Thessalonika
khuana Paul asin thō
2
1 Unāi ngāi,
na kōm u na koini nei hong lūt ha akorong chang mak ti ha nangni ngētin na riat u na.
2 Tenchu māna han Philippi khuana āntak le māimōk nān sak ti ha na riat u na.
Hanum nisela na bil u na antakna kārām Pathian thang ahui chu na kōm u na aril ranga Pathian sanna lehan ngamna na hong mana.
3 Asik chu koinīn anthēmna chong nei ril ngāi hi adik nōk āta asuak ni mak.
Mandon akhel āta asuak um ni mak,
anhuangna ranga asuak um ni mak.
4 Tenchu Pathianin ei pom mi anga koini na kōm ām thang ahui dorbōndom sin hi ei na betōk ani na.
Miring rāi ansān ranga ni mak,
tenchu koini na malung anthiang vanga ana mu pe Pathian rāiansān ranga anthēmna chong aril kēng na ni.
5 Asik chu miring anpākna ranga chongkam hui mang mak mena,
hanūk chu huat anhamna athup ranga om zia um dōn mak mena,
hava ha nangnīn na riat u na.
Hiva ngāi dōra anariatpui Pathian a om a.
6 Miring ngāi kōm āta mo,
nangni ngāi kōm āta mo,
angkhat angkhat kōm āta anpākna aman ranga arok mak me.
Tenchu Krista kuitīr atei ngāi anga hin nangni puak arik nei chang thei chu ani na.
7 Tenchu nuin nāite ranu ei man nēka ei kolong anga koinīm nangni kāra hēhui hēdāia nei om ani na.
8 Hadōr pei koinīn nei na dit sika Pathian thang ahui duai ana pēk u rang ni mak nei zōt,
tenchu koini nei damna tenpei ana pēk u ranga hin nei zōt ani na.
Asik chu nangni hi koiniīn nei madit ngāi na ni u na.
9 Unāi ngāi,
koini nei pōng le antak nei tēng ha na riattitt u na.
Pathian thang ahui na kōm u na na ril lāi han tutu tāta puak nei chang nōkna ranga asūn azāna sin nei thō ani na.
10 Nangni aiam ngāi bila anthiang liaia,
adik taka,
hanūk chu demna buia nei om ha nangni hi anariatpui na ni u na,
Pathian um anariatpui ani.
11 Pain anāi chunga om dān ei thō anga koinīm na chung u na hēhui chong nei rila lungar asaka,
lungngamna apēka nei na mathēm chachak ha na riat u na.
12 Aram le ei lianna ngēta ana kuipu Pathian mi ani rua anga alēng ranga anthēm chong nei na ril chachak ani na.
13 Hiva sika hin mong luia Pathian kōma rāisānna chong nei ril chachak ani na,
asik chu koini kōm āta chong nei rangāia nei pom u ha miring chong anga pom u mak che na tenchu Pathian chong tatak anga nei pom u ani na.
Hava ha Pathian chong aiam ngāi tak chunga sin athō tatak ani na.
14 Nangni unāi ngāi,
Krista Isuana Judia rama Pathian kuibing ngāi Krista Isua om alāk na ni u na,
amāni chu Jihudi nam ngāi āta antakna ei tiar u anga nangnīm na nam u ngāi āta antakna nei tiar u ani na.
15 Hava Jihudi ngāi ha Puma Isua le deari ngāi ei that u,
koinīm ei na sinsak u ani na.
Hava ngāi hān Pathian rāi mansān u mak,
mi dōrām ei dui u ani na.
16 Nam atei ngāiin sandamna ei man thei u na ranga chong aril um ei na khāp u ani na.
Havan tin han ei sa u nōkna chu alom peia ei makhip u ani na.
Tenchu Pathian taksitna chu achung u na ātam sabaka ei hong chul ani na.
Paulin Thessalonika
mi ngāi mu rang azōt
17 Tenchu unāi ngāi,
malung lama ni luia taksa lama hun alakte ranga nei ansen sika hin na mēl u āmu rēt ranga achālaka nei phām sika ana mu u rēt ranga achān nei pūt ani na.
18 Na kōm u na ahong rang hi nei zōt ani na,
aliaktena koi,
Paul len hin voi khat voi anni chu ahong ranga kei pūt ani na.
Tenchu soitānin koini hi ei na khārtit ani na.