Kristana zōkna
5
1 Kristān zalēnna adōn ranga ei na mazōk ani na.
Hava tak ngēt lehan adettita andinga om u ro,
athar rēta suak rīngkol raput u lāi nō ro.
2 Rangāi u ro!
Koi Paulin na kōm u na kei ril chu:
Nangnīn ser na mantan u ten,
na rang u na Krista chu itē ei nemna ha om lāi mak hale.
3 Dān rui pumpui āzī rang hi antāng kēng ka ni ati na tukareng aserantan ngāi kōma athara kei manriat rēt u ani zei.
4 Dān sika asat anlō rang ati na apūt ngāi chu Krista akōm u na ei nemna bui le alungkhamna nāta ankhāi kēng na ni u zei.
5 Tenchu koinīn Ratha lehan iamna dōn chunga nei mangang dikna chu aphām hiaia na lei ngāk ani na.
6 Asik chu Krista Isuana han serantan itē ei nemna om mak,
serantan lui um itē ei nemna om mak.
Tenchu anditna ādet lehan iamna rong ha kēng alu khīt
ani na.
7 Nei tān u hi asapa ani na,
tenchu tu mo chongtak zī nōkna ranga anakhār u?
8 Havan tin ang ranga anthēmna ha nangni ana pāipu u nāta asuak chu ni mak.
9 Asik chu chol alaktēn zurua apumpui ei mantep ani na.
10 Pumana nangnīn mandon atei chōi u mak che ti hi na chung u na anngamna ka dōna.
Tenchu nangni anānbuai u tak angkhat pei ni rase,
Pathianin achung u na ruiril inti.
Hava ha ei zozōt mi ni rase.
11 Tenchu unāi ngāi,
atun tena serantan rui kei la ril chian nisela ichanga mo ansinsakna kei la tēng bang?
Kei ril nisela chu kros ruia kei ril hi anpōnna bui ei ni rang chong ani na.
12 Havan tina nangni ngāi chunga anānpōn ngāi chu amāni apasal nīna ei pei u rang kei zōt ani na.
13 Unāi ngāi,
zalēnna adōn ranga anpāi kēng na ni u,
tenchu hava na zalēnna ha taksa ningōlna ankhop rang ronga mang u nō ro.
Hanēka aniten,
anditnana om u tān angkhat le angkhat dorbōndom anlōm u chachak ro.
14 Asik chu hiva chongkam khat dak hin aloma dān dōra ei makhipna:
“Na inkōl mi chu naninga nei
andit anga madit ro,”
(Lev. 19:18 )
ti ani na.
15 Tenchu nangni le nangni ngāi ha siat anrila nei anchuk u chachak sika han nei siat u nōkna ranga anrēng u ro.
Ratha zāra damna
16 Tenchu kei na ti u na asik chu:
Rathāna kal na chōi u ten na taksa u na ningōlna ha bāri ei tung nōk rang ani na.
17 Taksān Ratha zōt nōk ngāi ning ei ōl ani na,
hatuka Rathān taksa zōt nōk ngāi ning ei ōl ani na.
Asik chu Ratha le taksa hi andui rit chachak ani na.
Hasik han nangnīn nei zozōt u ha thōthei u mak che.
18 Tenchu Rathān ei na maruai u sika han dān thuaia om ni u lāi mak che.
19 Taksa sin thō ngāi chu anthiang vanga anlanga,
hiva ngāi hi ani na:
Uiare,
hurna tin,
hurna annim,
hurna salui ngāi.
20 Hanūk chu ramīl anmōk,
dōi athei,
anmumākna,
ansualna,
khāmaret,
taksitna,
huat anhamna,
ansenna,
anchūna rothol ngāi.
21 Mi ēngsa thō,
mi that,
anrīna,
le zu me rahāi ansakna ngāi le atei atei hava ngāi anga a om ngāi dōrām.
Hiva ngāi anga om athōna kal achōi ngāi chu Pathian ram aluapu chang thei u nō ni ti ha apha mān len āta kei na manthei u anga atun um kei na manthei ani u zei.
22 Tenchu Ratha mara chu hiva hi:
Anditna,
rāisānna,
anngoina,
dūkdiarna,
malung seina,
omdānsatna,
aiamruana.
23 Hanūk chu omannuaina,
anrēngtheina,
hiva ngāi lehin ankal atei dān itē om lāi mak.
24 Kristana a om ngāi chu taksana āsia andonna le ningōlna ngāi dōra lehan krosa han antār kēng ani zei.
25 Rathāna adam nei ni sika hin Ratha dēn lehin kal chōi u rei ba.
26 Akoronga chongpāk ansal u nō rei,
koini le koini kāra ansuk anēngna masuak u nō rei,
anmumāk um u nō rei.