Kuibinga ansenna
a om chachak
3
1 Unāi ngāi,
na kōm u na ratha mi kōma chong anga chong ril thei makunga.
Tenchu taksana om mi anga,
Kristana nāite ankōk anga kēng na kōm u na hiva chong hi kei ril.
2 Na kōm u na nei nēk u rang burum ni mak kei na pēk u,
tenchu nei nēk u rang ranuti kēng kei na pēk u.
Asik chu burum la nēk thei u mak che,
atun um la nēk thei u mak che.
3 Asik chu atun tena taksa mi nei la ni u sika ni mak mo na kār u na khāmaret le ansualna le ansenna ngāi ei la om chian?
Hava ha taksa lama miring nei la ni u sika ni mak mo miring om papei anga om nei la thō u?
4 Asik chu nangnīn angkhatin:
“Koi Paul atianga mi ka ni.”
Angkhatin:
“Koi Apollo tianga mi ka ni,”
nei anti u sika han taksa mi bang nei la ni u ni mak mo?
5 Tu mo Paul?
Tu mo Apollo?
Amāni chu dorbōndom mi duai ani u na,
amāni sika han nangnīn nei iam u ani na.
Amāni chu Pumān ei pēk ang chipa dorbōndom ranga ani u na.
6 Koi hi akung aling ka ni na.
Apollo hi ti alei ani na.
Tenchu Pathian kēng akung ansōn ani na.
7 Hasika han alingpu le ti aleipu ni mak aliankhīt tenchu akung ansōnpu chu Pathian kēng aliankhīt.
8 Asik chu alingpu le aleipu chu munkhat ani u na.
Asin thō ei pōng u anga alō chu ei man chip u rang ani na.
9 Hasik han na lom renga mun khata Pathian sin athōpui kēng na ni.
Nangni hi Pathian sinthōna mun na ni u,
Pathian manding in na ni u.
10 Pathianin alungkhamna ei na pēk anga ahian sabaka in aphutpu anga abul kei manding ani na.
Hatuka hava chunga han mi teiin ahong manding rēta.
Tenchu tukareng hava han hontin mo ei manding anrēng rase.
11 Asik chu abul ka lei manding sua na han mi teīn bul atei tutēn manding thei lāi mak.
Isua Krista ha ani hava abul chu.
12 Tenchu mi angkhat peiin hava abul chunga han rāngkachak le,
rupa le,
lunglu zāt le,
thing le,
chiak le,
sapon le mo amanding theia.
13 Asik chu tukareng asin thō ha hontin mo ei ni Pathianin hong manlang kiar inti.
Asik chu ha nikhua hān hong puang kiar inti.
Hava tika moīn hong manlang inti.
Hatuka tukareng asin thō nei mu theina ranga moi lehan hong mansin inti.
14 Tukareng in ei manding ahōitit tak chu,
alō chu ei man rang ani na.
15 Hatuka tukareng asin thō moia ākāng chu akorong ei chang rang.
Ama chu sandama om inti,
hanum nisela moi āta azōk ang nīnti.
16 Nangni hi Pathian in ānthiang na ni u ti anre u mak che mo?
Na kōm u na Pathian Ratha a om kēng ti re u mak che mo?
17 Tukareng Pathian in ānthiang ansiat chu Pathianin um masiat inti.
Asik chu Pathian in chu ānthiang ani na.
Hava in ānthiang ha nangni ngāi hi na ni u zei.
18 Tukareng na ninga anhuang u nō ro.
Nangni bila mi khat peiin atun taka ramual dān anga ahian anlō anti ten,
ahian ei anlō theina ranga ‘Āmo’ chang sela.
19 Asik chu hi ramual hianna chu Pathian ranga amona.
Asik chu Lekhabūna anziak anga:
“Pathianin mi hian ngāi chu ei
hian u na lehan akhit zei.”
(Job.5:13 )
20 Hanūk chu:
“Mi hian ngāi mandon dōra
chu akorong kēng ti Pumān
ariata,”
ti ani na.
(Sām 94:11 )
21 Hasika han angkhat angkhat tak chunga borāi thō u lāi nō ro.
Asik chu aloma nangni ta kiar kēng hile.
22 Paul mo,
Apollo mo,
Kipha mo ani,
ramual mo,
damna mo,
thīna mo ani,
a omsa mo le ala honga om rang mo ani,
alom peia hin nangni ta kiar kēng hile.
23 Nangni hi Krista ta na ni u na,
Krista hi Pathian ta ani na.