1
1 Paul,
Pathian zōt dān anga Krista Isua kuitīr le na parual Timothi hīn,
2 Kolossa khuana Kristana mīnthiang ngāi le unāi aiam ngāi kōma nei maziak:
Koini na Pa Pathian le Puma Isua Krista lungkhamna le phūkdāina chu na kōm u na om rase.
Rāisān chong
rilna le bōrzongna
3 Nangni ngāi ranga bōr nei zong babanga hin,
Pathian,
koini na Puma Isua Krista Pa kōma rāisān chong na ril chachaka.
4 Asik chu Krista Isuana nei iam u na le mī ānthiang ngāi dōra ranga na mi madit u na rui ha koinīn na lei riata.
5 Hava iamna le anditna nei mangang u chu vānrama na rang u na alei ansiak sua ani zei.
Hava nei mangang u na rui ha mān āta thang ahui chongtak a om chong lehan na lei riat u ani na.
6 Hatuka hava thang ahui ha na kōm u na ahong atung zeia.
Hava ha Pathian alungkhamna na riat u nikhua nāta hanūk chu ataktak ei ni zia na riat u len āta maniapūr pumpuia hava thang ahui ha ei anrana ei pung anga han nangni kōmām ei anrana ei pung ani zei.
7 Koini na suak changpui madit Epaphra kōm āta hava ruia anchūna man u zei ta ni.
Ama hi nangni na rathūla aiam rua Krista dorbōndom khat ani na.
8 Hanūk chu Ratha Ānthianga anditna na dōn u ti hām amān ana mantheia.
9 Hasika na thang nei riat nikhua nāta na rang u na bōr azong hi mong thak luia ratha lama hianna le riatna tina ama ei zōt dān anga aloma hianna tin lehan abita nei om thei u na ranga Pathian kōma nei zong ani na.
10 Kongtin peia Puma malung dō anga om anhui anga kal nei chōi thei u na ranga,
sin āsa tina nei anra thei u na ranga,
hanūk chu Pathian riatna akip lama nei ansōn riam thei u na ranga nei zong ani na.
11 Hatuka chu Pathian ei anlianna thōtheina amanga,
ranak tin asonga arāta om u tānla rāisānna lehan dūkdiarna dōra le adiar theina dōn u ro.
12 Hanūk rēt chu amān ra-āng rama mī ānthiang ngāi bila dōngaluapui theia ana sinpu Pa kōma rāisānna mantung u ro.
13 Asik chu amān azīng ruirilna nāta ei na sansuaka anāi pasal madit tak rama ei na ruai ani na.
14 Ama a thisen zara koinīn ratanna le āsia andualna nei man ani na.
Krista chu alom
peia atontīr khīt
15 Ama hi mu thei lui Pathian mēl aphuazek ani,
alom peia ansin mān āta anpiang mānsa ani.
16 Asik chu ama zāra kēng alom pei hi ansin zit:
chungvāna om le phila om,
mu thei le mu thei lui a om dōra,
reng chōmphāng mo ani,
thuneina adōn mo ani,
anlalna mo ani,
ningneina mo ani,
alom peia ama sika le ama ranga ansin zit ani na.
17 Ama hi alom pei a om mān āta a om,
hankēng amana han mun khata alom peia ei kopna chu ani na.
18 Ama hi taksa alu,
kuibing len alu ani na.
Ama hi anphutna ani,
ama chu alom pei chunga atontīr khīt ei ni theina ranga athī ngāi bila arapa mānsa ani na.
19 Asik chu ama tak chunga Pathian ei kipna dōra ei om rang hi Pathian amalung dō ani na.
20 Ama krosa thisena anngoina asina ama zāra han phila om le chungvāna om alom peia ama lehan ei hong manngoi rēt ani na.
21 Tian lāi han na om dān u ha āsia thō zōtna nei dōn u
sika han Pathian āta ankhāi le anduina malung adōn na ni u na.
22 Tenchu atun hin chu Krista ataksa ngēta ei thīna lehan,
ama makunga anthiang vanga itē manu bui le āsia anlōna buia ei na manlang thei u na ranga ei hong manngoi rēt ani zei.
23 Havan tin han iamna abul aphūma adettita nei anding u sika hin thang ahuia nei mangang u nāta ankhāi u nō ro.
Hava thang ahui ha nangnīn nei riat u ani na,
hava thang ahui tak ha anvān thuaia mun tina mi dōra kōma tāng anhāi ani zei.
Koi Paul ngēt hi,
hava thang ahui dorbōndompu ka ni zei.
Kuibing ranga Paul ei pōngna
24 Atun hin nangni ngāi ranga antakna kei tiara hin ka rāi asāna,
Kristān ama ataksa anga kuibing ranga antak ei tiarna ansam ha ka taksa ngēta hin ankhip ranga kei zōt.
25 Pathian chong,
ha akip le achanga kei ril theina ranga Pathianin ka kōma sin athō ranga puak ei na pēk anga han kuibing dorbōndompu kei chang ani zei.
26 Hava chongrīl anthup ha tāituan tāituana akhūk akhūka anthup ani na.
Tenchu atun hin chu hava ha amī ānthiang ngai kōma anlanga om zei.
27 Asik chu nam atei ngāi kāra hava chongrīl anthup ei liana ei anchong zia ha anriat ranga Pathianin mī ānthiang ngāi ei thang ani na.
Hava chongrīl anthup ha ani zei,
na kōm u na om Krista,
nei mangang anlianna chu ani na.
28 Hava rui ha koinīn nei ril ani na.
Asik chu mi dōra hi Krista Isuana anzuia nei manlang theina ranga mi tin kōma anrēngna chong le hianna tin rēnga nei manchū ani na.
29 Hiva sika hin ama aranak ka chunga sin aman thōna ama aranak rāt sabak lehan apōng le taksat sin kei thō ani na.