Krista adōn hi alu khīt
3
1 Ahek khīta chu ka unāi ngāi,
Pumana na rāimansān u ro!
Nangni ngāi ranga chong khat anziak munpu dēn anziak rēt hi mahuat makunga,
tenchu hava ha na rang u na anrēng thei khat ani na.
2 Ui om anga a om ngāi āta anrēng u ro.
Om sa nōk athō ngāi āta anrēng u ro,
hanūk chu ataksa azōt le aninga anvit chachak ngāi āta anrēng u ro.
3 Koini ngāi hi kēng serantan tatak na ni na,
koini ngāi kēng Rathāna Pathian abiak na ni na,
hanūk chu Isua Krista ruia anlianna nei dōn ani na,
taksa chunga anngamna dōn mak me na.
4 Asik chu taksa chunga anngamna nisela chu anngampui rua tam ka dōna.
Mīn taksa chunga anngampui rua ka dōn ti mandon sela,
koi ual kēng ātam adōn rang ka ni.
5 Asik chu ni riat nikhuana serantan sua ka ni na,
Benjamin nama Israel mi ka ni na.
Hebrai khūka Hebrai mi ka ni na,
Dān lampanga chu Pharisi ka ni na.
6 Hatuka tep annēlna konga chu kuibing ansinsak chachak ka ni na,
Dān āta asuak dikna lama chu dem kāi lui mi ka ni na.
7 Tenchu ka ranga manna kei ti ngāi dōra ha Krista sika chānnana kei ruat kiar ani na.
8 Taktaka ka Puma Krista Isua riatna alian khīt sika han alom peia anchānnana kei be kiar ani na.
Krista chu kei man theina ranga alom peia ama sika kei machān kiar thei ani na,
hava ngāi dōra ha ranoka kei be kiar ani zei.
9 Kristana kei anlang theina ranga alom peia kei machān ani na.
Dān āta asuak ka ninga dikna ni mak,
tenchu Krista nāta asuak iamna zāra dikna,
iamna zāra Pathian dikna chu kei man theina rang ani na.
10 Krista thīna nāta ei anthui rētna rui le aranak ariat rang le antak ei tiarna bila antak atiarpui rang kei zōt ani na.
Ama ei thī anga kei thī theina ranga.
11 Angkhat pei ni ta rase,
thīna nāta anthui rētna kei vasuak theina rang hin kei zōt ani na.
Derdīn ātung
ranga atānna an-ēng
12 Tenchu atun len hin aloma aman sua zit le akip sua zit la ni makunga,
tenchu hava ngāi kei man theina ranga han Krista Isuan derdīn adōna ei na sūr sika hin maton lama kei tān ani na.
13 Unāi ngāi,
atun hin aman sua kēng ka ni zei ati na anbē pial makunga,
tenchu kei thō khat chu:
Ka nūk tianga ngāi dōra chu ka mangil zita,
ka maton tianga a om khat avatung lilip ranga maton lama kei tān ani na.
14 Krista Isuana chunglam tianga Pathian pāina sika rātpāk avaman ranga derdīn lama maton tianga kei tān ani na.
15 Hasika han koini puiting sua ngāi dōrān hivan tin hin malung nei chōi rang ani na.
Tenchu nangni kāra malung atei achōi ving na om u ten,
Pathianin hava ngāi dōra chu hong manlang pe rase.
16 Azozōt ni ta rase,
koinīn nei hong suak tuka na om dān anga om dān lehan koinīm kal chōi u rei,
hava anga mandon chōi u rei.
17 Unāi ngāi,
na lom u na hin koi ka om na lāk u ro.
Hanūk chu mi tei ngāi um koini na om dāna nei man mu a enrua nei pēk ang taka kal achōi ngāi ha re u ro.
18 Asik chu aphā mān āta voi tamtak kei na ril babang u anga atun um mit rathi zān chunga kei na ril rēt ani u zei,
mi ātam riai chu Krista kros adui kēng ei chang u ani na.
19 Hiva ang miring ngāi chang rang chu anpeina ani na.
Amāni apathian chu avon u hi ani na,
amāni ei anlian u na chu mualphui ansak hi ani na.
Amandon u chu hi ramual neinun rui duai hi ani na.
20 Tenchu koini na tuallai lēngna chu vānram ani na,
sova mun āta ahong rang Sandampu Puma Isua Krista chu phām chunga na lei ngāk ani na.
21 Alom peia ama aning neina thuaia āsiak zit thei thōtheina ranak lehan koini na taksa achuai hi na thūl pēnti,
hatuka ama ei anlian taksa phua zeka na sin pēnti.