1
1 Koini Paul,
Sila,
le Timothi ngāiin ,
Pa Pathian le Puma Isua Kristana om Thessalonika kuibing kōma chibai na hong thō.
Pa Pathian le Puma Isua Krista lungkhamna le phūkdāina na kōm u na om rase.
Thessalonika mi ngāi
iamna sika rāisānna
2 Koini na bōrzongna kipa na raming u ngāi aril chunga Pathian kōma na lom u na ranga rāisānna chong na ril chachak.
3 Koini na Pathian le Pa makunga iamna sika na sinthō zia u,
anditna sika nei pōng u zia,
koini na Puma Isua Krista nei mangang u sika na dūkdiar zia u ngāi ha na riattit chachaka.
4 Pathianin ei madit unāi ngāi,
nangni hi Pathianin ei na thang u kēng ti na riata.
5 Asik chu koini na thang ahui ha na kōm u na chong duaia ahong atung ni mak,
tenchu thōtheina le Ratha Ānthianga hanūk chu asa dima anriatlaka ahong kēng.
Hanūk chu nangni bila na om lāi han na sik u na hong zāt om dān athō mi nei ni ha na riat u na.
6 Hatuka chong chu antakna atēng sabak chunga Ratha Ānthiang pēk rāisānna lehan na lei phām u na.
Koini om alāk le Puma om alāk nei chang u ani na.
7 Havan tin han Makedonia ram le Akaia rama aiam ngāi dōra ranga aenrua nei ni u ani na.
8 Asik chu Puma chong ha nangni kōm āta rasa ei anthang ani na,
hava ha Makedonia ram le Akaia ram ronga ni mak,
tenchu mun tina Pathian tianga nei iam u zia ha anthek kēng ani zei.
Hasika han koinīn itē aril nāng lāi mak me.
9 Asik chu hava ngāi hān na kōm u na na hong alūt lāia nana lei phām u zia hanūk chu Pathian adam le atak adorbōndom ranga ramīl amāka Pathian tianga nei hong kīr u zia rui ha alei ril vuvung u na.
10 Hanūk chu Pathianin āthi ngāi bil āta ei mathui,
taksitna ahong atung rang āta koini anānzōkpu,
vānram āta ahong rang Pathian Nāi pasal Isua na lei ngāk thei u ani na.