Krista taksana
pumkhat changna
4
1 Hasika han koi Puma sika ankhita om hin kei na mathēm u ani zei,
Pathian pāina nei man u arua anga om u ro.
2 Hava sika han om annuaina le phūkdāina le dūkdiarna adōn chunga,
anditna lehan dārkham ansak u chachak ro.
3 Anngoina rīrual lehan ankhita Ratha pumkhat changna chu arungtit ranga na tep mannēl u ro.
4 Nangni nei anpāi u na hi ansabeina angkhat ei ni anga taksa angkhat le Ratha angkhat ani na.
5 Puma angkhat,
iamna angkhat le baptisma angkhat ani na.
6 Pathian angkhat le mi dōra Pa ani na.
Ama chu alom pei chunga om,
alom pei kāra om le alom peia nangni ngāi kāra om ani na.
7 Tenchu Krista alungkhamna ei na sem ang chipa koini kōma alungkhamna ei na pēk chip ani na.
8 Asik chu ānziak anga:
“Ama chu chungvān tianga
akal lāi han,
Mi ankhita om ngāi dōra amān
avaruaia,
Miring ngāi kōma bōrsāng
ahong pēka.”
(Sām 68:18 )
9 “Ama chu chungvāna akala,”
hiva ei ti hi imo?
Hava ti na omzia chu,
ama chu phil mun annuai ngāia avachum ti na ani na.
10 Avachumpu ngēt ha chungvān mun ansāng ngāi nēka ansānga avakala,
amān alom pumpui ei manbit theina ranga.
11 Amān senkhat kōma kuitīr ngāi ranga,
senkhat kōma deari ngāi ranga,
senkhat kōma thang ahui arilpu ranga,
senkhat kōma pastor ranga le mīnchūpu ngāi ranga bōr ngāi apēk chipa.
12 Asik chu mīnthiang ngāi akipa ei manzui theina ranga,
dorbōndomna sin athō tir ranga le Krista taksa ei andinga ei ansōn theina ei pēk chip ani na.
13 Hanūk chu iamna tianga angkhat changna le Pathian Nāi Pasal ruia riatna lehan pui nei ting Krista ei kipna lehan kipna na suak māseng ranga ei na pēk ani na.
14 Hantin han koini ngāi chu nāite sender anga om thō u lāi nō rei.
Miring hianna le anhuangna chong amanga anhuangna dik lui chāngtena ankhit ranga,
tī duarin ei sok anga anchūna thīnthi tin rēngin na zāp lāi nō rase.
15 Tenchu anditna dōn chunga chongtak chong arila alom peia ama lehan puiting lama ansōna om thei inti.
Asik chu Ama ha alu ani na.
Hatuka hava tak ha Krista ani na.
16 Ama zāra kēng taksa pumpuia ansūkthapa anzoma taksa le apēng ngāi dōra amun chipa ei makhopa sīng ei mansa thei anga anditna lehan ama ataksa chu puitinga ei na sin ani na.
Ra-āng nāi anga alēng dān
17 Hasika han hiva hi kei na ril u le Pumana chong kei na pēk babang u chu:
Nam atei atei ngāi akoronga andonna ei dōn u anga om u lāi nō ro.
18 Amāni malung mit ei chō pe u na amalung u ei ankhir sika,
hanūk chu ei riat u na ei zīng sika Pathian damna nāta
ei ankhāi u ani na.
Asik chu amānīn ei riat u nōk sika ani na.
19 Amānīn anzak riatna ei dōn u nōk sika alom peia ningōlna heklui hurna annim tin athō ranga phal taka ei anpēk u ani na.
20 Tenchu nangnīn chu Krista nāta havan tin anchūna man u mak che na.
21 Kristana chongtak a om anga nangnīn achong anngāia akōm āta anchūna na man ngēt u zei.
22 Hava ha hiva hi ani na:
Tian lāia om dān maruana na mi marua u ngāi ningōlna asia tin anān thō u ranga anhuangna na mi marua ha kheka pei u ro.
23 Na sūngrīl u na malung ratha lehan athara om u ro.
24 Dikna le ānthiangna tak lehan Pathian anga aphua miring athar ansin ha makhop u tānla atiang u ro.
25 Hasika han milak chong aril ha māk u tānla,
na inkōlmi ngāi kōma chongtak chong ril chip u ro.
Asik chu na loma hin abāksem ngāi kiar kēng na ni.
26 “Na tak asi lehan āsia thōpui nō ro.
Na taksit ei lum ha nikhua manbuipui nō ro.”
(Sām 4:4 )
27 Hanūk chu soitān ranga mun pe nō ro.
28 Marusa thō hān anru lāi nō rase.
Hanēk anten abui ngāi kōma hongte mo ei pēk theina ranga akut ngēt lehan sin āsa thō ranga pōng rase.
29 Na mūr u nāta chong sa nōk ngāi dōra masuak pial u lāi nō ro.
Tenchu mi tei ngāi ei ansōn tir thei u na ranga ei nāng u anga chong asa rong suak rase.
Na chong alei anngāi ngāi ranga ei satpui thei u na ranga.
30 Pathian Ratha Ānthiang chu manngūi nō ro.
Asik chu ama zāra kēng ratanna nikhua tika ranga sīlmōr anzēm sua kēng na ni.
31 Ākhana,
taksitna,
malung alum,
āsang arāt,
mi siat aril le khamaret thōna malung dōra na kōm u nāta pei u ro.
32 Nangni le nangni malung annēm dōn u tānla,
lungkham anmu u ro.
Pathianin Kristana nangni ngāi ei na madual u anga nangnīm andual u ro.