5
1 Hasik han nāi andittak anga Pathian omdān lāk u ro.
2 Kristān ei na dita koini ranga marim hui anbōlna ranga Pathian kōma dāli anpēk anga nangnīm anditna lehan kal chōi u ro.
3 Tenchu na kār u nāta hurna ngalna tin,
annim tin le huat anhamna tin anril ngal lāi nō rase.
Asik chu hava ngāi ha mīnthiang ngāi arua ni mak.
4 Hanūk
chu omdān anhui lui,
chong porchonok,
āmo chongril,
ēlsēl chong ngāi suak nō rase.
Asik chu hava ngāi ha mīnthiang ngāi ranga anhui lui ani na.
Tenchu hava ngāi nēk ten,
nangnīn rāi ansān chong ngāi ha ril u chachak ro.
5 Asik chu hiva ngāi hi nangnīn anthiang vanga nei riat u ani na:
Hurna adōn ngāi,
annim tin athō ngāi le huat anham ngāi chu Krista le Pathian lalna rama ei lua u rang itē om nō ni.
Asik chu huat anhamna chu mi ramīl anmōk le anmun kēng.
6 Tutēn chong korong papei lehan na huang u nō rase.
Asik chu hava ngāi sika han hē tel nōk mi ngāi chunga Pathian taksitna chu ei hong chul ani na.
7 Hasika han amāni ngāi bila han anchel u nō ro.
8 Asik chu machin lāi han nangni ngāi hi āzīng om mi na ni u na.
Tenchu atun hin chu Pumana ra-ānga om mi na ni u zei,
ra-āng nāi ngāi anga om u ro.
9 Asik chu Ratha- mara ngāi chu satna tin,
dikna tin le chongtak tina ei hong anlang ani na.
10 Hantin han Pumān ei zōt hong mo ati na mansin u chachak ro.
11 Hanūk chu mara dōn lui azīng sin thō lehan anloppuina reng dōn u nō ro.
Hava nēk anten asa nōk ei thō ngāi ha rakōk u chachak ro.
12 Asik chu amānīn maruka sin ei thō u ngāi ha aril ngal anzakna om ani na.
13 Tenchu ra-āngin ei hong puang ngāi dōra chu ei hong rakōkna kiar ani na.
Asik chu alom peia ahong anlang zit rang chu ra-āng hi kēng.
14 Hasika han:
“O nang a inpa,
insang la ta ro,
Āthi nāta anthui ta ro,
Hankēng Kristān na chunga ei
na hong ēl rang.”
ti ani na.
15 Hasika han hontin mo kal nei chōi u ha asa dima anrēng u ro.
Mi āmo anga ni mak tenchu mi hian anga kal chōi u ro.
16 Asik chu nikhua ngāi hi asa nōk ei ni sika hin hun asa chu rachōk u ro.
17 Hasika han riatna dōn lui anga om u nō tānla,
tenchu Puma ei zōt dān ha riat thei u ro.
18 Hatuka zu anri anhāinana om u nō ro.
Asik chu hava han anrēng thei nōkna a om.
Tenchu Rathāna abita om u ro.
19 Hatuka anpākna la,
Pathian biakna la le ratha lama la ngāi lehan nangni le nangni ngāi chong u chachak na ro.
Hanūk chu Puma sika han na malung u na anpākna la le maring ahui thō u chachak ro.
20 Hatuka koini na Puma Isua Krista raminga Pa Pathian kōma alom pei sika rāisānna chong ril chian u ro.
21 Pathian anchi chunga nangni le nangni lalchi anthō u ro.
Kristian sūngkua
22 Inneisua nupang ngāi,
Puma kōma anga,
na ruathar u ngāi chip rachama anpe u ro.
23 Asik chu Krista kuibing lu ei ni anga pasal hi anungāk lu ani na.
Hatuka Krista chu hava ataksa sandampu ani na.
24 Hasika han kuibing chu Krista rachama ei anpēk anga han inneisua nupang ngāi um alom peia aruathar u ngāi chip rachama anpe u rase.
25 Pasal ngāi,
na nungāk u ngāi chip hi madit u ro,
Kristān kuibing ei madita ama ranga ei anphal ang han.
26 Hankēng amān achong lehan tīna ei man buala ei na rasūk,
asik chu anthiang vanga ei na siak theina ranga.
27 Hanūk kuibing chu khel lui,
anchur lui le hava ang annim neinun itē reng kop luia anthiang vang,
hanūk demna abuia a kuibing chu ama makunga anlian chunga ei manlang theina ranga ei manthiang ani na.
28 Havan tin dēn han pasal um nisela anungāk chu ataksa kēng ati na ei madit rang anāng kēng.
Ani tataka,
anungāk andit chu ama aninga andit ti na ani na.
29 Tutēn aninga ataksa hi anmumāk om ngāi mak a.
Tenchu hava ha amān ei kiavonga ei vūr kēng.
Havan tin dēn han Pumān akuibing tak chunga ei vūr ani na.
30 Asik chu koini ngāi hi ama ataksa,
apum,
aruna apēng ngāi chu na ni.
31 “Hasik han pasalin anu le apa māka anungāk tianga kop inti.
Hatuka amāni anni ha taksa pumkhat chang unti.”
(Anp.2:24 )