Nunchang ānthiang om dān
3
1 Krista bila anthui sua nei ni u sika han Pathian chang tianga Krista ei ansutna chung lam tianga rui ngāi han na malung siak u ro.
2 Chung lam tiang a om ngāi ruia na malung pe u ro,
ramuala a om ngāi ruia ni mak.
3 Asik chu athīna a om sua kēng na ni u zei hale,
hasika han nei dam u na ha Krista bila Pathiana anthupa a om kēng ani zei.
4 Ha koini nei damna Krista ha ahong anlang tika chu nangnīm ama ei anlianna bila anlianna lehan anliana anlang un na ti.
5 Hasika han ramuala a om na taksa bāksem ngāi dōra - hurna,
om annim,
azōl anthāi,
āsia ningōlna ngāi,
huat anhamna hiva hi ramīl anmōk le munkhat ani na,
hava ngāi dōra ha that zita pei u ro.
6 Hiva ngāi sika hin Pathian taksitna chu hē tel lui nāi ngāi chunga ei hong chul chachak ani na.
7 Nangnīm hava ngāi kāra na om u lāi han hava ngāi anga nei lēng u ani na.
8 Atun chu na kār u nāta taksitna,
malung alum,
khāmaret,
mi siat rilna,
chong annim ngāi dōra na mūr u nāta pei u ro.
9 Angkhatin angkhat kōma milak chong ril u lāi nō ro,
asik chu miring marua ha puan anga nei līka nei pei sua u kēng ani zei hale.
10 Tenchu miring athar ha kēng nei rasil ani u zei,
asik chu ama sinpu aphuazeka athara riatna kip adōn ranga anthar rētna aman sua kēng ani zei.
11 Hiva muna hin Grik le Jihudi serantan le serantan lui,
ram ateia nam le Skuthia,
suak le suak nōk itē ei teina om lāi mak,
tenchu alom pei chunga aloma chu Krista ani na.
12 Hasika han nangni ngāi hi Pathian ami thang,
ānthiang le ami madit tak nei ni u sika hin lung anpōngna malung,
lungkham donna,
om annuaina,
phukdāina,
malung diarna ngāi dōra lehan anthuam u ro.
13 Nangni le nangni ngāi dārkham ansak u ro.
Angkhat pei chunga ansualna na dōn u ten,
andual anlōm u ro.
Pumān ei na madual u anga han andual anlōm u ro.
14 Hiva satna ngāi dōra chunga han anditna le anthuam u ro,
asik chu hava ha kēng angkhat changna ranga anzomna rirual akip.
15 Pathian phūkdāinan na malung u na rui ril rase,
taksa mun khata mi nei ni u sika hiva phūkdāina sika anpāi kēng na ni u.
Hatuka ama chunga rāisānna manlang u ro.
16 Krista achong chu hianna tin rēnga na malung sūng u na hin ātam sabaka om rase.
Hatuka hianna tin rēng lehan anchū ansiāta,
ankōk anlōm u tan,
rāisān chong aril chunga anpākna la,
Pathian biakna la,
ratha lama anpākna la ngāi ha na Puma ranga na malung u chipa rāisānna la thō u ro.
17 Chonga mo ani,
sina mo ani,
nei thō u tak pei aloma ama zāra Pa Pathian kōma rāisān chong aril chunga Puma Isua raminga thō u chachak ro.
Kristian insūngkua om dān
18 Nupang ngāi,
Pumana ei anhui anga na ruathar u ngāi chip rachama om u ro.
19 Pasal ngāi,
na nungāk u ngāi chip adit u ro,
amāni chunga anrum nō ro.
20 Nāipang ngāi,
alom peia na nu na pa u ngāi hē tel u ro,
asik chu hava ha Puma ranga aphāmrua ani na.
21 Pa ngāi,
na nāi u ngāi hi atak mansi u nō ro,
nukhōna dok chuaina adōn thei u kēng.
22 Suak achang ngāi,
kongtin peia hi taksana na puma u ngāi hē hi tel u ro.
Amāni mit mu rang le amāni phāmna rang duaia dorbōndom ni luia malung anzīk tatak le Pathian anchi chunga ahē zī u ro.
23 Nei thō u tak pei ha miring dorbōndom ang be luia Puma ranga dorbōndom kēng ka ni ati na malung anzīkna thō u ro.
24 Hankēng chu Puma nāta dōngluapui chu rāt pākna anga man inti,
asik chu Puma Krista dorbōndom kēng na ni u.
25 Tukareng adik nōk athō tak chu adik nōk dēn lehan ratha ei anthuan rang,
asik chu Puma kōma ami mandang om mak.