5
1 Tenchu unāi ngāi,
ahun le anikhua ruia na kōm u na itē anziak nāng lāi mak.
2 Asik chu Puma nikhua chu zāna marusa hong anga hong inti ei ti ha nangni lenin na riat u na.
3 Mīn,
‘phūkdāina le adamna’ a om zei ati lāi tak han nupang nāiha puang anga achung u na anlāiseka siatna suak rak inti,
zōk reng thak u nō ni.
4 Tenchu unāi ngāi,
nangni chu azīng kāra om ni u lāi mak che na hava nikhua ha marusa anga na chung u na hong suak rak lāi nō ni.
5 Na lom u na ra-āng nāi le sūna nāi kiar kēng na ni u,
zāna mi ni mak me na,
azīng kāra mīm ni mak me.
6 Hasika han mi tei ngāi anga in u lāi nō rei,
tenchu amenga le anrēnga om u rei.
7 Asik chu ā-in ngāi chu zāna kēng ei in u,
hanūk chu zu anri ngāi hi zāna kēng zu ei anri u chachak.
8 Tenchu koini chu sūna mi nei ni sika hin anrunga om u rei.
Hanūk chu iamna le anditna chu rōphuai anga hanūk chu sandam sua ati na anriatna chu lukhum anga akhum u rei.
9 Asik chu Pathianin taksitna atiar ranga ni mak tenchu koini na Puma Isua Krista zāra sandamna aman ranga ei na ruat ani na.
10 Adama mo na om,
athīna mo na om,
ama le mun khata nei om theina ranga ama chu koini ranga ei thi ani.
11 Hasika han nei thō babang u anga nangni le nangni ngāi lungngam ansaka ansan anlōm u chachak ro.
Chongbe hekna
12 Unāi ngāi,
na kār u na āpōng ngāi,
Pumana na ruaitu u ngāi le anānkōk u ngāi ha lalchi thō ranga koinīn nei na mathēm ani na.
13 Amāni chu asin thō u ngāi sika anditna lehan ansāng sabak ton u ro.
Hatuka chu nangni ngāi anngoi riama alēng anlōm u ro.
14 Hatuka unāi ngāi,
nei na mathēm ani zei,
andōka om ngāi chu angō u ro,
aratha annēm ngāi chu lungngam sak u ro,
ranak abui ngāi chu san u ro,
hanūk chu mi tin ranga na phūk manchual u ro.
15 Tenchu tutēn āsia rathūla āsia lehan ratha thuan u nō ro.
Nangni le nangni hanūk chu mi dōra rangām satna adōn babang ranga pūt u ro.
16 Na rāi mansān babang u ro.
17 Bōr zong chian u ro.
18 Alom pei tak chunga rāisān chong ril u ro.
Asik chu hava ha Krista Isuana nangni ranga Pathian malung vong ani na.
19 Ratha Ānthiang chu manthi u nō ro.
20 Pathian chong riltheina ngāi sum dem u nō ro.
21 Alom peia mansin kiar u ro,
āsa dōra chu sūrtit u ro.
22 Āsia
dōra nāta ankhāi u ro.
23 Anngoina Pathian ngētin na pumpui u na na manthiang vang u rase.
Koini na Puma Isua Krista ahong māseng na ratha u,
na malungrīl u,
na taksa u aloma demna abui thaka na siak pe u rase.
24 Nangni ana kuipu chu aiam rua ei ni sika,
amān hava ha na thō lele unti.
25 Unāi ngāi,
koini ranga bōr na zong pe u ro.
26 Unāi ngāi dōra biang antum ānthianga chibai thō u ro.
27 Hiva lekha hi unāi ānthiang ngāi dōra bila anpore ranga Puma matona kei na mathēm ani na.
28 Koini na Puma Isua Krista lungkhamna chu na kōm u na om rase.
Amen.