3
1 Havan tin han aniten,
koinīn na ninga ranga anpomna lekha athara anziak rēt mo ei nāng rang ani zei?
Hanūk chu nangni kōma rang mo ani ole nangni kut āta mo ani mi senkhatin anpomna lekha ei mannāng anga koinīm nei nāng rang mo ani zei?
2 Tenchu nangni hi koini ngāi lekhamathuan na ni u na,
koini ngāi na malung pēka anziak lekha mathuan na ni u na.
Hava ha mi tinin ei riat thei le ei pore thei ani na.
3 Hatuka nangni ngāi hi Krista lekha mathuan na ni u na.
Hatuka koinīn hava lekha mathuan dorbo nei dom ani na.
Hava ha lekhatī le anziak ni mak,
tenchu Pathian adam Ratha le anziak kēng.
Hava ha lungpēka anziak ni mak,
tenchu miring malungpēka anziak kēng.
4 Krista zāra Pathian makunga hava anga anngamna koinīn nei dōn ani na.
5 Tenchu koinīn naninga āting anti thei mak mena,
koini nei tingna chu Pathian āta ahong ani na.
6 Amān lekha horopa ei maziak ni mak,
tenchu Rathāna ei maziak,
dān khit athara dorbōndom achang ranga āruana ei na sin ani na.
Asik chu horopa anziak ha chu thīna ana pēk thei ani na,
tenchu Rathāna anziak chu damna anapēk thei ani na.
Dān athar ei satna
7 Thīna ana pēk thei lungpēka anziak horop lua mana aliana a-ēl sabaka.
Havan tin han Mosi amēl ei ēl sabak sika Israel nāi ngāiin amēl en thei u lāi mak,
hava ei ēlna hām anpeia ahek ani na.
8 Ratha lama hasōndomna vāng chu ituk anlianna mo ei ni rang ni mak mo?
9 Asik chu āsia anānlō thei hasōndomna lua mana hadōr pei anliana a-ēl thei ten,
asat anānlō thei hasōndomna vāng chu ituk anlianna mo ei ni rang ani na.
10 Hasik han machina anlianna alei om ha atun chu hava nēka anlianna a-ēl lehan na mankhī ten,
hava anlianna ha itē ni lāi mak.
11 Hanūk chu anpeia ahek tir rang lua mana anlianna lehan a-ēl thei ten tāituana adiar thei vāng chu ituk anlianna le mo ei anthuam rang ani na.
12 Havan tin han koinīn ansabeina nei dōn sika hin anngam panga chong nei ril thei ani na.
13 Koini ngāi chu Mosi ang ni lāi mak me.
Asik chu Israel ngāiin ei ēlna anpeia ahek tir rang ngal ha ei en u nōkna ranga amāisua ei mahīp ani na.
14 Tenchu amalung anchang sua ani u na.
Asik chu avian ten pei hin dān khit maruana dānbu apore u kip pei hava anhīpna ha ei la omtit ani na.
Ankhāi thei luia ei la omtit ani na.
Asik chu hava ha Kristana rong kēng ei ankhāi thei ani na.
15 Avian ten pei Mosi dānbu apore u kip pei amalung u ankhāra ei la om ani na.
16 Tenchu tukareng amalung Puma tiang amakhīr anten hava ankhārna ha anlong kēng ani zei.
17 Puma chu Ratha ani na,
hatuka Puma Ratha ei omna
taka azōk theinām a om.
18 Hatuka chu koinīn na loma na māi anhīp luia dapōna an en anga Puma ei lianna ena anlianna chunga anlianna lehan,
ama anga aphua ranga nei anthūl tir ani na.
Hava ang anlianna chu Puma a Ratha nāta ahong asuak kēng.