Nu pa le nāi ngāi
6
1 Nāi ngāi,
Pumana na nu le na pa hē tel u ro.
Asik chu hava ha ādik kēng.
2 Asik chu:
“Na nu le na pa lalchi thō ro,”
(Ant.20:12 )
ti hi chongpēk mānsa bila chongtin angkhat ani na.
3 “Havan tin han na om ten na ranga satna om inti.
Hanūk chu maniapūra nei damna sōt inti,”
(Dān.5:16 )
ati na.
4 Pa ngāi,
na nāi u ngāi hi atak mansi u nō ro.
Tenchu Pumana ānsep le ankōkna lama manlian mansei u ro.
Suak le apuma
5 Suak ngāi,
Krista ranga malung anzīk taka ahē nei tel u anga taksana na puma u ngāi hē chu anchi le anchūna ahē tel u ro.
6 Miringin ei zōtna rang duaia mi mit mu ranga dorbōndom ni luia.
Tenchu Krista suak anga na malung dōra lehan Pathian zōt dān zī u ro.
7 Asik chu miring dorbōndom ni u mak che,
tenchu Puma dorbōndom kēng na ni u ti anriat chunga na malung dōra lehan na puma dorbo adom u ro.
8 Asik chu suak mo ani suak nōk mo ani,
tukareng sin āsa thō tak chu koini na Puma kōm āta rātpāk ei man rang ti ha re u ro.
9 Apuma ngāi,
havan tin dēn han amāni chungām thō u ro,
rathatākna pe u nō ro.
Asik chu amāni le nangni nanīn u na Puma chu chungvāna om ani na,
amān mandangna dōn mak ti re u ro.
Pathian rāl raliang ngāi
10 Ahek tianga unāi ngāi,
Pumana le ei rātna ranak lehan arāta om u ro.
11 Soitān anthēmna tin matona nei anding thei u na ranga Pathian rāl raliang ngāi dōra lehan anthuam u ro.
12 Asik chu koini nei anduipuina hi taksa le thisen neinuna ni mak,
tenchu anlalna dōn ngāi,
le ningneina dōn ngāi,
le hi maniapūra azīng kāra rēng ngāi le chungvān tianga raluai ngāi lehan andui kēng na ni.
13 Hasika han nikhua āsia ahong asuak tik na lei dui thei u na ranga Pathian rāl raliang ngāi dōra lehan anthuam u ro.
Hatuka nikhua ahek tikām andingtit thei un na ti.
14 Hava sika han chongtak kōngkhit lehan na kōng akhita,
dikna rōphuai chu na rōpa makhopa anding u ro.
15 Hanūk chu anngoina thang ahui rilna kekok chu na ke na buna anding u ro.
16 Hanūk chu hava ngāi khēla han,
iamna phochēng chu ālek u ro.
Asik chu hava lehan moi anga āsiatpu thal achuang ngāi dōra lei that thei un na ti.
17 Hanūk rēt chu sandamna lukhum le Ratha khendāi,
ha Pathian chong ha alek u ro.
18 Hankēng kongtina alom peia bōrzongna le niai athō chunga Rathāna bōr azong chiana om u ro.
Hava ngāi sika han ahian chunga alom peia dūk adiara aloma mīnthiang ngāi dōra ranga bōrzong u ro.
19 Hatuka chong aril ranga ka mūr anlong tikle Pathianin chong ril theina ei na pēk theina rangām na zong pui u ro.
20 Asik chu hiva thang ahui aril sika zīngzir le ankhit ka ni nām palāi dorbō kei la dom chian ala ni na.
Hava thang ahui chong maruk ha angam sabaka kei ril rang anga arānga kei ril theina ranga bōr na zong pe u ro.
Chongbe hekna
21 Tenchu atun taka ka dingmun le ka omdān hi nangnīm riat thei u tānla kei na zōt u ani na.
Hasik han ka parual madit le Pumana aiamrua dorbōndompu Tukhik hān aloma na manthei zit u bō ni.
22 Hasik pial han ama hi na kōm u na kei hong tīr ani na.
Hantin han nangnīn koini ngāi na rui na lei riat u na amān na malung u ei na manhar rēt thei u na ranga kei hong tīr ani na.