2
1 Unāi ngāi,
na kār u na ka honga Pathian kei hong riatna rui ka hong ril lāi han ka chong theina ānsāng le hianna songa hong makunga.
2 Asik chu Isua Krista le akrosa ei tār u rui rong nōk chu na kār u na atei itē āriat ranga ansin makung.
3 Na kōm u na ka hong lāi han chak lui taka anchi le rathatāk sabak chunga kei hong ani na.
4 Ka bāia chong le ka chong ril ngāi hi miring hianna chong amanga anthēmna ranga chong ni mak,
tenchu Ratha le thōtheina sika kēng ei hong manlang.
5 Asik chu nei iam u na hi miring hianna chunga ānphun chang luia Pathian rātna chunga ānphun chang rase.
Ratha Ānthiang āta hianna
6 Hanum ni rase,
puiting sua ngāi kōm hianna rui hi nei ril ani na.
Tenchu hava hianna rui ha hia ramual hianna ni mak,
hia ramuala rui rilpu ngāi hianna ahek tira asē rang ngāi um ni mak.
7 Tenchu koinīn Pathian hianna chong,
chongrīl ānthup kēng nei ril.
Hava hianna anthup ha koini anliana nei omna ranga ramual anphut mān āta Pathianin alei ruatsa ani na.
8 Hava ha hi ramual ruirilpu ngāi bila tutēn ariat om mak.
Asik chu amānīn riat u sela chu anlianna Puma
hi krosa ei tār u nōk rang ani
“Amāni mitin la mu ngāi lui,
Amāni kuarin la riat ngāi lui,
Miring malung sūnga andonna
la chui ngāi lui,
Hiva ngāi dōra hi ama andit
ngāi ranga Pathianin alei
mansūk chīt ani na,”
(Isa.64:4 )
ati na.
10 Tenchu Pathianin ama Ratha lehan koini na kōma ahong manlanga.
Asik chu hava Ratha hān rui aloma athūn zita.
Pathian ruia anthūk ngāi um athūn zit theia.
11 Asik chu miring sūnga om ama aratha rong nōk chu hova miring mo miring mandon dēn ariat rang?
Havan tin anga Pathian Ratha rong nōk chu tutēn Pathian mandon ariat thei om mak.
12 Koinīn maniapūr ratha ni mak nei man,
tenchu Pathian Ratha kēng nei man.
Pathian alungkhamna zāra man abuia ei na pēk abōr ngāi nei riat theina ranga Ratha nei man ani na.
13 Hiva rui nei ril ngāi dōra hi miring hianna amanga ei na manchūna chong anga ni mak.
Tenchu Ratha Ānthiangin chong ei na manchūna anga kēng chong nei ril.
Ratha chong dēn amanga kēng ratha lam rui chu koinīn nei manthiang ani na.
14 Taksa lama miring chu Pathian Ratha lama rui man thei mak,
asik chu hava ha ama ranga amona ani na.
Asik chu ratha lam dēna ariat ei nāng sika amān riat thei mak.
15 Ratha lam mi chu alom peia rui ei ril zit thei kēng,
tenchu tutēn ama chunga rui aril thei om mak.
16 “Tu mo Puma malung ariat
thei a om,
Tu mo ama anchū thei a om?”
(Isa.40:13 )
Koini chu Krista malung vong adōn kēng na ni zei.