Abraham iamna sika asat anlō
4
1 Hanle taksa tianga koini na chipui Abraham arui le imo nei ti rang?
Amān hong zāt mo ei man?
2 Kei hong tina asik chu Abraham asin thō sika asat ei anlō thei aniten,
amān borāi thōna rang ādōna.
Tenchu Pathian tak chunga chu ni mak.
3 Asik chu Pathian lekhabūna imo ei ti?
“Abraham chu Pathian a iama,
hasik han hava ei iamna ha Pathianin ama ranga satna ati na ei ruat pe ani na.”
(Anp.15:6 )
4 Tukareng asin thō sika alō ei man chu hava ha lungkhama neinun pēk ati na anruat mak.
Tenchu ei lō rang ngala achang-āi ati na kēng ei anruat.
5 Tenchu mīn asin thō sika ni mak,
tenchu Pathian biak lui ngāiin a iam u ten,
asat amanlō theia.
Hatuka amān hava ei iamna ha Pathianin ama ranga asat anlōna ranga ei ruat pe ani na.
6 David um nisela hiva ruia arila.
Asin thō ni luia Pathianin asat ei manlōna ei ruat pe bōrsāng atung rui arila:
7 Davidan ati na:
“Dān hē ei khēl u na ngāi
andual pe sua,
Le āsia ei thō ngāi dōra
ankhu pe sua chu
bōrsāng atung kēng.
8 Āsia ei thō ngāi Pumān ei
ruat pe nōk chu
bōrsāng atung kēng,”
(Sām 32:1,2 )
ati na.
9 Hanle hava ‘bōrsāng atung,’
ti chongkam taka han serantan ngāi rang duai mo ole serantan lui ngāi rang um mo ei rakōk?
Asik chu:
“Abraham iamna le kēng Pathianin asat ei anlōna ei ruat pe,”
nei ti,
ani na.
10 Hava ha hova tik lāia ei manlō mo?
Serantan suale mo ole serantan mān mo?
Hava ha serantan suale ni mak,
tenchu serantan mān ani na.
11 Serantana a om māna Abrahamin iamna ei dōn ani na.
Hatuka hava iamna sika ādik ati ei anlō theina ranga andangna ranga serantan sinsiana hi ei man ani na.
Havan tin han serantan luia iamna adōn ngāiin amāni ranga dikna ei anruat theina ranga Abraham chu mi dōra pā ei chang ani na.
12 Abraham chu serantan ngāi pā rong ni mak,
tenchu serantan māna iamna adōn koini na chipui Abraham iamna anūk azī ngāi dōra pā
ani na.
13 Asik chu Abraham le achi ngāi kōma maniapūr alua ranga chongtin ha ei man u ani na.
Hava ha dān sika ni mak,
tenchu iamna zāra dikna sika ei man u ani na.
14 Dān sika ei lua u rang nisela chu iamna chu akorong ei chang rang ani na,
hanūk chu chongtin sua hām nemna bui ei chang rang ani na.
15 Asik chu dānin taksitna kēng ei masuak.
Tenchu dān ei buina chu dān akhēl nām om mak.
16 Lungkhamna ang taka kēng chongtin chu iamna le nei man rang,
hava chongtin ha Abraham achi ngāi dōrān chāi luia ei man u rang ani na.
Hatuka dān āzī ngāi rong ni mak tenchu Abraham iamna azī ngāi dōram ei man rang ani na.
Asik chu ama ha koini ngāi na loma na pa ani na.
17 Hivan tin hin Pathian lekhana anziaka:
“Koiin nang hi nam tamtak pa kei na manchang ani zei,”
(Anp.17:5 )
ati na.
Hiva hi amān ei iama Pathianin ei ti ani na.
Āthi ngāi damna āpēk rēt thei le a om nōk neinun ha om rase ātipu Pathianin ei ti ani na.
18 Abrahamin itē anngampui rua adōn ngal nōkām nisela ansabeina adōntit chunga “Nam tin pā,”
achang ranga iamna adōna.
Asik chu Pathianin akōma:
“Na chi chu hava dōr pei tam inti,”
(Anp.15:5 )
ati na.
19 Ataksa chu achuai zita anriata,
kum razakhat dām ei kāi um anriata,
Sara āching ei nīm ei riatsua ani na.
Hanum nisela iamna tianga chu chuai pial mak.
20 Tenchu Pathian chongtin tiang anhoia iamna tianga sōkchana dōn mak.
Tenchu iamna tianga arāt riama,
Pathian chu amanpāka.
21 Asik chu akōma chongtin ha Pathianin tak manchang ngēt inti ti anriat tatak ani na.
22 Hasika han:
“Hava ei iamna ha ama ranga Pathianin ādik ati na aruat pena.”
(Anp.15:6 )
23 Pathian lekhabūna hava chong ngāi ha ama rang duaia anziak ni mak.
24 Tenchu koini ngāi rangām ānziak ani na.
Koini na Puma Isua āthi ngāi bil āta ānthuipu Pathian chunga nei iam ei ni sika koinīn nei iamna ha ādika ei na ruat pe ani na.
25 Hava Isua ngēt ha “koinīn dān nei khēl sika ei hong betōk” ani na.
Hanūk chu koinīn asat nei anlō theina ranga āthi nāta Pathianin ei hong mathui rēt ani na.