1
1 Koi Paul,
Pathian zōt anga Krista Isua kuitīrin Ephesi khuana mīnthiang ngāi le Krista Isuana aiamrua ngāi ranga kei maziak .
2 Pathian koini na Pa le Puma Isua Krista lungkhamna le phūkdāina na kōm u na om rase.
Kristana ratha
lama bōrsāng ngāi
3 Pathian le koini na Puma Isua Krista Pa chu anpāka om rase.
Amān Kristana chungvān muna ratha bōrsāng dōra le bōrsāng ei na pēk.
4 Amān maniapūr ansin mān āta Pathian makunga anditna le manubuia ei na manlang theina ranga Krista zāra ei na thang ani na.
5 Ama ei nuam ang le ei zōt anga Isua Krista zāra anāia ana pom ranga aphāmān āta ana lei ruatsa na ni na.
6 Alungkham lianna ei anpāk theina ranga ei maditpu zāra alungkhamna chu manbuia ei na pēk.
7 Pathian alungkhamna ei tamzia anga ama thisen zāra koinīn ratanna le dān anrakān nāta andualna nei man ani na.
8 Alom peia hianna le riatna tin lehan alungkhamna chu ātam sabaka ei na pēk ani na.
9 Asik chu amān asat ei mandon ang taka aphāmān āta amalung derdīn anga akōma amalung vonga chong maruk anthup chu koini na kōma ei na manriat ani na.
10 Alom peia chungvān le maniapūra om ngāi dōra hi Krista thunuaia ei siak zit theina ranga ahunbi ahong akipa dorbōndom ranga amalung vong anga chong maruk anthup chu ei hong manriat theina rang ani na.
11 Ama amalung vong anga alom peia athō na amalung derdīna ei mansūk anga koini hi aphāmān āta ana lei ruatsa na ni na.
Havan tin han Krista zāra alom peia dōngaluapui nei hong chang thei ani zei.
12 Asik chu koini Krista chunga ansabeina dōn mānsa ngāi amanga Pathian lianna ei anpāk theina rang anthang na ani na.
13 Nangnīm hava chongtak chong,
na sandam u na thang ahui chong ha nei rangāi u na Kristana aiam nei hong ni u ani na.
Hatuka nei iam u sika chong antina Ratha Ānthianga sīlmōr anzēm sua kēng na ni u zei.
14 Hava Ratha ha Pathian lianna ei anpāk na ranga amān ei na rachōka ei ratanna rang dōngluapui man ankhāpna ani na.
Rāisān chong
rilna le bōrzongna
15 Nangni ngāi bila han Puma Isua chunga nei iam u na le mīnthiang ngāi dōra chunga anditna nei dōn u ha ka lei riata.
16 Han tin han koi um nisela ka bōrzongna bila hin na raming u ngāi chip aril mong luia rāisān chong nangni ngāi sika ka mantung chachak.
17 Koini na Puma Isua Krista Pathian,
Anlianna Pa chu nangnīn nei riat riam thei u na hianna le anlārna Ratha chu ei na pēk thei u na ranga bōr kei na zong pe u chachak ani na.
18 Amān ei na pāi u na ansabei,
mīnthiang ngāi anlianna bila dōng aluapui achang ranga ei na pāi zia u nei riat thei u na rang na malung mit ei na manvār pe theina ranga bōr kei na zong pe u ani na.
19 Hanūk chu koini aiam ngāi na tak chunga thōtheina ankhīna bui ei rātnazia nangnīn nei riat thei u na rang kei zong chachak ani na.
Hava thōtheina ha ama kōma om ranak rātna lehan ei thō ani na.
20 Hava thōtheina ranak ha Krista tak chunga ei manga athī ngāi bil āta ei hong mathui ani na.
Hatuka chungvān rama han achang tianga ei mansut ani na.
21 Alom pei chunga ruirilna,
ningneina,
thōtheina le anlalna ngāi dōra le hiva huna le nangkan huna raming dōra alānphua rang tin chunga ansāng khīta ei siak ani na.