2
1 Hatuka chu na kōm u na hin malung ana chunga hong rēt lāi nō rong ti hi kei mandon ani na.
2 Asik chu na malung ka na manna u ten,
tu mo ka rāi anānsān rang?
3 Asik chu na kōm u na ka hong tik le rāisānna anapēk rang ngāi kōma malung natna ka man ving ngāi kei ti sika hiva chong ngāi kei na maziak u ani na.
Asik chu koi ka rāisānna hi nangni na lom u ranga rāisānna rang kēng ti hi kei iam ani na.
4 Antakna tampa le malung ana chunga le mit rathi tampa zān chunga na rang u kei maziak,
nangni malung natna anapēk ranga ni mak,
tenchu na rang u na kei na dit u ei tam zia ha nei riat thei u na ranga kei maziak ani na.
Āsia thō ngāi andualna
5 Tenchu angkhat peiin mi chunga malung natna apēk anten,
hava ha koi ronga ei na pēk ni mak,
tenchu na lom u chunga ituk ten mo chu ei na pēk ti na ani na.
Hava ha chong ana sabaka kei na ti u ni mak.
6 Hava ang zāt miring chu mi tamtakin ei sinsak ha aranga ahun kēng ani zei.
7 Hasika han atun chu hava ngāi ha madual u tānla amalung ei na pe rahei nōka lungngamna nei pēk u rang āsa kēng.
8 Hasika han ama chunga na lungkham mu u na chu anthiang vanga nei manlang thei u na ranga kei na mathēm u.
9 Nangnīn kongtin rēnga hē na tel u mo tel u mak che mo,
anānsinna u anga hiva hi kei hong maziak ani na.
10 Asik angkhat peia nei madual ani u ten,
koi um kei madual ani zei,
hanūk chu angkhat pei sika kei madual chu nangni sika Krista raminga kei madual ani na.
11 Asik chu soitān koini maton ansa lam ving ngāi,
asik chu amān koini ei na mathēmna hi nei riat thei ani na.
Dān athara dorbōndom ngāi
12 Krista thang ahui anthek ranga Troa khuana ka sē lāi han Pumān suakkhār ana lei malong pena ka mu.
13 Sova muna son ka parual Tita kei vamu nōk sika han ka phūk dāi mak.
Hasika han chong ahuile kān thānpui u na Makedonia rama kei pan ani na.
14 Pathian chu anpāka om rase,
amān Krista zāra zuina lehan maton ei na maruai ani na.
Koini ngāi amanga Krista lama riatna chu marim ahui anga muntina ei anthek ani na.
15 Asik chu sandama a om ngāi le anpeia a om ngāi ranga koini chu Pathian ranga Kristana marim ahui na ni na.
16 Tenchu hava ha mi senkhat ngāi ranga athī rang ngāi ranga thīna marim āsia,
hanūk chu mi senkhat ngāi ranga adam rang ngāi ranga damna marim ahui ani na.
Havan tin ani ranga tu mo arua ani zei?
17 Mi tamtakin Pathian chong hi anhuangna ranga amanga sum lōna ranga ei mang anga koini chu havan tin han mang mak me,
tenchu malung anthianga Pathian zōt dān anga Pathian matona Krista kēng tāng nei hāi ani na.