Paul le kuitīr atei ngāi
2
1 Hankēng kum sōmleimanli suale Barnaba bila Jerusalem khopui a ka kīr rēta,
koini na bila Tita hām na ruaia.
2 Ka kōma Ratha ei hong anlang anga kei sē ani na.
Hatuka Jentail ngāi kōma thang ahui rui kei varil ngāi ha amāni kōma kei vamanlang ani na.
Hanum nisela mi lian ual ngāi kāra chu maruk uala ka ril u na,
asik chu akoronga tān papei kei chang nōkna ranga.
3 Hanum nisela ka bila om Tita chu Grik nam ani nām serantan khakhak rang ti u mak.
4 Tenchu hava ngāi ha maruka unāi rothol ngāi koini bila ei hong lūt u na amānīn suaka ei na sin thei u na ranga Krista Isuana zōkna nei man rui maruka a-en ranga ei hong lūt u ani na.
5 Hanum nisela thang ahuia chongtak chu na kōm u na ei omtit theina ranga chomo khat ngal amāni thuaia lūt mak me.
6 Hanūk chu hongte sika mo mi lian khat ka ni ānti ngāi bila ha ka kōma ei ni le ei ni u nōk ha ka ranga itē ei nemna om mak.
Asik chu Pathianin miring pang tiang a ena ruiril mak,
hava mi lian anti ngāiin ka ranga athar itē ei na manriat om mak.
7 Tenkhata serantan ngāi bila thang ahui aril ranga Peter kōma ei anbetōk anga serantan lui ngāi bila aril ranga Pathianin ei na betōk u ha amu viak thei u na.
8 Asik chu serantan ngāi bila kuitīr achang ranga Peter amalung sūnga sin athōpu dēn ha serantan lui ngāi bila kuitīr achang ranga ka malung sūnga sin ei thō ha amu thei u na.
9 Hankēng ka kōmām lungkhamna anpēk zei ti ariat sua u le Jakob le Kipha le Johan,
hiva ngāi hi lāi chopui anti ngāi hān koi le Barnaba kōma anloppuina chang kut lehan kut anānsūrpui u na.
Havan tin han koini Jentail ngāi kāra nei sē rang,
amāni ha serantan ngāi kāra ei sē u rang ati na chong ei chat ani na.
10 Tenchu anriang ngāi rong hi ariatpuitit ranga ei na mathēm u ani na,
koi um hava ha chu achālaka kei zōt ngal ani na.
Paulin Peter āngō
11 Antiokei khuana Peter asē lāi han ama aning lena dem akāia ei om ani na,
hasik han amaton ngēta kei angō ani na.
12 Jakob akōm āta mi senkhat ahong mān han Jentail ngāi bila nēksāk alei thō chachak ani na.
Tenchu amāni ahong atung sua u le chu serantan mi ngāi ei chi sika anūk ankeia abinga ei ankhāi ani na.
13 Ama bila han atei atei Jihudi unāi senkhat um nisela phuazekām om ei thō u ani na,
Barnaba len um nisela amāni phuazekām om sika han ei manbuai u ani na.
14 Hasik han amāni ngāi chu thang ahuia chongtak anga kal chōi u lāi mak ti ka mu le mi dōra matona Peter kōma kei ti:
“Jihudi nam pial na ni,
hanum Jihudi nam anga omdān nei thō nōk.
Hontin mo Jentail ngāi omdān anga nei oma han,
Jentail ngāi rang ha Jihudi omdān anga kēng nei om khakhak u rang nei ti thei rang?”
ati na.
Jihudi ngāi iamna
sika sandam ani u
15 “Jihudi nam piala anzir kēng na ni,
mi salui nam atei ngāi ang ni mak me.
16 Miring hi dān sin thō ei zī sika asat anlō ni mak,
tenchu Krista Isuana iamna sika asat anlō kēng ti hi nei riat sua ani na.
Hasik han dān sin thō zī sika mīn asat ei anlō ni mak,
tenchu iamna sika asat anlō ei ni sika han koinīm Krista Isuana nei iam ani zei.
Asik chu miring tukareng dān azui zit sika asat anlō thei mak mena.
17 Kristana asat anlō ranga na pūt lāi hin mi salui nei anlō hi anthiang vanga anlanga.
Tenchu hava sika han Krista chu āsiat dorbōndompu mo nei manlō rang ani zei?
Ni pial mak.
18 Asik chu koiin kei masiāta kei pei sua ha athara ka manding rēt ten,
ka ninga dān ansial anlō chang ka ting.
19 Pathian sika kei dam theina ranga dān dēn lehan dān sika āthī kēng ka ni zei.
20 Krista bila krosa antār kēng ka ni zei.
Adama kei om hi koi ni lāi makung,
tenchu Krista kēng koia hin adam ani zei.
Atuna taksana kei dam hi Pathian nāi pasal iamna sika dam ka ni na.
Asik chu amān ei na dita ka rathūla ei hong anpēk ani na.
21 Pathian lungkhamna chu pei manchang makung.
Dikna chu dān sika a om nisela chu Krista ei hong thī ha akorong ani na!”