2
1 Asik chu nangni rang le Laodikei khuana om ngāi le taksana ka mēl la mu lui ngāi ranga ituk mo kei duia tak kei satzia ha nei riat u rang hi kei zōt ani na.
2 Asik chu amānīn malung anzoma anditna le malung anharna ei man u na,
hava ei anchongna ruia riatna akip amana Pa Pathian le Krista ei anchongna akip chu ei man thei u na ranga kei pōng ani na.
3 Ama kōma han alom peia hianna le riatna tin rēng rochon alu anthupa om ani na.
4 Nangni ngāi ha tutēn achong theina papei lehan ei na huang u nōkna ranga hiva chong hi kei na ril u ani zei.
5 Asik chu na kār u na taksana kan chel ngal nōkam rathāna chu na kār u na anchel ka ni na,
hanūk chu om anzēk vanga nei om u le Kristana iaman dettita nei om u ka mu na ka rāi asān.
Miring om dān āzī ni mak Krista om dān azīna kēng
6 Hasika han Krista Isua ngēt ha hontin mo Puma ati na nei pom u ha hava anga han kal chōi u ro.
7 Ama kōma han razung alāka adeta andingtita anchūna nei man u anga han iamnana anding u ro.
Hatuka rāisān chong aril chunga aliama om u ro.
8 En u ro,
Krista om dān ni luia miring om dān le hi maniapūr āta anchūna om dān atetei ngāi lehan tutēn miring hianna chong amanga akoronga anhuangna lehan ei na khit u nōkna ranga anrēng u ro.
9 Asik chu alom peia Pathian ei kipna chu Kristana ataksana ei om ani na.
10 Hatuka chu Kristana han nangnīn kipna chu nei man u ani na,
ama chu kongtin peia ruirilna tin le ningneina tin peia alu ani na.
11 Kristana serantan kēng na ni u,
miringa om āsia ningōlna chu apeia kuta serantan lui Kristana serantan kēng na ni u zei.
12 Baptisma lehan ama bila han anphūm kēng na ni u zei,
asik chu ama thīna nāta anthui thei Pathian thōtheina ranak iamna lehan ama bila anthui kēng na ni u zei.
13 Masial adōn chunga na taksa u na serantan lui chuchunga āthīna a om sua na ni u na,
tenchu Pathianin Krista bila ei na mandam rēt u ani na.
Koini nei masial ngāi dōra chu ei na madual pe kiar ani na.
14 Hanūk chu kuta anziak dān lekhabu koini ngāi ana duitit le ana luatit chu amachāi bianga krosa ei hēma ei pei ani na.
15 Hankēng ruirilna le ningneina ngāi chu akorong aman chang ha vāntāng mitmuna aman langa kros lehan amāni chunga ei rātna aman langa.
16 Hasika han nangni ngāi na chung u na asāk rui le anēk ruia,
khohui amang ruia,
thade aser ruia,
pōng ansa nikhua ser ruia tutēn rui na ril u nō rase.
17 Hiva ngāi dōra hi ei la hong om ranga aralīm ngāi duai kēng ala ni,
atak chu Krista rong a kēng ei om.
18 Tutēn om annuai om athō papei ngāi le vānpalāi abiak azōt ngāiin na rātpāk man u rang āta na huang u nō rase.
Asik chu hava ang miring chu anrālna ka man ati na achālaka anngampui le ataksa mandonna lehan akoronga anlianna dōn papei kēng.
Amāni chu ei mu u nōk amu ranga alūt zōt ani u na.
19 Hava ang mi chu lu le anzomna dōn lui ani na,
asik chu lu nāta kēng taksa pumpui ei ansōn,
rūnnui ngāi,
rathari ngai alom peia mun khata ei anzom ani na.
Havan tin han Pathianin um ei mansōn ani na.
20 Nangni ngāi hi maniapūr anthoka anchūna ngāi amāka Krista bila athī sua kēng na ni u zei hale,
hanle ichanga mo maniapūr a om mi ngāi anga dān tin rēng thuaia nei la om bang u?
21 Hava dān ngāi ani zei:
“Sūr nō ro,
tem nō ro,
tōn nō ro,”
ti ngāi ha ani na.
22 Hava dān ngāi ha miring kōm āta chong le anchūna asuak ei ni sika han mīn hava dān ha amang suale chu aheka anpei kēng.
23 Hiva dān ngāi hi miringin aninga ei nuam anga Pathian biakna,
om annuai om athō papei le ataksana dūk atiar ngāi hi ahian om a chu anlang na kām nisela taksa ningōlna antor thei rang khopa chu itē ei nemna om mak.