Jerusalem khopui kōl tak,
Jihudi pōngansa nikhua kal lam khat bak ani na.
13 Hatuka insūnga avalūt u le tadan mun ansānga akal u na.
Hava han Peter,
Jakob,
Johan le Andria,
Philip,
Thoma,
Bartholomoi,
Mathāi,
Alphai nāi pasal Jakob le Simon,
mīn Zelot ei ti le Jakob anāi pasal Juda a om u na.
14 Hiva ngāi hi alom u na malung mun khat achōia bōr azong chunga angēn chiana a om u na.
Amāni bila nupang senkhat le Isua anu Mari le Isua aparual ngāi um a omsa
u na.
15 Hava lāi han Peter chu zolāi ngāi bil āta andinga chong arila,
hava han alom u na razakhat sōm anni dām ani u na.
16 “Unāi ngāi le loko ngāi,
Pathian Lekhana chong anga ei kip theina ranga Ratha Ānthiangin David amūr amanga apha mān āta Juda arui chu alei ril zēt ani na.
Hiva Juda hi Isua asūr u ranga lampui anmuna aruaipu ani na.
17 Asik chu ama ha koini ngāi bila mi khat ani na,
hasika hiva dorbōndomna bila chang āi adōn ani na.”
18 Hiva mīn dik luina man lehan mun khat arachōka,
hava muna han akhup tiang achula avon apuaka arīl dōra asuak zita.
19 Hasika han Jerusalem khopuia a om ngāi dōrān hava ha ariat u na,
amāni chonga hava mun raming ha ‘Akeldama,’
ati u na.
Hava ti na chu ‘Thisen Mun,’
ti na ani na.
20 Sām Lekhabūna hintin hin anziaka:
“ ‘Ama ei omna mun chu rong
rase.
Asūngam tutēn lua nō rase,
Asinthōna mun chu mi teīn
lua rase,’
(Sām 69:25, 109:8 )
ati na.
21 Hasika han koini na kāra mi khat anthang anāng zei.
Hava mi chu Isuan koini na bila a om babang lāia alūt le asuak babang mi ni rase.
22 Hanūk chu Johan abaptisma len āta Isua anvāna ei kal ten peia koini na bibila om le Isua athi nāta anthui rēt anariatpui ngāi bila mi anthang rase,”
ati u na.
23 Hatuka amānīn mi anni athang u na angkhat chu Joseph Barsabba ei ti u ha ani na,
araming atei rēt chu Justa ani na.
Hanūk angkhat rēt chu Matthia ani na.
24 Hatuka bōr azong u na:
“Puma,
nang chu mi malung dōra ariat na ni na,
Juda adorbo le akuitīr sutmun alua ranga hiva mi anni ngāi bila tu mo nei athang zōt,
na man mu ro.