Bephil sūnga om neinun asa
4
1 Pathian alungkham muna zāra hiva hasōndomna sin nei man sika hin dok chuaina man mak mena.
2 Tenchu anzakpuirua zāt le anthuppuirua neinun ngāi dōra aloma na māka,
mi huangna ranga chong amang ngāi anga chong mang mak me,
Pathian chong um makhōi mak me.
Tenchu chongtak ha kēng nei manlanga Pathian matona mi tin kōma siat le sa riatna kōma koini hi ātinga ati na nei anlang ani na.
3 Tenchu koini na thang ahui hi ankhāra a om ten,
anpei rang ngāi kōma kēng ei ankhār ani na.
4 Pathian mēl anga om Krista thang ahui ei anlianna ra-āng amāni chunga ei ēl nōkna ranga,
hava aiam nōk ngāi malung chu hi maniapūr pathianin ei manzīng pe kēng ani zei.
5 Koini na ninga rang duai anril ni mak me,
tenchu Isua Krista hi Puma ani,
hanūk chu koini hi Isua sika nangni ngāi ranga suak na ni ati na kēng chong nei ril ani na.
6 Asik chu Pathianin:
“Azīng āta ra-āngin hong ēl rase,”
(Anp.1:3 )
atipu hān koini malung sūnga ra-āng ei hong man ēl ani na.
Amān Isua Krista amēla han Pathian ei anlianna zia riatna ra-āng ei hong ēl theina ranga.
7 Tenchu hava chunga thōtheina chu koini nāta ni mak,
tenchu Pathian āta asuak ani ti nei manlang theina ranga koinīn hava neinun asa ha bephil sūnga nei siak ani na.
8 Kongtin peia aloma antaknān ei na suk ani na,
tenchu akiak le akuia om mak me.
Malung asiāta nei om,
tenchu boidongna dōn mak me.
9 Anphenēnga nei om tenchu,
anpei anmanga om mak me.
Anzēma nei om tenchu,
asiat akuia om mak me.
10 Koini na taksa puma hin Puma Isua ei thīna mēl chu tāituana nei pēl ani na.
Asik chu Puma Isua ei damna hām koini na taksa puma ei anlang theina ranga.
11 Asik chu koini aring le adama a om ngāi hi Isua sika thīna matona anpēk om chian kēng na ni.
Asik chu koini na taksa athī theia hin Isua ei damna ei anlang theina ranga.
12 Hasika han,
koini na chunga hin thīnān sin ei thō,
tenchu nangni na chunga damnān sin ei thō ani na.
13 Tenchu,
“Iamna kei dōn ani na,
hasika han chong um kei ril ani zei,”
(Sām 116:10 )
ti Lekhana anziak anga,
koinīm hava iamna malung anput chunga nei iam ani zeia,
hasika han chong um nei ril ani zei,
ti hi ani na.
14 Asik chu Puma Isua athī ngāi bil āta anthuirētpu hān koinīm Isua zāra na mathui rēt intia nangni ngāi lehan amakunga na manlang inti ti hi nei hong riat ani na.
15 Hiva ngāi dōra hi alom peia nangni ngāi satna ranga kiar ani na.
Asik chu Pathian lungkhamna mi tamtak kāra ei anlang anga Pathian ei anlianna sika rāisān chong antung theinām ei liam ani na.
16 Hasika han koini ngāi na dok chuai mak.
Apang tianga na chuai tirām ni rase asūng lam tianga chu nikhuan tina athar tir ani na.
17 Asik chu chomo khat baka antakna puak arik hīn koini na ranga tāituana anlianna dōnglua tam ei mantīng ani na.
18 Hasika han koinīn mita mu thei neinun tianga thīr mak me.
Tenchu mita mu thei lui neinun tiang kēng nei thīr viak.
Asik chu mita mu thei neinun chu chomo khat bak ranga a om ani na,
tenchu mita mu thei lui neinun chu tāituana a om rang ani na.