Jentail ngāi kāra
Paul asinthō rui
3
1 Hiva sika hin koi Paul,
nangni Jentail nam ngāi ranga Krista Isua sika ankhit ka ni na.
2 Nangni ngāi ranga Pathian alungkhamna dorbōndom ranga ka kōma puak arik ei na pēk rui ha nangni satna ranga ani ti hi na riat u na.
3 Hava ha anrālna lehan ka kōma achong anthup ha ei hong manlang ani na.
Hava rui ha māna han abongtena lekhana ka na hong maziak u zei.
4 Hava lekhabu ha na pore u tikle Krista ruia chong anthup kei hong riat theina chu riat thei u na ti.
5 Hava chong anthup rui ha atun tak huna kuitīr ānthiang ngāi le deari anthiang ngāi kōma Ratha Ānthiangin ei hong manlang anga tian lāi chu akhūk akhūka miring nāi kōma hong anlang mak a.
6 Hava chong anthup rui ha hiva hi ani.
Thang ahui sika han Getel nam ngāiin Israel ngāi bila mun khata dōng aluapui thei,
taksa angkhat āta pumkhat herkhat achang,
Kristana chongtin achangpui thei ani u zei.
7 Pathianin asin thōtheina ranak lehan alungkhamna bōr ei na pēk anga hava bōr pēkna zāra hiva thang ahui dorbōndom sin hi kei hong chang ani na.
8 Koi hi aloma mi ānthiang ngāi dōra bila anthuai khīt nēka anthuai khīt ka ni na.
Ka kōmām nisela alungkhamna ei na hong pēk ani na,
Tutēn sūtsua thei lui Krista ei anchongna rui chu Jentail nam ngāi kōma thang ahui aril ranga alungkhamna hi ei na pēk ani na.
9 Asik chu hava chong anthupa anlopna chu mi tin
kōma ei manriat theina ranga alungkhamna ei na pēk.
Hava ha Isua Krista sika alom peia asinpu Pathian kōma han tian lāia leilung ansiang len āta anthupa om chian ani na.
10 Tenchu atun chu amān kuibing amanga chungvān mun ansānga om alom peia ruirilna ngāi,
ningneina dōn ngāi kōma Pathian hianna tin dōra anriat rang hi aderdīn ani na.
11 Hava ha tāituan tāituana aderdīn ha koini na Puma Krista Isuana amān ei hong mansūk ani na.
12 Hatuka Krista Isuana a om chunga,
iamna sika anngamna adōn chunga,
anchīna buia Pathian kōma avapan theina racham nei man ani na.
13 Hasika han hivan tin hin kei na mathēm u,
nangni ngāi ranga antakna tin dōra kei tiar hi na dok manchuai u nō ro.
Asik chu hava ha nangni ngāi ranga nei anlian u na ani na.
Ephesi mi ngāi ranga
Paul abōrzongna
14 Hiva sika hin koini na Puma Isua Krista Pa makunga mankhūk ka bil chachak.
15 Chungvān tianga a om le hi maniapūra a om sūngkua pumpui dōra hi ama kōm āta raming ahong anput kiar ani na.
16 Ama ei anlianna ei anchongzia anga ama Ratha zāra na sūngrīl u na om miring hān ranak adōna arāta ei om a nei rāt thei u na ranga bōr kei na zong pe u chachak ani na.
17 Hanūk chu iamna lehan Krista chu na malung sūng u na ei om theina rang le hanūk chu anditna lehan razung ei lāka nei anding thei u na ranga kei na zong pe u ani na.
18 Hatuka Kristān ei na madit u na chu hotuk mo adung le akhang,
ei ansāng le ei anthūkzia ha mīnthiang ngāi dōra lehan nangnīm riat zit thei u na ti.
19 Hatuka chu Kristān riat phasam anditna lehan ei na madit u na chu nei riat thei u na aloma Pathian ei kipna lehan akipa om u ro.