Chibai thōna
16
1 Koini na sarnu,
Kenkria kuibinga hasōndom Phoibi ha ka na manriat zōt u na.
2 Mīnthiang ngāiin ei pom u anga ama hi Puma raminga lei pom u ro.
Hanūk chu kong tina ama ei nāngna tina asan ranga kei na mathēm u.
Asik chu ama apum len hi mi tamtak asan le koi len um ana san chachak ani na.
3 Krista Isuana ka sin thōpui ngāi Priskilli le Akuila ha chibai na thō pe u ro.
4 Hava ngāi ha kei damna anzōk ranga arīng adō u
ani na.
Koi rong ni mak amāni
anni ngāi chunga rāisānna antung,
tenchu Jentail ngāi kuibing pumpuin um rāisānna amantunga.
5 Amāni anni ngāi insūnga kuibing a om ngāi ha chibai na thō pe u ro.
Hatuka Krista ranga Akaia rama mara rapa mānsa kei madit Epaineta ha chibai na thō pe u ro.
6 Koini na ranga achālaka apōng sabak Mari ha chibai na thō pe u ro.
7 Ka unāi anchangpui le kei ankhumpui ngāi Andronika le Juni ha chibai na thō pe u ro.
Hava ngāi ha kuitīr ngāi bila raming anthang ani u na hanūk chu ka māna Kristana alei om u ani na.
8 Pumana kei madit Ampilia ha chibai na thō pe u ro.
9 Kristana koini na sin thōpui Urbana le kei madit Stakia ha chibai na thō pe u ro.
10 Kristana apom rua mi Apellia ha chibai na thō pe u ro.
Hatuka Aristobula insūngkuana mi ngāi chibai na thō pe u ro.
11 Ka unāi Herodion ha chibai na thō pe u ro.
Pumana a om Narkisa insūngkuana mi ngāi
ha chibai na thō pe u ro.
12 Trupheni le Truphosi ha chibai na thō pe u ro.
Hava nupang ngāi ha Puma ranga apōng sabak ani u na.
Hanūk chu Pumana achālaka apōng sabak kei adit Persi ha chibai na thō pe u ro.
13 Pumana anthang Rupha le anu koi um ka nu kei ti ha chibai na thō pe u ro.
14 Asinkrit,
Phlegon,
Hermen,
Patroba,
Herman le abil u na unāi a om ngāi ha chibai na thō pe u ro.
15 Philologo le Juli,
Nerea le asarnu hanūk chu Olumpa le abil u na mīnthiang a om ngāi ha chibai na thō pe u ro.
16 Biang antum ānthianga chibai lehan chibai anthō u ro.
Krista kuibing pumpuiin chibai ana hong thō u.
17 Unāi ngāi ka na hong mathēm u,
anchūna nei man u ang ni luia aleko tianga ansenna le anduina asin ngāi ha mandang u ro.
Hava ngāi kōm āta ankhāi u ro.
18 Asik chu havan tina mi ngāi chu koini na Puma Isua Krista haso ni mak ei dom u,
tenchu avon khopna ranga hasōndom u kēng.
Achong thum u na le aner thiam u na amanga molmana a om ngāi malung chu ei huang u chachak.
19 Nangni ngāi na hē tel u na rui chu mi tin kuara anthang kēng ani zei.
Hasika han na chung u na ka rāi asāna.
Hanum nisela asa lam panga chu ahiana tenchu asa nōk lam panga chu molmana om ranga kei na zōt u.
20 Phūkdāina Pathianin anrapa soitān chu na kepha thuai u na achīl inti.
Koini na Puma Isua Krista lungkhamna chu na kōm u na om rase.
Amen.
21 Ka sin thōpui Timothi le ka unāi Lukia,
Jason,
Sosipater ngāiin chibai ana hong thō u.
22 Hiva lekha anziakpu koi
Tertia hīn Puma raminga chibai ka na hong thō u.
23 Koi le kuibing pumpui na tung inpa Gaia hīn chibai ana hong thō u.
Hiva khopuia sum avongpu Erasta le koini na parual Kuarto hān chibai ana hong thō u.
24 Koini na Puma Isua Krista lungkhamna chu na lom u chunga om rase.
Amen.
25 Koi ka thang ahui le Isua Krista rui anthekna zāra nangni ngāi anānding thei u kōma anpākna om rase.
Hava ha tian lāi hun len āta anlang lui chongrīl anthup ani na.
26 Atun chu hava ha tāituan Pathian achongpēk anga deari ngāi lekha ziak amanga ahong anlang zeia.
Nam tinin ama chu ei iam theina rang le ahē ei tel thei u na ranga.
27 Isua Krista zāra ama rong ahian khīt Pathian kōma tāituan tāituana anlianna om rase.
Amen.