Chibai thōna
1
1 Koini Paul le Timothi,
Isua Krista suak ngāi hīn,
Krista Isuana minthiang Philippi khuana a om ngai dōra kōma,
kuibing upa le dorbōndom ngāi kōma koinīn nei maziak:
2 Pathian koini na Pa le Puma Isua Krista lungkhamna le phūkdāina na kōm u na om rase.
Paul arāisānna le abōrzongna
3 Na rang u bōr ka zong le ka na mandon u kip pei,
na raming u aril chunga ka Pathian kōma raisānna ka mantung chachaka.
4 Na lom u ranga bōr ka zong kip pei rāisān taka kei na zong pe u chachak ani na.
5 Thang ahuia nei anlopna sin na phut nikhua len āta atun ten pei nei la dōntit u sika rāisānna ka mantunga.
6 Na malung sūng u na om āsa aphutpu hān Krista Isua ei hong rang ten peia ei na manzui u rang ti hi kei anngam sabak ani na.
7 Na lom u ranga nangni na ruia havan tin han mandon kei chōi rang ngal ha ka ranga adik ani na,
asik chu ka malunga a om chian kēng na ni u.
Kei ankhumna lama,
thang ahui arung lama,
thang ahui aril lama ka chong ril ankhir le adettita kei dōnna lama Pathian lungkhamna anānsempui ngāi na ni u na.
8 Krista Isuana malāi rīnkeipui lungkhamna sika na lom u na ana mu u ranga kei na rangāi u hi Pathianin anariata.
9 Na lungkham mu u na chu riatna kip le malung vārna tin lehan ei ansōn riama ei pungtir theina rangām kei zong chachak ani na.
10 Hatuka Krista nikhua ten peia ataktaka le masial abuia nei om thei u na rang han āsa khīt ngāi chu thiarthāk theina dōn un na ti.
11 Pathian lianna le anpākna ranga Krista Isuana dikna mara lehan abita om u ro.
Paul ei ankhumna thang
ahui anthekna achang
12 Unāi ngāi,
atuna ka tak chunga hiva zāt rui ei suak sika hin thang ahui anrilna lama maton lam ansōnna achang viak zei ti hi kei na manthei zōt u ani na.
13 Hatuka kei ankhitna rui hi Rēng zahuala sipai ngāi le mi tei ngāi kōmām ni rase Krista sika kēng ti ha anthiang vanga anlang zeia.
14 Hatuka ankhita kei om sika hin unāi ngāi bila mi tamin chu Pumana lungngamna adōn u na,
anchina buia Pathian chongrilna lama arāng riam u na.
15 Hanum nisela senkhat chu khāmaret le an-ēng chunga,
senkhat chu mandon āsa chōi chunga āril um a om dēna.
16 Hiva mān beta ngāi chu arang u duai manna ranga Krista thang ahui aril u ani na,
ataka āril ni u mak.
Tenchu kei ankhitna hi ei antak riam theina ranga mandon achōi chunga āril u ani na.
17 Tenchu hiva nūk beta ngāi hi chu thang ahui sika Pathianin ei na siak ngal kēng ka ni ti ha ei riat u sika lungkhamna dōn chunga āril ani u na.
18 Hanle imo ei ni rang ani zei?
Ani chu ni ta rase,
anhuanga mo ani,
chongtaka mo ani,
lampui tina Krista thang pei chu ei anril thei sika ka rāi asāna.
Ka rāi um ei la sān tir rang ala ni na.
19 Hanūk chu na bōr zong u sika Isua Krista Ratha zāra sanna kei man le kēng kei zōk ti hi kān riata.
20 Asik chu itē rēnga hin anzakna mu nō ning ti hi achālaka kei iam le kei sabei ani na.
Tenchu ngamna tampa kei dōn babang anga atun um dōn riam ka ti hi kei sabei ani na.
Hava ha adama mo ka om,
athīna mo ka om,
angkhat peia ni rase ka taksana Krista chu kei mansāng theina ranga.
21 Asik chu damna hi ka ranga Krista,
thīna hi ka ranga manna ani na.
22 Tenchu thisen le taksana kei la dam hi ka sin thōna mara achang aniten,
hava bila hova tak mo kei thang rang ani zei,
ti thei lāi makung.
Damna mo thīna mo?
23 Asik chu ka matona lampui anni hīn ana pūt a om ti ka riata.
Tenchu Krista bila avaom ranga anthānna adōn rang hi kei phām ual ani zei,
asik chu hava ha ka ranga asa ual ani na.
24 Tenchu thisen le taksana kei la om rang hi nangni ranga ala nāng sabaka.
25 Tenchu nangni ngāi kāra kei la oma,
iamna tianga nei ansōn u na rang le na rāi ei sān thei u na ranga adama kei la om rang chu anāng ti hi anriatna kei dōn ani na.
26 Hasika han nangni na kār u na kei la hong kīr rēt thei sika hin Isua Kristana na rāisān u na chu aliama ei om ani na.
27 Hasika han Krista thang ahui le om dān anmīl le pei han om thō u ro.
Hatuka na kōm u na ka honga ka na hong mu u mo,
ole na kār u na ka hong mo,
hong makung mo,
nangnīn ratha mun khata andingtit u ro.
Hanūk chu thang ahui iamna sika malung mun khata le anruala mā na chum u ati na rong hi riat rong.
28 Hatuka nangni ana dui ngāi matona alakte ngal ratha tākna dōn u mak chena.
Havan tin han nei om u ha amāni ranga anpeina,
tenchu nangni ranga sandamna ani ti ha ei andangna ani na.
Tenchu hava ngāi ha Pathian āta zit kēng.
29 Asik chu ama rong nei iam u ranga Krista sika Pathianin alungkhamna ei na pēk ni u mak,
tenchu ama sikām abila antak nei tiar u rang ani na.
30 Anduia ma kei chum nei na mu u anga,
atun um anduinana ma kei la chum hi na riat u na.
Havan tin ang han nangnīm thō u ro.