Om annuai ruia anchūna
2
1 Nangnīn Kristana lungngamna na man u na,
alungkhamna nāta phūkdāina na man u na,
Ratha lama anlopna na dōn u na,
hanūk chu lungkham anmuna le lung anpōngna na dōn u ten,
2 Hava ngāi dōra ha nei dōn ani kiar aniten,
ka rāisānna chu ākip ani zei.
Asik chu nangnīn malung munkhat nei chōia,
anditna angkhat nei dōna,
mandon munkhat nei dōna,
derdīn munkhat nei dōn u ani na.
3 Na rang duai anhual le akorong papeia aninga anpāk ranga itē thō u nō ro,
tenchu om annuai adōn chunga na nēka mi kēng lalchi na thō ngāi ati na mandon ro.
4 Na rang duaia andon u nō tān,
mi rang um mandon u chachak ro.
5 Hiva Krista Isua mandon ang hi nangni kōmām om rase:
6 Ama chu Pathian mēlruang
anput ani ngalām nisela,
Pathian anrualpuia om chu
anchupui ranga mandon
mak.
7 Tenchu ama aninga akorong
ahong achanga,
Suak mēlruang ahong raputa,
Miring mēlruang anga ahong
anzira.
8 Miring om anga mēl ahong
raputa,
Ama chu om annuai athōna,
Thīna tenpeia hē atela,
Krosa thīna tenpei aphāna.
9 Hasika han Pathianin ama
chu chung ansāng khīta
āsiaka.
Raming tin kāra raming
ansāng khīt apēka.
10 Asik chu Isua raming ngēta,
Chungvāna om le phila om,
Hanūk phil thuaia om,
Mankhūk dōrān akōma ei lān
bil rang ala ni.
11 Pa Pathian chu anliana ei
om theina ranga,
Malei dōrān Isua Krista chu
Puma ani,
Ati na ei la puang u rang
ani na.
Ārsi ēl anga a ēl ngāi
12 Hasik han kei madit khīt ngāi,
ka om lāi ronga ni mak hē nei tel u,
tenchu ka om nōk lāi ual kēng nangnīn hē tela nei om babang u anga han anchi le annōk chunga nangni ngāi na sandam u na ha manzui u ro.
13 Asik chu nangni ngāi malung zōtna chu ama malung vong ang ei ni theina ranga Pathian kēng na malung sūng u na sin ana thō pē u ani na.
14 Itē bāi ankhamna buia chong ankhalna bui thaka aloma thō kiar u chachak ro.
15 Asik chu nangni ngāi hi itē dem rua buia le anthiang liaia nei om u na atun tak huna rilru akōi le lampui dik lui āzī ngāi bila nei lēng u.
Tenchu tutēn siat ei na ril u nōka Pathian nāi nei chang u na hiva maniapūra ārsi anga nei ēl ani u na.
16 Hatuka nangnīn damna chong chu adettita nei sūr u ha Krista nikhua tika chu kei anlianpuina ranga ani na.
Asik chu kei tān hi akorong ni mak,
kei pōngnām akorong ni mak.
17 Tenchu nangni ngāi iamna ranga ka taksa hi māichām chunga dāli anzān anga anzān sela hanum nisela na lom u na ranga na chung u na ka rāi asāna ka phām sabaka.
18 Hasika han nangnīm ka bila hin na rāi mansāna phām u ro.
Timothi le Epaphrodita rui
19 Timothi chu na kōm u na anrapa hong tīr thei ranga Puma Isuana an iamna ka dōna.
Hatuka chu na rui na tāng u ngāi ka riat tik le ka malung har inti ka iama.
20 Asik chu ama anga nangni ngāi satna ruia lung anpōng tatak mi atei tutē dōn lāi makung.
21 Asik chu mi tinin Krista Isua rui mandon luia zārzīr aning rang chipa kēng ei mandon u ani zei.
22 Tenchu Timothi chu pa le nāi hontin mo munruala sin ei thō u anga han ama chu ka bila thang ahui dorbōndoma suak anga apōng sabaka arua ei ni zia ha nangnīn na riat u na.
23 Hatuka ka chunga imo ahong atung rang ka riat suale ama chu na kōm u na ahong tīr len thei ranga kan iama.
24 Hanūk chu koi ka pum len um nisela na kōm u na anrapa ahong len thei ranga Pumana anngamna ka dōna.
25 Hanum nisela Epaphrodita chu na kōm u na honga tīr anāng ti ka mandona.
Ama hi ka parual le ka sinthōpui le ka sipai changpui khat ani na.
Asik chu ama hi kei nāng le kei ansamna tina nei tīr nei tōn u mi ani na.
26 Amām nisela nangni ngāi na lom u na ana mu u rang ei phām sika hin kei hong tīr ani na,
asik chu ama ei dam nōkna rui ha
na lei riat u ti ariata achālaka amalung ei pōng ani na.
27 Achālaka ana tataka āthī rang vit ani na,
tenchu Pathianin lungkham amuna.
Ama chung rong ni mak tenchu lunghāngna chunga lunghānga kei man nōkna ranga koi ka chungām lungkham ana mu na.
28 Hava sik ual han achālaka aphām chunga ahong atīr ranga kei zōt ani na.
Havan tin han ama chu na mu rēt u tik le na rāisān untia hatuka koi um nisela ka lunghāngna duai tir inti.