Koini nei omna
rang vānram mun
5
1 Asik chu koini nei omna phil in hi siat ngal sela,
Pathian āta in adet khat koinīn na dōn ti nei riat ani na.
Hava in ha kuta ansin ni lui le tāituana adiar rang vānrama om ani na.
2 Asik chu vānrama nei omna rang ina anthuam rang achālaka angāk chunga hiva phila ina hin anngūia nei om ani na.
3 Havan tin han anthuama na om tik chu sāikoronga om anga om lāi nō mani.
4 Hatuka hiva ina puak arika nei om a nei anngūi ani na,
asik chu anthuam luia om rang nei zōt sika ni mak,
tenchu vān in anthuama om rang nei zōt sika ani na,
thīthei neinun hi damnān ei vol thei na ranga.
5 Hiva rang ngēta koini ana sinpu chu Pathian ani na,
amān nangkana ranga akhāpna Ratha chu koini kōma ei na pēk.
6 Hasika han hiva taksana na om sūng chu Puma kōm āta ankāra om kēng na ni ti nei anriat sika hin lung ngam nei ansak babang ani na.
7 Asik chu koinīn mu thei neinun le ni mak,
tenchu iamna le kēng kal nei chōi.
8 Koinīn anngamna na dōn kei ti,
taksa nāta ankhāia Puma kōma ina om rang aliaktena nei zōt ual ani na.
9 Hasika han,
taksa ina om ila,
om nō ila,
hanum nisela Puma ei zōt anga om hi koini na derdīn ansāng ani na.
10 Asik chu mi tinin ataksana āsia mo asa mo asin thō anga achang āi aman chip ranga Krista ruirilna chōmphāng matona koini na lom rēnga nei la vān ding kiar rang ani na.
Anngoina dorbōndom
11 Asik chu Puma anchīna rui ariat chunga,
miring ngāi kōma anthēmna chong nei ril ani na.
Koini malung vong chu Pathian kōma anlanga,
nangni ngāi siat le sa riatna kōmām anlang ti kei iam ani na.
12 Koini nei anpākna chong nangi na kōma athar rēta ril lāi nō mani.
Tenchu koini na ruia nangnīn chongpāk ansal nei ril thei u na ranga hēr na pe inti.
Asik chu amalung sūng āta ni luia apang tiang lima chongpāk ansal aril ngāi kōma chong nei masang thei u na ranga.
13 Asik chu koini ngāi hi āmo nān lō ten,
Pathian ranga ani na,
tenchu ahian nān lō ten,
nangni ranga ani na.
14 Asik chu Krista ditnān ei na manthōtit ani na.
Hintin hin koinīn nei zēk ani na:
Mi dōra rathūla mi khat athi ten,
mi dōra aloma athi kiar ani zeia.
15 Hatuka ama chu mi dōra rathūla ei thi sika han adama a om ngāi chu amāni ranga adam ni u lāi mak,
tenchu amāni thī rathūla āthī le anthui rēt sika ei dam thei u na ranga.
16 Hasika han atun āta chu tukareng hi taksana re lāi mak me,
machin han taksana Krista na hong riatām nisela atun chu hava ang han re lāi mak me,
machin han taksana Krista na hong riatām nisela atun chu hava ang han re lāi mak me.
17 Hasik han tukareng Kristana a omchu hava nāi ha athara ansin kēng ani zei.
Amaruana om ngāi dōra chu atheng sua zei,
en ro aloma ahong athar kiar kēng ani zei.
18 Hia ngāi dōra hi aloma Pathian āta ahong asuak kiar ani na.
Amān Isua Krista zāra koini le ama ei na manngoia amān angngoina dorbōndom sin hi ei na pēk ani na.
19 Pathianin Krista zāra maniapūr ei manngoia miring ngāi dān ei khēl u na chu amāni tak chunga belbo pe mak,
tenchu anngoina chong ha koini kōma ei na betōk ani na.
20 Hasika han koini hi Krista rathūla palāi na ni.
Koini amanga hin Pathianin ei na mathēm chian anga koinīm Krista rathūla nei na mathēm chian:
“Pathian lehin anngoia om u ro,”
ati na.
21 Āsia thōna dōn pial lui hān koini sika āsia thō ei manchang ani na,
asik chu ama nāta Pathian dikna nei changna ranga.