4
1 Apuma chang ngāi,
na suak dōn u ngāi chunga anrual chianga rui mang u ro.
Asik chu nangnīm anvāna apuma dōn kēng na ni u ti ha re u ro.
Āhian anga kal chōi dān
2 Bōr azong lama malung pe u tānla rāisān chong aril chunga ameng chiana om u ro.
3 Krista chongrīl anthup rui sik taka ankhita kei om a hin hava arui ngēt ha kei ril theina ranga Pathianin koini na ranga chongrilna suakkhār ei na malong pe theina ranga koini na rang um bōr na zong pe u ro.
4 Kei ril rang anga anthiang vanga kei ril theina ranga ka ranga na zong pe u ro.
5 Apanga mi ngāi ranga na om dān thō u han ahian anga kalchōi u ro.
Hun anhēr chu mang sadim u ro.
6 Mi tin kōma hontin mo nei masang thei rang ti anriat chunga na chong ril u ngāi chu lungkhamna le āthum,
machi le ānnik babang chang rase.
Chibai hekna
7 Ka parual andit,
aiamrua dorbōndompu le Pumana ka suak changpui Tukhik hān ka rui ngāi dōra aloma amān na man thei zit unti.
8 Koini ngāi na dingmun anān riat u rang piala ama hi na kōm u na kei hong tīr ani na,
amān na malung u ngāi chu lungngam na sak u bō ni.
9 Ama bila Onesima,
koini na parual andit le aiam rua hanūk nangni ngāi bila mi khat ka hong tīra.
Amānīn hivan tianga rui ngāi dōra na man thei zit u bō ni.
10 Kei ankhumpui Aristarkān chibai ana hong thō u.
Hanūk chu Barnaba ani nāi pasal Markām chibai ana hong thō u.
Ama ahong tik lehan na lei pom u na ranga ruia lekha ha lei man zei u na ti.
11 Hanūk rēt chu Isua,
mīn Justa ei ti hān um chibai ana hong thō u.
Serantan ngāi bila hiva ngāi rong hi ani Pathian ram ranga ka sinthōpui ngāi chu ani u na.
Ka bila ei om u hi ka ranga lungngamna ana pēk sabak u.
12 Epaphra,
nangni ngāi bila mi khat le Isua Krista suak hīn chibai ana hong thō u.
Nangni ngāi alom peia Pathian malung vong anga nei andinga puitinga anriat vangna adōna nei om thei u na ranga ama chu achālaka bōr azonga tak asat chachak mi ani na.
13 Ama chu nangni ngāi ranga le Laodikei khuana a om ngāi rang le Hierapoli khuana a om ngāi ranga achālaka apōng sabak ani ti hi ama ruia chu kei ril ngam ani na.
14 Mi enpu dit tak Luka le Dema ngāiin chibai ana hong thō u.
15 Laodikei khuana unāi a om ngāi le Numpha le ainsūnga kuibing ankhōm ngāi ha chibai na thō pe ro.
16 Hatuka nangnīn hiva lekha hi na pore sua u le Laodikei kuibingām ei anpore theina ranga en u ro,
hatuka Laodikei kuibing ngāiin ei hong mathuan u lekha hām ei anpore theina ranga en
u ro.
17 Hatuka Arkippa kōma han:
“En ro,
Pumana dorbōndom sin athō ranga nei man ha azui ranga anrung ro,”
ti ro.
18 Hiva chibai hong thōna hi koi Paul ka kut ngēta kei hong maziak kēng.
Kei ankhitna hi na retit ro.
Lungkhamna na kōm u na om rase.
Amen.