Kristana damna ahong achang
2
1 Mānlāi han nangnīm masial nei thō u ngāi le āsia nei thō u ngāi sika nei thī u nāta ana hong mandam u na.
2 Mān lāi han atuna hi ramual omdān anga hava ngāia nei lēng u ani na.
Anvāna ningneina adōn ruirilpūn ei na maruaia nei lēng u.
Hava ratha hān atuna huna hē tel lui nāi ngāi chunga achak sabaka āsia ningōlna lehan sin ei thō ani na.
3 Hava ngāi bila han koini ngāi dōrām mān lāi chu koini na taksa ningōlna anga nei lēng ani na.
Havan tin han na taksa le na malung ningōlna ngāi nei vāia,
mi atei ngāi anga koinīm taksitna tungna nāi nei chang ani na.
4 Tenchu Pathian chu ami riangvāi muna lehan abit ani na.
Asik chu amān ei na ditna ei lian sabak sika amān ei na dit ani na.
5 Hava ha amān ei na ditna lehan ei na mathuia masial sika athī sua na ni nām Krista bila ei na hong mandam ani na.
Hava ha alungkhamna sika sandam kēng na ni u.
6 Hatuka chu Pathianin Krista Isuana vānram muna ama bila mun khata ei na mansut ani na.
7 Hun ala honga suak rang tika ankhīna bui ami lungkham muna abit chu ei manlang theina ranga Krista Isuana ama ei satna chu ei hong manlang ani na.
8 Asik chu alungkhamna zāra iamna sika nangnīn sandamna nei man u.
Hava ha nangni nāta ni mak,
tenchu hava ha Pathian neinun pēk kēng.
9 Hanūk chu hava ha sin thō mara ni mak,
tukarengin chongpāk ansal ei neipui nōkna ranga.
10 Asik chu koini hi Pathian akut suak kiar na ni na.
Sin āsa tin rēng athō ranga Krista Isuana amān ei na sin na ni na.
Hatuka koini hi sin āsa athōna a om ranga Pathianin aphamān len āta alei ruatsa na
ni na.
Kristana pumkhat changna
11 Hasika han hiva hi retit u ro,
asik chu māi lāi han nangni ngāi hi taksa lama chu Jentail nama anzir na ni u na.
Hanūk chu serantan mi na ni anti ngāi kōma,
serantan lui mi ngāi anti na ni u na.
Serantan ti na chu miring akut lehan pasal ser ei tan ti na ani na.
12 Hava hun lāi han nangni ngāi hi Krista nāta ankār na ni u na.
Israel nam ngāi bila tuallāi lēngna nāta ankhāi na ni u.
Chong antin suana dān ankhit athar bila khual le ansabeina dōn lui na ni u na.
Hanūk chu hi maniapūra Pathian dōn lui na ni u na.
13 Hanūk chu mān lāi han ankār na ni u na.
Tenchu atun chu,
Krista Isuana Pathianin Krista thisena ei na mandēp kēng na ni u zei.
14 Asik chu ama hi koini ngāi ranga anngoina ani na.
Anni ha amān angkhata ei hong sin ani na.
Koini na kongkāra anngoi nōkna bang a om ha ama ataksa lehan ei hong pei ani na.
15 Havan tin han anngoi nōkna ana sin dānbuna chongpēk anziak ngāi azī ranga thō rua dān ngāi ha ataksa lehan ei hong masiam ani na.
Nam anni achang ha ama sika miring athar khat ei sina anngoina ei hong masuak ani na.
16 Havan tin han Pathianin kros lehan koini nam anni achang ha taksa pumkhata ei na hong sin ani na.
Pathian le anngoi rētna ranga kros lehan anngoi nōkna ha ei hong that ani na.
17 Ama chu ei honga hin nangni alāna om ngāi kōma phūkdāina thang ahui ei hong ril.
Hanūk chu anāia a om ngāi kōmām phūkdāina thang ahui ei hong ril ani na.
18 Asik chu ama zāra han koini nam anni achanga nei om hi Ratha angkhat lehan Pa kōma nei valūt theina ani na.
19 Hasika han nangni hi ram ateia khual le omna mun adet dōn lui mi ni u lāi mak che.
Tenchu mi ānthiang ngāi bila tuallāi alēngpui le Pathian insūngkua mi kēng na ni u zei.
20 Kuitīr ngāi le deari ngāi lungphūmna chunga anding kēng na ni u na.
Hava akila lungpui chu Krista Isua ngēt ha ani na.
21 Kristana in pumpui ha anruala ei mansūka ei makhopa Pumana biak in ānthiang achang ranga ei manding ani na.
22 Nangnīm Ratha zāra Pathian omna in ānthiang nei chang thei u na ranga ama lehan anruala ei mansūka anding na ni u na.