Pathian a iamrua
3
1 Havan tin han aniten,
Jihudi ngāiin imo aliak uala mi tei ranga āsa bet ei ni u na?
Ser ei antan um nisela imo ei nemna?
2 Hava ha chu kongtin peia ei nemna om kēng,
mānsa khīta chu Pathian chong chu amāni ngāi kōma kēng ei hong manlōn ani na.
3 Hatuka chu senkhatin iam ngal u nō sela hanum imo ei chang rang?
Amānīn ei iam u nōk sika Pathian aiam rua ei ni zia chu akorong mo ei manchang u rang?
4 Ni pial nō ni.
Pathian chu chongtak ani na,
miring dōra chu milak athei ni rase.
Hava ang tak han Pathian chongin ei ti:
“Nangin chong na ril tikām
nang chu asat anlō na ti.
Rui anrila na om nikhua nām
arāt anlō na ti,”
(Sām 51:4 )
ti ani na.
5 Tenchu koini nei dik nōkna ngāia hin Pathian dikna chu ei manlang riam ani na.
Havan tin han nisela atei imo aril rua ala ni?
Miring chong anga chong ka ti,
Pathianin taksitna le phuba hong la sela hava tika ama chu dik mak mo nei ti rang ani zei?
6 Ama chu dik mak ti pial thei nō mani.
Havan tin han ani nōk ten,
Pathianin hontin mo maniapūr rui ei ril rang?
7 Tenchu koi ka milak thō sika Pathian chongtak ei ni zia chu ama lianna ei anlang riam ani na.
Hanle ichanga mo mi salui ati na āsia kei lan lō bang?
8 Havan tin han mi senkhat chu koini ngāi siat arila koinīn nei ril nōk ha ārila ei na manchang u.
Hintin hin āril ei na manchang u:
“Tho,
āsa ei hong suak riamna ranga āsia thō riam u rei,”
ati u na.
Amāni ngāi chunga Pathianin āsia ei hong manlō hi ādik ani na.
Tutē mi ādik om mak
9 Hanle imo ei ni rang ani zei?
Atei ngāi nēka hin koini hi mo āsa ual na ni zei?
Hava ha chu ni thak mak.
Asik chu machin lāi ual han Jihudi le Grik ngāi aloma āsia ningneina thuaia alēng kēng ani zei ti na nei riatpui ani na.
10 Asik chu hivan tin hin lekhabūna anziaka:
“Tutē mi dik khat ngal om lāi
mak,
Angkhatte ngal om mak.
11 Tutē ariat khat ngal om lāi
mak,
Tutē Pathian anrok khat ngal
om mak.
12 Alom u na lampui dik nōk
tiang apan u zei.
Alom u na ei nemna bui
akorong kēng ani zit u zei.
Tutē angkhatte ngal sin āsa
thō om lāi mak,
Angkhatte ngal om mak.
(Sām 14:1 -3, 53:1 -3 )
13 Abāikua u chu thānkhur
anruk lui ang ani na.
Amalei u chu mi huangna
kēng ei ril.
A-ādang u sūnga rosok tūr
kēng a om.
(Sām 5:9, 140:3 )
14 Amūr u na khomāk samna le
chong ākha kēng ābit.
(Sām 10:7 )
15 Ake u chu mi thisen
ansuakna ranga anrap kēng.
(Hnc.1:16 )
16 Alampui zī u na tina anpeina
anbuaina kēng.
17 Phūkdāina lampui reng
riat u mak.
(Isa 59:7 -8 )
18 Pathian anchina reng amāni mit muna abui.”
(Sām 36:1 )
19 Koinīn nei riat chu,
dānin chong ei ril chu dān thuaia a om ngāi ranga kēng ei ril.
Asik chu mūr tin ei ankhār theina rang le maniapūr mi dōra Pathian ruirilna thuaia ei om theina ranga.
20 Hava sika han,
dān sin thō sika tukareng miring makunga ādik anlō thei nō ni.
Asik chu dān ei hong om sika kēng āsia hi riat theina ei hong om.
Iamna sika asat anlō
21 Tenchu atun hin dānbu le deari ngāi lekhabu ngāia ei hong manriat anga dān anchel luia Pathian ama atheia ei dikna
chu ei hong manlang ani na.
22 Hatuka hava Pathian dikna ha Isua Krista iamna nāta āsuak ani na.
Hava ha aloma miring dōra le āiam ngāi dōra chunga ei hong manlang ani na.
Asik chu itē ei teina om mak.
23 Miring dōra aloma āsia thō zit keng ani zei.
Amānīn Pathian lianna pha sua thei u lāi mak.
24 Ama alungkhamna zāra Krista Isua ratanna lehan man abuia aloma asat ei manlō ani na.
25 Pathianin Isua Krista chu amān ei pom anbōlna dāli ei ni theina ranga ei manlang ani na.
Hava ha koinīn ama thisen ngēta iamna zāra nei man ani na.
Asik chu Pathian adūkdiar theina zāra tian lāia āsia nei thō ngāi dōra ei na diar pe ani na.
26 Pathian chu ama aninga ādik ei ni sika le Isua chunga āiam ngāi dōra chunga asat ei manlō theina ranga atun um ama ei dikna chu ei manlang chian
ala ni.
27 Atun chu miringin hong zāt mo borāi ei thōna rang ani zei?
Hava ngāi ha chu abāng sua zei.
Hong zāt dānin mo ei manbāng?
Asin thō dānin mo?
Ni pial mak.
Tenchu iamna dānin ei manbāng ani na.
28 Hava sika han koinīn hintin hin chong nei masat ani zei,
dān sin thōna anchel luia iamna dān duai lehan Pathianin miring chu asat ei manlō kēng.
29 Pathian hi Jihudi ngāi rang ronga Pathian mo?
Jentail ngāi rang um ni mak mo?
Ani,
Jentail ngāi rangām Pathian ani na.