1
1 Koi Paul,
Pathian zōt anga Isua Krista kuitīr le koini na parual Timothi hīn,
Korinth khuana Pathian kuibing ngāi kōma le Akaia ram pumpuia mīnthiang ngāi dōra ranga nei maziak ani na.
2 Pathian koini na Pa le Puma Isua Krista lungkhamna le phūkdāina chu na kōm u na om rase.
Alom peia
lungngamna Pathian
3 Koini na Puma Isua Krista Pathian le Pa chu lungngamna tin reng Pathian ani na.
Ama chu lung anpōngna tin reng Pathian ani na.
Ama chu anpāka om rase.
4 Pathianin lungngamna ei na sak lungngamna le dēn kong tin rēnga antakna atēng ngāi kōma lungngamna nei sak thei u na ranga amān alom peia koini ngāi nei antakna tin rēnga hin lungngam ei na sak ani na.
5 Asik chu Kristān antak ei tiarna koini na chunga ei hong liam anga Krista zāra koini na chunga lungngamna chu ei hong liam ani na.
6 Koinīn antakna nei tiar hi nangni ranga lungngamna le sandamna ei chang ani na.
Hanūk chu lungngam ansaka nei om hi nangni ranga lungngamna ei chang ani na.
Koinīn antak nei tiar bibila nangnīm antak na tiara dūk na diar u ten,
lungngamna ha atak chang inti.
7 Asik chu antakna atiarpui nei ni u anga lungngamna achangpui na ni u ti hi koinīn nei riat sika achān nei nānngampui ani na.
8 Unāi ngāi,
Asia rama antakna koini na chunga ei hong suak ha riat luia nei om u rang zōt mak me.
Hava lāi han adiar thei nōk khop achālaka antakna nei tiar ani na,
adam ranga ansabei ngal lāi mak me.
9 Thīna rong kēng na mabāk ani zei ti hi na malunga ahong achui ani zeia.
Tenchu hava taka han koini na ninga anngamna nei luia thīna nāta anānthui thei Pathian rong kōma anngamna nei dōn theina ranga ei hong om kēng.
10 Amān thīna rathatāk āta ei na hong mazōk ani zei,
atun um nisela na la hong mazōk inti nangkanām na la hong mazōk bang inti ti hi ama chunga nei anngam ani na.
11 Mi tamtakin bōr ei zongna zāra koinīn lungkhamna bōrsāng pēk nei mana,
koini na sika mi tamtakin rāisān chong ei ril thei u na ranga nangnnīm bōr azong sina nana hong san thei u.
Paulin amandon athūl
12 Atuna koinīn nei anlianpuina chu:
Koini na kōma om siat le sa riatnān ei na manthei anga malung ānthiang le Pathian dikna anei chunga,
miring hianna amanga ni mak a,
tenchu Pathian lungkhamna lehan hi maniapūra hava nēka om asāna nei lēng,
abīka nangni ngāi kāra hantin han nei lēng ani na.
13 Nangnīn nei pore le nei riat thei u nōk rang atei itē na rang u na maziak mak me.
Tenchu ahek ten peia koini na chong ril ngāi hi riat thei ūn na ti ati na ka nānngampui u.
14 Atun chu alakte kēng nei na la riat u ala ni,
tenchu nangkana Puma Isua nikhua hong asuak tika chu koini nei nānlianpui u anga nangnīm nānlianpui inti.
15 Havan tin han na chung u na anngamna kei dōn sika khēp anni changna bōrsāng pēk nei chang thei u na ranga mānsana na kōm u na hong ranga kei masuk ani na.
16 Na kōm u na kei na hong pan u balama Makedonia rama sē ka ting,
hatuka Makedonia ram āta athara na kōm u na hong kīr rēt ka ti.
Havan āta chu Judia ram kei panna rang lampui chu nangnīn na malong pe ūn na ti.
17 Havan tin han kei masuk sika malung azāng om mo kei anlō rang tāk?
Ole hiva hi miring mandon papei anga mo ei ni rang?
Koin,
‘O’ kei ti ha ‘O’ duai mo ei ni chachak?
Hanūk chu ‘Māng’ kei ti ha ‘Māng’ duai mo ei ni chachak?
18 Tenchu Pathian aiamrua ei ni anga koini na chongril um ‘O’ voikhat,
‘Māng’ voikhat ni ngāi mak.
19 Asik chu koi le Sila hanūk chu Timothi,
koinīn na kōm u na Pathian Nāi Pasal Isua Krista rui nei ril ha ‘O’ voikhat rēt,
‘Māng’ voikhat rēt ni maka,
tenchu ama kōma ‘O’ chu ‘O’ len kēng ei ni.
20 Asik chu Pathian achongtin ngāi dōra hi ama ranga chu aloma ‘O’ zit ani na.
Hasika han mīn Pathian anpākna ranga ama sika ‘Amen’ nei ti chachak ani na.
21 Hatuka Kristana nangni
le koini anānrātpu le sariak anānthīpu chu Pathian ani na.
22 Amān koini hi ama ta anānchangna ranga ei na mandang le koini na malung sūnga nangkana ranga alei akhāpna Ratha ana pēkpu ani na.
23 Ka malung ana riat pe Pathian len a om,
nangni ngāi kei na rēng duai u sika hin atun tena Korinth khuana kei la hong nōkna asik ani na.
24 Nangni ngāi nei iam u na chunga rui aril rang ni mak me,
tenchu koini hi nangni na rāisān u na ranga na sinthōpui ngāi na ni na.
Asik chu iamna lehan adettita anding kēng na ni u zei.