Pathian rāiansānna nunchang
4
1 Ahek khītnana chu unāi ngāi,
Pathian rāiansāna alēngna rui koini kōm āta anchūna nei man u anga nei om u ani na.
Atuna hin hava nēka nei thō riam thei u na ranga koinīn Puma Isua raminga nei na manchū le nei na mathēm ani na.
2 Puma Isua ningneina lehan hong zazāt chongpēk mo nei na pēk ha na riat u na.
3 Ānthianga nei om u rang hi Pathian malung vong ani na.
Hanūk chu hurna tin rēng āta ankhāi u ro.
4 Nangni na taksa u ngāi chip hi ānthianga le anritna changa nei mang thei u na rang anchū u ro.
5 Pathian re lui nam atei ngāi anga hurna lampui ningōl u nō ro.
6 Hiva ruia hin tutēn om āsia lehan a unāi chunga adik nōk athō na huang nō rase.
Asik chu havan tina athō ngāi dōra chunga phuba alākpu chu Pathian ani ti hi mān len āta nei na ril le nei na manriat ani na.
7 Asik chu Pathianin anthiang luia om rang ni mak tenchu anthianga om ranga kēng koini hi ei na kui.
8 Hasika han hiva ei na kuina poisak lui tak chu miring ni mak ei poisak lāi nōk tenchu ama Ratha Ānthiang ana pēkpu Pathian kēng ei poisak nōk ani zei.
9 Atun hin unāi anditna ruia na kōm u na anziak rēt nāng lāi mak.
Asik chu Pathian kōm āta nangni le nangni kāra anditna ruia anchūna nei man sua kēng ani u zei.
10 Anitataka,
hantin han Makedonia ram pumpuia unāi ngāi dōrām nangnīn nei dit u ani na.
Hanum ni rase unāi ngāi,
hava nēka andit riam ranga koinīn nei na hong mathēm
ani na.
11 Koinīn nei na mathēmna anga anngoi riama alēnga na sin thō u chipa malung apēka,
na kut ngēt lehan sin athōna om u ro.
12 Hatuka na om dān u ha apanga mi ngāi ranga anhuia anlang inti,
hanūk chu itē danganda luia om un na ti.
Puma ei hong rētna rang
13 Unāi ngāi,
āthīna alei asē sua mi ngāi rui riat luia nei om u rang,
hanūk chu itē ansabeina dōn lui mi tei ngāi anga lungnana nei om u rang hi zōt mak me.
14 Isua chu athīna,
anthui rēt zei ati na nei iam sika hin Isua bila alei athi sua ngāi dōrām Pathianin ama bila ruai rēt inti.
15 Hiva hi Puma achong ril ngēt,
hava ha koinīn nei na ril.
Puma ahong rēt māseng peia koini adama alei a om ngāi hīn alakte ngala alei athi sua ngāi ranga mān anta pial nō mani.
16 Asik chu Puma ama apum ngēta anpāina hē rasa le,
vānpalāi alian khīt rōl le,
Pathian totorōt rasa lehan anvān āta hong chum inti.
Hatuka chu Kristana alei athi ngāi dōra anthui mānsa unti.
17 Hava suale koini adama alei a om ngāi le nūka a om ngāi hi anvān malāia Puma le antong ranga amāni bila ansūm kāra anlāiseka kal inti.
Havan tin han Puma bila tāituan tāituana om inti.
18 Hasika han,
hiva chong ngāi lehin nangni le nangni ngāi lungngam ansak u chachak ro.