Chibai thōna le rāisān
chong antungna
1
1 Pathian zōt anga Isua Krista kuitīr ranga ānkui koi Paul,
le koini na parual Sosthini hīn,
2 Korinth khuana Pathian kuibing a om ngāi le Krista Isua ranga āndang ngāi kōma,
Pathian mīnthiang āchang ranga ānkui ngāi kōma nei maziak.
Hanūk chu ram tina om ngāi amāni Puma le koini na Puma Isua Krista raming āpāi ngāi kōma nei hong maziak ani na.
3 Koini na Pa Pathian le Puma Isua Krista lungkhamna le phūkdāina na kōm u na om rase.
4 Krista Isuana Pathian alungkhamna ei na pēk u sika nangni ngāi ranga ka Pathian kōma rāisānna chong ka mantung babanga.
5 Asik chu ama zāra kongtin renga alom peia na chong ril u na dōra le alom peia nei hian u na dōra lehan ama zāra ānchong sabaka nei om u ani na.
6 Hava taka han Krista ruia koinīn nei puang ha nangni kōma ānpom ti ha āndangphit zeia.
7 Hasik han koini na Puma Isua Krista ei hong anlang rang na lei mangang chian u hin ratha lam tiang itē ansam u mak che.
8 Hatuka chu amān ahek ten pei koini na Puma Isua Krista nikhua tika ademrua buia na manngīrtit ūnti.
9 Anāi pasal Isua Krista koini na Puma lehan mun khata ei na siak theina ranga ana pāi Pathian chu āiamrua ani na.
Kuibing ansenna rui
10 Unāi ngāi,
koini na Puma Isua Krista raminga ka na mathēm u,
na lom u na chong khat ril u tānla,
na kār u na ansenna om ngal nō rase.
Tenchu malung munkhat avong le mandon munkhat achōia angkhata om u ro.
11 Asik chu ka unāi ngāi,
nangni ngāi kāra ansualna rui ha Kloii ngāi insūngkuana mīn ei na manthei ani na.
12 Hava kei na hong ti u na asik chu:
Angkhat angkhatin hintin hin nei ti chip u:
“Koi Paul atianga mi ka ni.”
Angkhatin:
“Koi Apollo tianga mi ka ni.”
Angkhatin:
“Koi Kipha tianga mi ka ni.”
Hanūk angkhat rētin:
“Koi Krista tianga mi ka ni,”
na ti u chachak.
13 Han tin han aniten,
Krista chu ānbāksiam mo ani zei?
Paul mo nangni rathūla krosa āntār?
Hanūk chu Paul araminga mo baptisma nei lāk u?
14 Krispa le Gaia rong nōk chu tutē baptisma pēk makung,
hava sik han Pathian chunga ka rāi asān.
15 Ka raminga nangnīn baptisma na lāk u ti ha tutēn ril nō rase.
16 Stephena insūngkua ngāi rong hi baptisma apēka kān riata,
hava rong nōk chu atei tutē kei pēk le pēk nōk re lāi makung.
17 Asik chu Kristān baptisma pēk ranga ei na tīr ni mak,
tenchu thang ahui ril rang kēng ei na tīr.
Miring theina chong manga ni mak,
tenchu kei mang aniten Krista kros thīna ranak chu akorong chang inti.
Krista riatna le Pathian
sin thōtheina
18 Asik chu kros ruia chong chu ānpei tir rang ngāi kōma āmona.
Tenchu koini sandama a om sua ngāi kōma chu hava ha Pathian thōtheina ani na.
19 Asik chu Lekhabu ānthianga ānziaka:
“Mi hian ngāi hianna chu
masiat pe ka ti,
Āriatthei ngāi riattheina chu
akorong manchang pe
ka ti,”
(Isa.29:14 )
ati na.
20 Ho mo mi hian ngāi?
Ho mo riatna athūn ngāi?
Ho mo hiva huna chong āntuk āthei ngāi?
Pathianin hi maniapūr hianna chu āmo manchang mak mo?
21 Asik chu Pathianin hianna ei dōn sika maniapūrin ei hianna lehan Pathian riat theina dōn u mak.
Hasika han ā-iam ngāi sandama ei om theina ranga molmana thang ahui chong ānril lehan Pathian arāi ei sān ani na.
22 Jihudi ngāiin tichang abui sinsiana mu rang azong u na,
Grik ngāiin hianna ārok u na.
23 Tenchu koinīn krosa āthi Krista rui kēng nei ril.
Hava ha Jihudi ngāi ranga ānpalna,
Grik ngāi ranga āmona.
24 Tenchu Jihudi mo ani,
Grik mo ani,
aloma ānkui sua ngāi ranga Krista chu Pathian thōtheina le Pathian hianna kēng.
25 Asik chu Pathian ei mona chu miring hianna nēka hianna ani na.
Hatuka Pathian rāt nōkna chu miring rātna nēka ārāt ani na.
26 Unāi ngāi,
Pathianin ei na pāina u na mandon u ro.
Miring lam dingmuna chu tamtak mi āhian ni u mak chena,
tamtak ningneina dōn ni u mak chena,
tamtak mi lian insūng āta ānzir ni u mak chena.
27 Tenchu Pathianin maniapūra āmo ngāi hi ei thang,
āhian ngāi māimōk asak ranga.
Pathianin maniapūra rāt lui ngāi ei thang,
arāt ngāi māimōk sakna ranga.
28 Hanūk chu Pathianin maniapūra annuai le ēlsēl akāi ngāi ei thang,
hava rong ha la ni mak,
a om nōk ngāi um Pathianin ei thang,
a omsa ngāi akorong ei manchang theina ranga.
29 Tutēn ama makunga borāi ei thōthei nōkna ranga.
30 Ama chu koini ranga Pathian āta hianna ei chang,
hava ngāi ha ani zei dikna,
anthiangna,
ratanna ngāi ei chang ani na.
Pathian sika kēng Krista Isua lehan nei anzom u.
31 Hasik han Lekhabu ānthianga ānziak anga:
“Tukareng borāi āthō tak chu
Puma sika borāi thō rase,”
(Jer. 9:24 )
ati na.