Chibai thōna
1
1 Koi Paul,
miring kōm āta le miring sika kuitīr ni makunga,
tenchu Isua Krista le āthi ngāi bil āta anthuipu Pa Pathian zara kuitīr ka ni na.
2 Ka bila om unāi ngāi dōra le han,
Galatia rama kuibing ngāi ranga:
3 Pathian,
koini na Pa le koini Puma Isua Krista lungkhamna le phūkdaina na chung u na om rase.
4 Pathian koini na Pa ei zōt anga atun lāi taka hun āsia nāta anān zōk thei ranga Isua Krista chu ama aninga koini masial ngāi sika ei hong anpēk ani na.
5 Ama kōma tāituana anlianna om rase.
Amen.
Galatia mi ngāi nūk ei ankei
u sika Paul amalung natna
6 Krista alungkhamna zāra ana pāi u kōm āta anrappāna thang ahui atei tianga nei anthot u hi ka chang adong sabaka ka riata.
7 Thang ahui atei itē om mak,
tenchu nangni ngāi malung sōk anchāna ranga mi senkhat a om a,
hava ngāi hān Krista thang ahui chu ankhōi ranga aval u na.
8 Tenchu koinīn na kōm u na thang ahui nei hong ril nōk thang ahui atei koini mo ole vān āta vānpalāi ngāi mo thang ahui ahong ril tak chu khomāk tung u rase.
9 Machina kei na ril u anga atun um ka na ril rēt u:
Nangnīn thang ahui nei man u nōk thang ahui atei ahong aril ving tak chu khomāk tung rase.
10 Asik chu atun tena hin miring lōpna mo kei la rok chian ole Pathian lōpna mo kei la rok?
Hanūk rēt chu miring rāi ansānna mo kei la ravān chian?
Atun tena hin miring rāi ansānna kei la ravān chian aniten,
Krista suak achang ni lāi makung.
Pathianin Paul ei pāina
11 Unāi ngāi,
thang ahui kei ril hi miring kōm āta ni mak ti hi kei na manthei zōt u ani na.
12 Hava ha miring kōm āta kei man ni mak,
miringin ei na manchūm ni mak.
Tenchu Isua Krista ei hong anlangna zāra kei man kēng.
13 Tian lāi han Jihudi sakhua na ka om lāia ka omdān ngāi ha na riat kiar u na.
Asik chu Pathian kuibing achālaka ansinsak chachak le ansiat biang ranga tepannēl ka ni na.
14 Hanūk chu ka chi ka nama pipu omdān ngāi āzī lampanga mi nēka tepannēl kei ni sika Jihudi sakhua na ka nam ngāi kāra ka rual changpui tamtak akhēl ka ni na.
15 Tenchu ka
nu von sūng āta Pathian anānthangpu hān alungkhamna zāra ei na pāi ani na.
16 Jentail ngāi kāra ama thang ahui chu kei varil theina ranga anāi pasal chu ka kōma ei na hong manrāl pe rang hi ama malung vong ani na,
hava lāi han miring kei rakel om mak.
17 Hanūk chu Jerusalem khopuia ka māna kuitīr alei a om ngāi kōm um sē makunga,
tenchu sōt mak Arabia rama ka pan lena,
hatuka Damaska khuana ka honga kīr rēta.
18 Hatuka kum anthum atheng suale Peter antongpui ranga Jerusalem khopuia ka sē na,
ama bila ni sōmleirangā ka vaom a.
19 Tenchu Puma aparual Jakob rong nōk chu atei tutē kuitīr mu makunga.
20 En u ro,
Pathian makunga kei na ti u kēng,
na kōm u na hiva kei maziak ngāi hi milak ni mak.
21 Hava suale chu Suria ram le Kilikia ram dāma ka sē na.
22 Tenchu Judia rama Krista kuibing a om ngāi kōma tutēn mēlriat na la nei u mak.
23 Tenchu machina koini anānsinsak chachakpu le iamna lampui anbuai chachakpu hān atun chu hava iamna rui thang ahui ngēt ha
han amānīn Pathian chu amanpāk u na.