4
1 Hava kei ti na chu hintin hin ani na:
Dōng alua rangpu alom peia dōnglua puma ani nām nisela nāipang ei la ni sika han ama le asuak dōn itē ei teina om mak.
2 Tenchu apān hun bi ei ruat pe asuak māseng ama chu arungpu le dōnglua aenkolpu thuaia kēng ei om ani na.
3 Koinīm havan tin dēn han nāipang na la ni lāi han maniapūr anchūna suak thuaia nei om ani na.
4 Tenchu hun kipna ahong asuak tika chu Pathianin anāi pasal ahong tīra,
ama chu nupang āta ahong anzira,
dān thuai ngēta oma ahong anzira.
5 Dān thuaia a om ngāi chu man lehan ei ratana nāi pasala anpom ningneina nei dōn theina ranga ani na.
6 Hatuka nāi nei ni u sika han Pathianin nāi pasal Ratha chu nangni malung sūnga ei hong man honga,
hava lehan “Abba,”
Pa ati na ei pāi ani na.
7 Hasika han suak ni u lāi mak chena,
nāi pasal kēng na ni u zei,
hatuka nāi pasal nei ni u sika Pathianin ei thang Krista zāra dōng aluapui hām nei chang ani u zei.
Galatia mi ngaī rang
Paul alungpōngna
8 Hanum nisela tian lāi han Pathian nei la riat u nōk sika Pathian tak ni lui,
pathian ngāi suaka nei om u ani na.
9 Atun chu Pathian na hong riat u tāk aniten,
Pathianin um ei na riat u ani na.
Hanle hontin mo nangnīn hava rātna bui le ei nemna bui maniapūr anchūna suak tianga dēna nei anhoi rēt thei u?
Athar rēta machina ngāi dēna suak achang rang mo nei zōt u?
10 Nangnīn nikhua le thakhua bīk,
kum le zoro bīk aser nei la mang u chachak ani na.
11 Nangni na rang u na akoronga apōng lam ka ni ngāi ti hi nangni na chung u na ka ratha tākna ani na.
12 Unāi ngāi,
kei na hong mathēm ani u zei:
Koi kei om anga hin om u ro,
asik chu koi um nangni ngāi om anga ka om hile.
Ka chunga chu adik nōk itē thō u mak che.
13 Na kōm u na thang ahui ka ril pepek lāi han ka taksa ei dam nōk zia ha na riat u na.
14 Ka taksa ei dam nōk sika na kōm u na rui asuak ngāi dora ha ka ranga ansinna ani na,
hanum nisela ning chial na makhāi u mak chena,
na mahuat um u mak chena.
Tenchu Pathian palāi khat ang mo,
Krista Isua a pum len anga mo kēng na na lei phām u na.
15 Havan tin han aniten,
ravān asa nei anti u na na malung ei pār u ngāi ha hon tiang mo ei om ani zei?
Tenchu nei thei ni u sela chu,
na mitru u ngāi ngal akela ana pēk rang ten pei nei anhuam u ha kei na manriat zām u ani zei.
16 Hanle na kōm u na chongtak chong kei ril sika mo nangni ngāi rāldui kei chang ani zei?
17 Mi senkhat chu asat lam tianga rang ni thak luia,
nangni ranga achālaka atepannēl hi a om u na,
tenchu hava ngāi ha amāni tianga na tep eiannēl u na rang ha kēng ei na zōt u.
Hasika han koini nāta anānsen rang ha achān ei val u ani na.
18 Nangni bila ka om chachak rong le ni mak,
tenchu asatna lampui tianga rang aniten,
na tep nei mannēl babang u rang hi asa.
19 Ka nāi madit ngāi,
na kōm u na Krista mēl chu anlang rēt māseng chu nāi-ha puang anga kei tēng rēt ani zei.
20 Nangni ngāi ruia ka malung ei anpōn sika hin atun hin nangni bila a oma ka chong-āk hi antei rang kei zōt ani zei.
Hagari le Sari ruia ankhīna
21 Nangni dān thuaia a om zōt ngāi,
na manthei u ta:
Dānin imo ei ti ha riat u mak che mo?
22 Asik chu Pathian Lekhana anziak:
Abrahamin nāi pasal anni aneia,
angkhat chu suaknu le anāi pasal ani na,
angkhat rēt chu suaknu nōk le anāi pasal ani na.
23 Suaknu le anāi pasal chu taksa ningōlna nāta anzir ani na.
Hanuk chu suaknu nōk le anāi pasal chu chongtin āta anzir
ani na.
24 Hiva nupang anni ngāi hin omzia nei chunga ankhīna adōn u na.
Hiva nupang anni ngāi hin dān ankhit anni rui ha ei hong derdīn ani na.
Angkhat chu Sinai Mual āta suak achang ranga nāi pasal anzirnu ha ani na.
Hava ha Hagari ani na.
25 Hava Hagari ha Arab rama Sinai Mual,
atun taka Jerusalem khua le ānkhī ha ani zei,
ama chu anāi ngāi lehan suak achanga ei om u ani na.
26 Tenchu chungvān Jerusalem chu suak ni mak,
hava ha koini ngāi na loma na nu ani na.
27 Asik chu Pathian Lekhana anziak:
“O nupang achingnu,
Nāi mazir luinu,
Na rāimansān ro.
Nang nāiha tēng luinu,
Anringa ankhēk ta ro.
Asik chu ruathar adōnnu nēka,
Nochan ansaknu nāi ngāi
ātam ual,”
(Isa.54:1 )
ti ani na.
28 Unāi ngāi,
Isaak anga koinīm chongtina nāi kēng na ni zei.
29 Tenchu hava lāi han taksa ningōlna le nāi anzir han Ratha nāta nāi anzir rang ha ei sinsak chachak ani na,
atun um havan tin ang han ala ni.
30 Tenchu Pathian Lekhana han imo anziak?
“Suaknu le anāi pasal ha masuak ta ro.
Asik chu suaknu nāi pasalin suaknu nōk anāi pasal lehan mun khata dōng aluapui chang pial thei nō ni,”
(Anp.21:10 )