Lungngam ansakna chong
4
1 Hasika han ka unāi ngāi,
kei madit le kei rangāi ngāi,
nangni hi ka rāisānna le ka rēng lukhum na ni u na,
kei madit khīt unāi ngāi,
havan tin han Pumana adettita anding u ro.
2 Hatuka Euodi rang kei mathēm ani zei,
Suntuki rang um kei mathēm ani zei,
anīn u hi Pumana malung munkhat chōi u rase.
3 Ka rīngkol ana pēlpui nang len um kei na mathēm ani zei,
hava nupang ngāi ha nei san rang ani na,
asik chu amāni hi thang ahui sika ka bila sin ana thōpui ani u na.
Klement le atei ngāi ka bila sin ana thōpui ngāi ha amāni ngāi raming chu damna lekhabūna anziak zeia.
4 Pumana na rāi mansān chian u ro.
Kei ti rēt ani zei,
rāi mansān u ro.
5 Na om dān u phūkdāi a om ha mi tin kōma anlang rase.
Puma anāi kēng ani zei.
6 Itē ruia lunghāng andonna dōn u nō ro.
Tenchu alom pei tak chunga bōr azong le niai athō chunga rāisān chong aril chunga nei zong u ngāi chu Pathian kōma ma tung u chachak ro.
7 Hankēng chu riat phasam Pathian phūkdāina ha Krista Isuana na malung u le na mandon u na rung pe unti.
8 Ahek khīta chu unāi ngāi,
chongtak dōra pei,
lalchi rua dōra pei,
ādik dōra pei,
ānthiang dōra pei,
andit rua dōra pei,
raming anthangna dōra pei le satna tin rēng mo a om ha,
anpāk rua tin rēng mo a om,
ha hava ngāi rui ha mandon u chachak ro.
9 Hatuka nangnīn ka kōm āta nei anchū u,
nei man u,
nei riat u le nei mu u ngāi dōra ha ataka anmangpui u ro,
hankēng phūkdāina Pathian chu na kōm u na om inti.
Philippi ngāi pēkna
sika Paul arāisānna
10 Pumana achālaka ka rāisāna,
asik chu ahek ten pei ām nisela ka ranga athara andonna nei hong dōn rēt thei u sika.
Adika chu ka ranga nei na hong mandon lele u ani na,
tenchu ahun ei lān hēr nōk ngal kēng ala ni.
11 Hiva hi abui antak sika chong kei ril ni mak,
asik chu atuna kei om anga hin kei om nuam theina ranga anchūna man ka ni na.
12 Asik chu abuia om dān ka riat,
anei om dān um ka riata.
Kongtin le ruitin pei ding muna a om theina anchūna chong ariat sua kēng ka ni zei.
Hasika han akhopa om dān um ka riat,
anchāma om dān um ka riata.
Ātama anmang um ka thei,
atōma anmang um ka theia.
13 Ranak ana pēkpu Krista zāra alom peia ka thō kiar theia.
14 Hanum nisela kei antakna nangnīn nei nān sempui thei u hi na rang u na āsa kēng.
15 Hanūk rēt chu nangni Philippi ngāiin nei riat u anga na kōm u na thang ahui anphut pepeka Makedonia ram āta ka hong lāi han nangni rong nōk chu tutē kuibing atei ana san ranga apēk le aman ruia anchel khat ngal om mak.
16 Hanūk chu Thessalonika khuana ka om lāia kei ansamna ana zon ranga voi khat asanna sum nei na hong mathuan u ani na,
athara nei na
hong mathuan rēt u ani na.
17 Na kōm u nāta pēkna ni mak aman ranga kei phām tenchu nei pēk u na Pathian kōma hisāp ha ei pungtir rang kēng kei phām khīt ani na.
18 Aloma akip zita ka lei man ani na,
ātam sabak kēng kei man ani zei.
Epaphrodita kōma pēkna nei na hong mathuan u ha ka lei man,
hava lehan kei ansamna anazon kiara.
Hava ngāi ha marim ahui Pathian ranga apomrua le aphāmrua anbōlna dāli achang ani na.
19 Hatuka chu ka Pathianin ama ei anchongna alian zāra Krista Isuana han nei ansam u na tina amān na hong zon unti.
20 Koini na Pathian le Pa kōma anlianna chu tāituana om rase.
Amen.
Anthānna chibai
21 Krista Isuana mīn thiang ngāi dōra chibai man thei ro.
Ka bila om unāi ngāiin chibai ana hong thō u.
22 Mīn thiang ngāi dōrān chibai ana hong thō u.
Aliaktena Kaisar insūgkuana alēng mi ngāiin chibai ana hong thō u.
23 Puma Isua Krista lungkhamna chu na lom u tak chunga om rase.
Amen.