Iamna sika sandamna
3
1 O Galatia rama āmo ngāi!
Chongtak nei iam u nōkna ranga tu mo nangni ngāi anānthēm u?
Isua Krista krosa ei antār rui ha na mit makung u na anthiang vanga anzara a om zei hale!
2 Hiva duai hi na kōm u nāta ariat ranga kei zōt chu:
Dān sin thō sika mo Ratha Ānthiang nei chang u,
ole nei rangāia nei iam u sika mo?
3 Hadōr pei mo āmo na ni u zei?
Ratha lama nei phut u na atun ahekna ranga taksa lama mo nei pan u ani zei?
4 Hava ha akorong ngal chang sela hadōr pei mo akorong ranga antak nei tiar u?
5 Na kōm u na Ratha ana pēkpu u le na kār u na tichang abui sin athōpūn dān sin thōtheina lehan ei thō sika ni mak,
tenchu chong nei rangāia nei iam u sika kēng asat ei na manlō u.
6 Havan tin han “Abrahamin Pathian a iama,
hatuka hava iamna ha ama ranga ādik ati na ei anbe ani na,”
(Anp. 15:6 )
ati na.
7 Hasik han iamnana a om ngāi kēng Abraham nāi ei chang ti ha re u ro.
8 Māna Pathian Lekhabūna han,
Pathianin iamna sika nam atei ngāi rang adik ei manlō rang ti ha Abraham kōma apha mān āta thang ahuiin alei hong ril ang taka:
“Nang āta hin nam tin bōrsāng tung inti,”
ati na.
9 Hasika han iamnana a om ngāi dōra chu aiam mi Abraham abila bōrsāng tung inti.
10 Dān sin thō thunuaia a om ngāi dōra khomāk thunuaia a om ei ni u sika Pathian Lekhana anziak anga:
“Dānbuna anziak ngāi dōra anga āzī rang ati na aloma zī lui mi chu khomāk atung kēng,”
(Dān.27:26 )
ti ani na.
11 Hanūk rēt chu tukareng Pathian mit muna dān akip sika adik anlō ngāi mak,
“Asik chu iamna lehan mi dik chu dam inti,”
(Hab.2:4 )
ti ha anthiang vanga anlang ani na.
12 Dān chu iamna nāta ahong asuak ni mak.
Tenchu:
“Tukareng hava ngāi āzī tak pei chu hava ngāi le dēn han dam inti.”
(Lev.18:5 )
13 Krista chu koini na sika khomāk atunga a om lāi han khomāk atung dān āta man lehan ei ratan ani na.
Asik chu Pathian Lekhabūna anziak anga:
“Thingsia chunga antār chu khomāk atung kēng,”
(Dān.21:23 )
ti ani na.
14 Hasika han Abraham akōma bōrsāng atung ha Krista Isuana nam atei ngāiin ei madōm u na rang ani na,
hanūk chu koinīm iamna lehan chongantin Ratha ha nei man theina rang
ani na.
Anthūl ngāi lui chong antin rui
15 Unāi ngāi,
hiva hi miring omdān amanga ankhīna chong kēng kei ril.
Miring kār āta chong ngal nisela chong antina dān ankhit sua aniten tutēn hava ha athūl thei om lāi mak,
chong atei um itē ansap thei lāi mak.
16 Atuna hiva chongtin ngāi dōra hi Abraham le ama achithāk ha kēng ei derdīn ani na.
“Nang na chi ātampa nāta ti mak,”
tenchu miring khat dak ei derdīna kēng:
“Nang na chi nāta,”
kēng ei ti na.
Hava achithāk angkhat dak ha ani zei Krista ani na.
17 Hiva kei ti na asik chu:
Krista sika Pathianin mānlāi āta dān ankhit chu alei hong man om sua ei ni sika kum raza manli le kum sōm anthum atheng suanām dān ankhit ahong ansin hān chong antin ei masiat thei nōkna ranga akorong hong manchang mak.
18 Dōng alua theina ranga ningneina hi dān sika ahong nisela chu chongtin sika ahong ni pial lāi nō ni.
Tenchu Pathianin Abraham kōma kēng achong ei tin ani na.
Dān ei hong omna
19 Hanle isik mo dān hi ei la hong om chian?
Āsia thōna ei hong suak sika,
achongtina ei pēk achithākpu ahong atung māsenga anmang ranga Pathianin dān chu ei hong man om ani na.
Hava ha vānpalāi ngāi amanga alāia mi khat kuta ei hong pēk ani na.
20 Mi khat dak rang sika tutē alāia palāi chang thei ngāi mak,
tenchu Pathian angkhat dak rong kēng athei.
21 Hanle dān hi Pathian chongtin ngāi lehin ankal mo ani zei?
Ni pial mak.
Asik chu dān angkhat dak hi damna apēk ving thei nisela dikna chu dān sika ahong asuak ei chang rang ani na.
22 Tenchu Isua Kristana iamna sika han hava Pathian chongtin ha aiam ngāi rong kōma ei pēk theina ranga Pathian Lekhabūna chongin miring dōra alom peia āsia ningneina thuaia ei siak kēng ani zei.
Iamna ei lian zia chu
23 Tenchu iamna ahong asuaka,
ha iamna ha ahong anlang mān kār pei chu dānin ei na khita a om na ni na,
dānin ei na runga ei na hual ani na.
24 Iamna sika adik nei anlō theia,
Krista tianga ei na maruai theina ranga dān chu koini ana rungpu anī na.
25 Atun chu iamna ei hong suak sika hin ana ruaipu thuaia om lāi mak me.
Iamna sika
Pathian nāi changna
26 Hava sika han Krista Isuana iamna sika na lom u na Pathian nāi kēng na ni u zei.
27 Na lom u na Krista sika baptisma alāk ngāi dōra chu Kristana anthuam kēng na ni u zei.
28 Jihudi mi le Grik mi,
suak le suak nōk,
hanūk pasal le nupang um ei teina itē om lāi mak,
asik chu Krista Isuana na lom u na angkhat kēng na ni u zei.
29 Krista ta nei ni u sika han Abraham achi na ni u zei,
hatuka chongtin ang taka dōng aluapu na ni u na.