3
1 Asōt nei ngāk zōt lāi nōk sika hin koini lim Atheni khuana a om hi āsa ati na koinīn na riata.
2 Koini na parual Timothi,
Krista thang ahui aril lama Pathian dorbōndom hi,
nangni ngāi ei na mandet thei u na rang le iamna tianga lungngam ei na sak thei u na ranga koinīn nei hong tīr ani na.
3 Hiva antakna ngāi dōra sika hin tutē malung ei anbuai nōkna ranga nei hong tīr ani na.
Asik chu hiva ngāi hi koinīn nei tiar ranga anruatsa kēng ti ha asa dima na riat u na.
4 Na bil u na na om lāi āta ansinsakna antak nei la tiar rang ti hi aphā māna nei na man theisa ani na.
Hatuka chu havan tin anga ei chuk lele ani ti na riat u na.
5 Asik chu na thang u kei riat lāi nōk sika om thei lāi makunga.
Hasik han nei iam u na rui ariat ranga Timothi hi kei hong tīr ani na.
Asik chu anānthēmpu u hān ana la mathēm ving u ngāi ti hi ka ratha ei ta,
hanūk chu koini nei pōngna ngāi hi akorong lam achang ving ngāi ti hi ani na.
Timothi kōma harna chong
6 Tenchu atun Timothi na kōm u nāta koini kōma ahong akīra nei iam u na le nei andit u na ruia thang ahui ahong chōia.
Hatuka chu nangnīn koini ranga anriattitna sa na dōn u na.
Hanūk chu koinīn ana mu u rang achālaka nei na phām sabak anga,
nangnīm ana mu u rang achālaka nei phām u ti ahong rila.
7 Hasik han unāi ngāi,
alom peia koini na lunghāngna le na dūk natna ngāi kārām,
nei iam u na thang na riata achān lungngamna na dōna.
8 Pumana adettita nei anding u sika hin atun adama nei om ani na.
9 Koini na Pathian makunga nangni na rathūla rāisānna tin le koinīn rāi nei mansān thei sika Pathian kōma hontin mo aliaka rāisānna ngāi mantung mani?
10 Asik chu na mēl u nei mu theina ranga le nei iam u na lama nei ansam u ha nei makhip theina ranga asūn azāna bōr nei zong ani na.
11 Atun koini na Pathian le Pa le koini na Puma Isua Kristān na kōm u na nei hong theina rang lampui na sin pe rase.
12 Nangni ranga koinīn nei na madit anga nangni le nangni ngāi,
hanūk chu mi tin ranga anditna chu Pumān na maphung pena na manliam pe u rase.
13 Hatuka koini na Puma Isua Krista aloma ami ānthiang ngāi dōra le ahong tika,
koini na Pathian le koini na Pa matona demna buia le ānthiang liaia nei om thei u na ranga na malung u amān mandet rase.