Uiare tak chu
masuak ro
5
1 Nangni ngāi kāra hin hurna hi a om sabak zei ti mīn ei rila anril kēng ani zei.
Ha rong ha la ni mak,
mi khatin apa nungāk le achāi a om ani na.
Hava ang hurna ha nam atei Pathian riat lui ngāi ngalin thō u ngāi mak.
2 Hanum nisela borāi na dōn sabak u na!
Ha nēk ten,
nei anngūi rang kēng ani u zei.
Hanūk chu havan tina om athōpu tak chu na kār u nāta nei masuak len u ranga chong ni mak mo?
3 Na kār u na ka pum anchel nōkam ka ratha chu na kār u na ānchel ani na,
hasik han ka pum ānchel anga hava zāt om athō tak ha achunga hintin hin ati na rui kei masat ani zei.
4 Koini na Puma Isua Krista raminga mun khata nānchun u tik ka ratha um anchel inti.
Hanūk chu Puma Isua Krista ranak um anchel inti.
5 Puma Isua nikhua hong tika aratha chu sandama ei om theina ranga ataksa chu ei anpei theina ranga soitān kuta pēk u ro.
6 Nangnīn borāi nei thō u hi anhui mak.
Chol alaktēn busūn pumpui ei manba ziak thei ha re u mak che mo?
7 Hasika han chol anchel lui busūn athara ansūn nei ni thei u na ranga chol marua ha khāi u ro.
Asik chu koinina na ranga Zōkna pānta Berate Krista chu anbōlna ranga anthat sua kēng ani zei.
8 Hasika han hiva pānta hi chol marua anchel luia,
hava ti na ha ani zei miin mumākna le siatna chol anchel luia chongtak le malung anzīka chol anchel ruiti pānta hi mang u rei.
9 Rual anrāk ngāi bila nei anlop u rang ni mak ati na ka lekha mathuana kei hong maziak ani na.
10 Hi ramuala rual anrāk ngāi,
huat anham ngāi,
mi ta anpot ngāi,
le mi ramīl anmōk ngāi bila nei anlop pial u nōk rang chong ni mak,
asik chu havan tin han aniten hi maniapūr āta ankhāi nei nāng u ani na.
11 Tenchu na kōm u na atuna kei maziakna a omzia chu hiva ani na - unāi ati na raming ei raput dēna,
rual anrāk,
huat anham,
ramīl anmōk,
mi siat aril,
zu nēk,
mi ta anpot aniten anloppui thak u nō ro.
Hava ngāi bila han anēk ngal nēk u nō ro.
12 Apanga mi ngāi rui aril ranga hong ual mo ka thāi ei anthak rang?
Asūnga mi ngāi rui ni mak mo nei ril u rang?
13 Apanga mi ngāi rui chu Pathianin ril bo ni.
“Mi sa lui chu na kār u nāta masuak u ro,”
ati na.