Pathian ruirilna diktak
2
1 Hasik han,
o nang miring,
mi chunga rui aril chachakpu,
nōntāk apēkrua dōn mak che.
Asik chu mi chunga rui nei ril anga na chungām āsia anlō kēng na ni zei.
Asik chu nang rui arilpu hān han tin han om nei thō sika ani na.
2 Asik chu havan tin anga om athō ngāi chunga Pathianin chongtak le kēng rui ei ril ti hi nei riat ani na.
3 O nang miring,
tukareng mi chunga rui arilpu,
nang um amāni ang dēna om athō kēng na ni.
Pathian ruirilna nāta nang um azōk ranga nān iam mo?
4 Hanūk chu ama alungkhamna,
adūk diarna le aphūk anchualna ngāi ha poisak luia nei om mo?
Asik chu Pathian lungkhamna chu malung ansīrna tianga kēng ei ruai ti hi riat mak che mo?
5 Tenchu atuna malung ankhirtita ansīr luia nei la om sika Pathian taksitna nikhua tika ranga takasi kēng na ranga na lei mantīng u ani zei.
Hava nikhua tika Pathian aruirilna dik chu amān hong manlang inti.
6 Asik chu,
“Pathianin mi tin asin thō ang chipa ei lō chu hong pēk intia.”
(Sām 62:12 )
7 Hantin han dūk adiar chunga sin āsa āthō ngāi,
le anlianna,
anpākna,
chuai ngāi lui aval ngāi kōma Pathianin tāituan damna chu pēk inti.
8 Tenchu mi senkhat chu amāni rang duaia aval a om a.
Chongtak chu zī luia ādik nōk kēng ei zī u chachak.
Amāni ngāi chunga Pathian taksitna le lungsitna chu hong tung inti.
9 Miring tin āsa nōk athō ngāi dōra tak chunga antakna le anbuaina chu hong tung inti.
Mānsana Jihudi ngāi chunga hava suale Grik ngāi chunga hong tung inti.
10 Tenchu om āsa thō ngāi dōra chunga anlianna,
anpākna le phūkdāina chu hong om inti.
Mānsana Jihudi ngāi chunga hava suale Grik ngāi chunga hong om inti.
11 Asik chu Pathianin ami mandang dōn mak.
12 Asik chu tukareng dān dōn luia āsia thō chu dān dōn lui dēna anpei inti.
Hanūk chu tukareng dān adōn chunga āsia thō chu dān a om anga achunga rui anril inti.
13 Asik chu dānbu anngāi duaia hin Pathian mit mūna ādik anlō thei ngāi mak.
Tenchu dān ang taka azīna om āthō ngāi kēng ādik ei anlō thei u.
14 Asik chu dān dōn lui nam atei ngāiin dānpa ngāi adōn anga a om u ten,
dān adōn ngal u nōkām nisela dānpa ngāi adōn anga aninga ei ansin u ani na.
15 Asik chu hava mi ngāiin dānin athō rua anga om chu amalung u na anziakrapa a om kēng ti ha ei manlang u ani na.
Hava ha amāni kōma om siat le sa riatnān ei riatpui ani na.
Ama le ama anduina adōn chachaka,
āsia ei manlōna hun a om a,
asa ei manlōna hun a om a.
16 Hiva ngāi dōra hi Pathianin ka thang ahui kei ril anga miring kōma ānthup dōra chu Isua Krista zāra ha ruiril nikhua tika chu aloma la hong manlang zit inti.
Jihudi le Dān rui
17 Tenchu en ro,
nang na ninga Jihudi ka ni nei anti na dānbu chunga anngama,
Pathian kōma borāi nei thō.
18 Ama ei zōt dān um na riata,
dān ruia anchūna dik nei man sika asa
chu nei ānriat sabak ani na.
20 Dānbuna hianna le chongtak omzia ngāi āriat nei phua sika āmo ngāi chu nei manchū le nāipang ngāi ānchūpu ati na chu nei ānriat ani na.
21 Tenchu havan tin han nang mi nei manchūna nang ichanga mo naning lena nei anchū nōk?
“Marusa thō nō ro,”
ati na mi kōma chong nei ril.
Tenchu marusa mo na thō chachak ha?
22 Hanūk chu “Uire nō ro,”
ati na mi kōma chong nei ril.
Tenchu uiare mo na thō ha?
Ramīl ābiak nei matīr ani na,
tenchu ramīl anmōkna biak ina neinun āndar mo marusa na thō ha?
23 Nang dān chunga borāi nei thō,
dān hē nei khēl sika Pathian lalchi thō luia mo nei om chachak?
24 Kei na ti u na asik chu Lekhabūna ānziak anga,
“Nangni ngāi sika hin Jentail ngāi kāra mīn Pathian raming chu āsiat ei ril u ani zei,”
ati u na.
25 Ataktaka,
dān chu na tel u ten,
serantan om zia chu ei nemna a om a,
tenchu dān na khēl u ten,
ser nei antan u ha serantan nōk ang ani na.
26 Havan tin dēn han serantan thō ngāi lui mi ngāiin dānin ei ti ngāi azī u ten,
Pathianin serantan lui ngāi um nisela serantan ngāi anga lei pom nō ni mo?
27 Hatuka chu nangnīn dān hē chu ahek tenpeia nei dōn u.
Hanūk chu aser um nei antan u,
tenchu nangnīn dān chu nei rakān u ani na.
Hava sika han serantan ngāi lui mi hān dān dōra amakhip zit anten,
amān na chung rui ril nō ni mo?
28 Asik chu apang duaia Jihudi chu Jihudi tak ni mak.
ataksa pang duaia serantan um serantan tak ni mak.
29 Tenchu asūngrīl tataka Jihudi kēng Jihudi tak.
Hanūk chu sūngrīla serantan kēng serantan tatak ani na.
Hava ha horopa ānziak ni mak,
tenchu Ratha nāta kēng.
Hava Jihudi tak ngāi anpākna chu āta miring āta ni mak tenchu Pathian āta kēng.