15
1 Hasika han koini āchak ngāiin āchak nōk ngāi ei chak u nōkna hi atiarpui anānga.
Na thei rang duaia ahuina thō u nō rei.
2 Koini na ning chipa na inkōl mi ei ansōn theina ranga arāisānna ranga satna thō u rei.
3 Asik chu Kristam nisela ama aninga rang duai ahuina thō mak.
Tenchu Lekhabu ānthianga anziak anga:
“Nang na chunga mani
ēro ei na thō u na
mani ēro ngāi dōra chu
ka chunga ahong achul
kēng ani zei,”
(Sām 69:9 )
ati na.
4 Asik chu dūk adiar chunga le Pathian Lekhabu ānthianga lungngamna lehan ansabeina nei dōn thei na ranga tian lāi āta alei anziak ani na.
Hava ha koini ngāi nei anchūna ranga tian lāi āta ahong anziak sua ani na.
5 Dūk diar theina le lungngamna ana pēk Pathianin Krista Isua nūk nei zī u anga mandon munkhat chōi theina malung na pe u rase.
6 Malung munkhat le chong khat achōia koini na Puma Isua Krista Pa le Pathian lianna chu nei manpāk thei u na ranga.
7 Kristān nangni ngāi ei na pom u anga nangnīm Pathian lianna ranga angkhat le angkhat anpom anlōm u ro.
8 Asik chu imo na ril u ka ti,
Pathian chongtakna ranga Isua Krista chu serantan ngāi hasōndom ei hong chang ani na,
na chipui ngāi kōma ei pēk achongtin thō chu ei dettit theina ranga.
9 Hatuka Jentail ngāi um nisela alungkhamna sika Pathian ei manpāk thei u na ranga.
Lekhabu ānthianga anziak anga:
“Hiva sika hin Jentail ngāi
kāra na raming puang ka ti.
Na raminga anpākna la thō
ka ti,”
(2 Sam.22:50 Sām 18:49 )
ati na.
10 Hanūk chu:
“O nangni Jentail ngāi,
ama ami ngāi bila rāi
mansān u ro,”
(Dān.32:43 )
ati na.
11 Hanūk rēt chu:
“O nangni Jentail ngāi na lom
u na Puma manpāk u ro.
Nangni mipui dōra na lom u
na ama anpākna la anringa
thō u ro,”
(Sām 117:1 )
ati na.
12 Hatuka Isaian ati rēta:
“Jessi achi azām chu om chian
inti.
Jentail ngāi chunga ruiril
ranga Pathianin mi khat
hong mathui inti.
Ama chunga Jentail ngāi
ansabei unti,”
(Isa.11:10 )
ati na.
13 Nangni ngāi Ratha Ānthianga rātna lehan ansabeina adōna nei liam thei u na ranga ansabeina Pathianin nei iam u na lehan aloma rāisānna dōra le phūkdāina tin rēnga na manbit u rase.
Jentail ngāi ranga
Paul asinthō
14 Ka unāi ngāi,
nangni na thei u chipa satna tina ābit le riatna tin akip lehan anchū thei na ni chip u ti hi koi ngētin kei na riatpui u ani na.
15 Hanum nisela kei na hong manriat rēt thei u na ranga hohon mo arāng uala kei hong maziak ani na.
Asik chu hava ha ka ranga Pathianin lungkhamna ei na pēk ani na.
16 Jentail ngāi kāra Pathian thang ahui aril ranga chāizūng haso kei dom bibila hin Krista Isua hasōndom kei hong chang ani na.
Jentail ngāi Ratha Ānthiang zāra dāli ānthiang anga,
Pathian pom rua ei ni thei u na ranga.
17 Hava sika han Pathian tianga rui tāng lama chu Krista Isuana anlianpui rua ka dōna.
18 Hanum nisela Jentail ngāi hē antelna ranga Kristān koi ka chong ril le ka sin thō amanga ei thō ngāi rong nōk chu atei itē ril ngam makung.
19 Hava ha Pathian Ratha thōtheina lehan sinsiana lianpa ngāi le tichang abui sinpa ngāi amanga ei hong thō ani na.
Han tin han Jerusalem khopui āta Illurikom ram ravēl pumpuia Krista thang ahui aril chu ka mantung sua zei.
20 Krista raming ei lan ril pial nōkna muna thang ahui avaril rang hi ka derdīn babang ani na.
Tenchu mi tein abul alei mandingna muna vamanding lāi nō rong.
21 Tenchu Lekhabu ānthianga anziak anga:
“Amāni kōma ama ruia mīn
tāng la vahāi ngāi lui,
Hava mi ngāiin lei mu unti.
Hatuka amāni kōma tutēn la
vamanngāi ngāi lui,
Hava mi ngāiin lei riat unti,”
(Isa.52:15 )
ati na.
22 Hiva sik tak hin ani zei,
nangni kōm ahong ranga voi ituk mo kei manlēn ani na.
Rom khuana Paul
asē rang ansin
23 Tenchu atun hin hiva ram ravēl dāma chu ka sin thōna rang mun om lāi mak.
Hatuka kum tamtak ani zei nangni kōma hong ranga kei rangāina.
24 Hasik han kēng Spain rama ka pan rang tiang nangni kōma hong lūt ka ti.
Hatuka ka khualzin balama ana mu u ranga kan sabeia.
Nangni kōma ka om bak suale,
ni hotuk ten mo chu ka phūk atung riam suale kei panna rang ka pan tiang aloma anānsūk pe chīt u ranga ka iam.
25 Atun hin chu mīn thiang ngāi hasōndom ranga Jerusalem khopui asē rang ka ni zei.
26 Asik chu Makedonia ram le Akaia rama mi ngāiin Jerusalema a om mīn thiang ngāi bila abui anriang ngāi ranga rāisān taka chōi rasuang athō u na.
27 Hava ha amānīn rāisān hiai tataka ei thō u ani na.
Hasik han hiva ngāiin sova Jerusalem ngāi kōma ratha antāng ani u zei.
Asik chu Jihudi ngāiin ratha lama neinun ha Jentail ngāi ansempui tāk anten,
amānīm taksa tianga neinun lehan amāni hasōndom ei nāng u ani na.
28 Hasika han hiva chōi rasuang hi andang rapa amāni kuta kei manlōn rang ka mabāk hi anzui le nangni na hong lūt u kati.
Hava suale Spain ram apana sē ka ti.
29 Hatuka nangni kōma ka hong tik chu Krista thang ahuia bōrsāng aliam chu honga chōi ranga kan iam.
30 Koini na Puma Isua Krista sika le Ratha maditna lehin unāi ngāi,
kei na mathēm ani u zei,
koi ka bila nangnīm Pathian kōma bōr na zongpui u ro.
31 Judia rama aiam nōk ngāi kut āta kei zōk theina rang le Jerusalema mīn thiang ngāi ranga haso kei domna hi amānīn ana lei pom pe thei u na ranga bōr na zong pe u ro.
32 Havan tin han Pathian zōt dān ang taka rāisān taka nangni kōma kei hong suak theia hanūk chu na bil u na rāisān hiaia pōng kei ansa theina ranga.
33 Phūkdāina Pathian chu na lom u chunga om rase.
Amen.