Chibai thōna
1
1 Koi Paul,
Isua Krista suak le kuitīr achang ranga ānkui,
Pathian thang ahui aril ranga ānthianga ānkhāi ka ni na.
2 Hava thang ahui ha Pathianin tian lāi āta alekhabu ānthianga deari ngāi mūr amanga achongtin ani na.
3 Hava thang ahui ha a Nāi Pasal,
koini na Puma Isua Krista rui ani na.
Miring taksa tiang āta chu David akhūk āta ahong ānzir ani na.
4 Tenchu ānthiang theina Ratha tiang āta chu āthi nāta Pathianin ei mathui rētna zāra Pathian Nāi Pasal ei ni zia chu anlian taka ei hong manriat ani na.
5 Ama zāra le ama araming sika hin koinīn hiva lungkhamna le kuitīr sin hi nei chang ani na.
Nam tin kāra iamna lama hē āntel ranga nei chang ani na.
6 Nangnīm hava nam ngāi bila Isua Kristān ei na kui a bila ānchel na ni u.
7 Rom khuana Pathianin ei madit ngāi dōra le mīnthiang ani ranga ānkui ngāi dōra kōma:
Koni na Pa Pathian le Puma Isua Krista nāta lungkhamna le phūkdāina chu na kōm u na om rase.
Rom khua avamū rang
Paulin achān aphām
8 Mānsana chu Isua Krista sika na lom u ranga ka Pathian kōma rāisān chong ka mantunga.
Asik chu maniapūr pumpuia nangni nei iam u na rui chu ānthang kēng ani zei.
9 Asik chu ka bōrzongna tina na raming u ngāi mong luia kei chin chachak ani na.
Hava ha anāi pasal thang ahui sika ka malung tataka adorbo kei dom Pathian len a
om ka bōrzong anariatpui.
10 Nukhōna lua chu Pathian zōt anga nangni kōma hongna lampui ei anlong theina ranga bōr kei zong chian ani na.
11 Asik chu nangni ngāi adettita nei om thei u na ranga ratha lam neinun kong khat lua chu kei nān sempui thei u na ranga ana mu rang kei zōt ani na.
12 Hava kei ti na omzia chu,
koi le nangni ngāi loko anruala nei iamna lehan anhar anlōm u rei ti na ani na.
13 Unāi ngāi,
Jentail ngāi kōma mara kei man anga nangni kōmām mara aman ranga voi ituk mo ahong ranga kei val chachak ti hi ana riat u ranga kei na zōt u.
Tenchu atun tena hin ana khār ala omtita.
14 Grik le Grik nōk ngāi kōma,
mi hian le mi hian nōk ngāi kōma anrual chianga akōm u na antāng ka ni.
15 Hava sik tak han nangni Rom khuana mi ngāi kōmām kei thei dōr thang ahui chu aril ranga achālaka kei zōt sabak ani na.
16 Krista Thang ahui chu ka ranga anzakpui makunga.
Asik chu tukareng hava ha aiam tak pei sandamna ranga Pathian sin thōtheina ani na.
Mānsa chu Jihudi ngāi ranga ani na,
nūka Jentail ngāi rangām ani na.
17 Hava Thang ahui hān iamna amansōn riama,
iamna hān Pathian dikna chu amanlanga.
Asik chu:
“Mi ādik chu iamna lehan dam inti,”
(Hab.2:4 )
ati na anziak anga.
Miring ngāi chunga
Pathian taksitna
18 Pathian abiak nōk le ādik nōk ngāi dōra chunga anvān āta Pathian taksitna chu ahong anlang zei.
Asik chu amānīn chongtak chu ādik nōk lehan kēng ei dui u ani na.
19 Asik chu Pathian rui ei riat thei u rang lampui chu amāni kōma Pathianin anthiang vanga ei hong manlang ani na.
20 Asik chu mita mu thei lui tāituana asin thōtheina lehan a Pathian ni zia chu leilung ansin len āta akut suak ngāi dōrān anthiang vanga ei hong manlang kēng ani zei.
Hasika han nōntāk apēk rua reng dōn u lāi mak.
21 Amānīn Pathian ariat u nam nisela Pathian anga manpāk u mak,
akōma rāisān chong um ril u mak.
Tenchu aman don u chu akoronga le a malung a chu ei zīng pe u ani na.
22 Amānīn ahian ei anti u tenchu āmo kēng ei anlō ani u zei.
23 Hanūk chu thi thei lui Pathian lianna chu āthī thei miring ngāi,
vā ngāi,
rannung ngāi le marūl ramīl ngāi lehan ei thūl u ani na.
24 Hava sik han ataksa u chu anzakpui rua sabaka anmangpui ranga amalung u ning ōl anga antīr rua om annim athō Pathianin ei betōk kēng ani zei.
25 Asik chu Pathian chongtak chu milaka ei manchang u ani na.
Ama asinpu nēka amān ei sin ngāi ha ei biaka adorbo ei dom u.
Tenchu āsinpu chu tāituana anpāka om rua kēng.
Amen.
26 Hava ngāi sika han Pathianin anzakpui rua hurna tianga anmang ranga ei betōk rak ani na.
Nupang u ngāiin anupang om dānpa ngāia zoro anlāk amāka alet tianga kēng ei anmang u ani zei.
27 Havan tin dēn han pasal ngāi um nisela nupang le om dānpana zoro anlāk amāka ahun re lui khopa hurna tianga ei anmang u ani na.
Pasal le pasal anōk tianga om ei anthō u.
Havan tin han om āsia ei thō u na mara chu ataksa u chung chipa ei man u ani na.
28 Hanūk chu amānīn Pathian ruia riatna malung reng dōn zōt u mak.
Hasik han Pathianin āsia thō nōk rua ngāi athō ranga malung āsia tianga ei betōk
ani zei.
29 Havan tin han ādik nōk dōra,
hurna,
om āsa nōk,
huat anhamna,
mandon āsia,
khāmaret,
mi that,
ansualna,
anhuangna,
malung salui,
chong porchonok lehan abita ei om u.
30 Mi siat aril le Pathian siat aril,
lalchi dōnna bui,
malung anphu,
chongpāk ansal,
āsia lama rui athar ansuak ngāi,
nupa hē tel lui ngāi ani u na.
31 Malung vārna bui,
achongtin sūr thei lui,
miring lungkhamna dōn lui,
anngoina zōt lui le lungkham mūna dōn lui ngāi ani u na.
32 Havan tina om athō ngāi chu Pathian aruiril anga athi rua ani u ti ānriat u nām nisela havan tin han om ei la thō bang u ani na.
Hava rong ha la ni rēt mak,
mi teiin ei thō u ngāi um ei mahampui u chachak ani na.