Ahek khīta anthēmna chong
6
1 Unāi ngāi,
mi angkhat peiin omdān arakān ving ten,
nangni ratha lama mi ngāi hān om annuaina adōn chunga athara mathui rēt u ro.
Hatuka nang um nisela anthemna na nei om ving thei nōkna ranga anrēng ro.
2 Nangni le nangni dārkham ansak u ro.
Havan tin han koinīn Krista dān chu akipa nei zōm ani na.
3 Mi senkkhat chu milian ni luluia milian ka ni anti ngāi chu aninga anhuang ani u na.
4 Hatuka mi tei le ankhī luia,
amān atheia ei thō ha mansin rase,
hatuka ama atheia han anlianpui rua dōn inti.
5 Asik chu tukareng na ninga puak chu na ninga nei pēl chip rang ani na.
6 Pathian chong tianga anchūna a man chu ama anchūpu lehan alom pei asa dōra ansempui rase.
7 Anhuanga om u nō ro.
Pathian chu ēlsekara thō ngāi mak me.
Asik chu miringin ei ling tak pei ha ei kham rang ani na.
8 Tukareng ama ataksa zōt anga atu chu taksa nāta āsiat thei mara kham inti,
hanūk chu tukareng Ratha zōt anga atu chu Ratha nāta tāituan damna mara kham inti.
9 Sin āsa thō ranga mahuat u nō rei,
asik chu zām anzal luia na om ten,
ahun taka chu amara kham inti.
10 Hasika han hun asa na man lāi hin mi dōra ranga sin āsa thō u rei,
aiam mi insūngkua ngāi ranga thō ual u rei.
Serantan ni lāi mak
ansin athar kēng anāng
11 En u ta!
Horop alianpa ngāia ka kut ngēt le hiva lekha kei maziak hi!
12 Apang tiang lima mi lian khat anga anlang rang azōt ngāi kēng serantan khakhak rang ati u,
Krista kros sika ansinsakna rong ha amānīn ei tiar u nōkna ranga apūt u kēng.
13 Tenchu serantan ngāi ual kēng dān zī luia a om u ani na.
Hanum nisela nangni na taksa u chunga anlianpui rua ei dōn thei u na ranga serantan ranga ei na pūt u ani na.
14 Tenchu koini na Puma Isua Krista kros rong nōk chu ka ranga atei itē anlianpui rua dōn makung.
Krista sika maniapūr chu ka ranga krosa antār ani
na,
koi um maniapūr ranga krosa antār ka ni zei.
15 Asik chu Krista Isuana serantan le serantan nōk itē ni mak,
tenchu ansin thar ha kēng atak.
16 Hava dān ang taka āzī ngāi chunga phūkdāina le lungkham muna om rase.
Israel Pathian chungām om rase.
17 Ka taksana Puma Isua ei andangna kei raput sika hin atun āta chu tutēn na manpōn lāi nō rase.
18 Unāi ngāi,
koini na Puma Isua Krista lungkhamna na ratha u bila om rase.
Amen.