Kuitīr ngāi
ningneina le asin thō u
9
1 Koi hi kuitīr ni makung mo?
Kei zōk anga om thei ni makung mo?
Koini na Puma Isua Krista amu ni makung mo?
Hatuka nangni ngāi hi Puma ranga ka sin thō mara ni u mak che mo?
2 Mi tei ngāi ranga kuitīr ka ni ngal nōkam,
nangni ngāi ranga chu kuitīr ka ni.
Asik chu Puma sika ka kuitīr chang sinsiana chu nangni ngāi hi na ni u na.
3 Ka tak chunga anānsin ngāi kōma hiva hi kei masang u na ani na.
4 Nēk le sāk athō kiar thei ranga ningneina dōn makung mo?
5 Kuitīr atei ngāi le Puma parual ngāi le Kipha anga nungāk aiam mi alāka mun ateia aruai thei ranga ningneina dōn makung mo?
6 Havan tin han aniten,
ichanga mo koi le Barnaba rong sin athōna nei pōng chian rang?
7 Hovana sipai mo aninga anzona rāl anduina muna ala sē ngāi?
Tu mo amara sa lui ranga gerep kung aling ngāi?
Tu mo bera aranu ne lui ranga bera rual avāi ngāi?
8 Hiva chong ngāi hi miring chong ang duaia mo kei chong?
Dānbuna hava ngāi ha ti mak mo?
9 Asik chu Dānbuna Mosīn amaziaka:
“Serāt bu achīl lāi tak amūra
mūrkok manlāk pe nō ro,”
(Dān.25:4 )
ati na.
Pathianin serāt ngāi rang duaia mo ei ril?
10 Ni mak koini na rang um ni mak mo ei ril?
Ani,
Mosīn koini na ranga hiva hi ei maziak ani na.
Asik chu phāi athōpun aphāia bu aman rang ansabeia kēng phāi ei thō rang ani na.
Havan tin dēn han bu anchīlpu hīm nisela ei lō aman rang ansabeia kēng bu ei chīl rang ani na.
11 Koinīn nangni ngāi kāra ratha chimu nei tu ani na,
tenchu nangni ngāi kōm āta taksa mara nei man rang hi alian sabak mo?
12 Mi tei ngāi lua hiva ruia na chung u na ningneina adōn thei u ten,
koini vāng chu ituk mo adōn thei rua ni mak me mo?
Hanum nisela hava ningneina ha koinīn mang mak mena.
Krista thang ahui anril ei ankhār nōkna ranga alom peia antak nei tiar zām ani na.
13 Pathian biak ina ser le sāng lama hasōndom ngāi chu havan āta len ei sāk ei nēk u rang ti chong hi re u mak che mo?
Hanūk rēt chu māichām chunga hasōndom ngāi chu māichāma mīn ei hong dar ngāi āta len ei sāk ei nēk u rang ti chong hi re u mak che mo?
14 Havan tin anga thang ahui aril ngāi chu thang ahui āta len nēksāk rase ti chong hi Puma achongpēk ani na.
15 Hanum nisela hava ningneina ha angkhat ngal mang makunga.
Tenchu havan tin han ka tak chunga nei thō u rang ati na kei maziak ni mak.
Kei lianpuina hi mīn akorong aman chang nēk ten athī len hi ka ranga asa ual.
16 Thang ahui aril ka ni ngalām borāi athōpui rang itē dōn makung.
Tenchu ka tak chunga aril ngengēt rang angkhat ka dōna.
Asik chu thang ahui ril lui mi ka ni ving ten,
vānaduai khīt chang ka ti.
17 Hava sin ha ka ninga kei ril sika rātpāk kei man ani na.
Tenchu ka ninga ka ril ngal nōkām nisela ka tak chunga lupuak ei na pēk sika kei ril khak ani na.
18 Hanle hova tak mo ka rātpāk ani zei?
Krista thang ahui kei rila ka ningneina mang makunga,
tenchu lō abuia thang ahui kei ril ti hi kei manlang theina ranga ka ningneina kei mang nōk ani na.
19 Alom pei tak chunga azōk ka ni ngalām nisela Krista ranga mi tamtak kei man theina ranga mitin kōma suak kei chang ani na.
20 Jihudi ngāi kei man theina ranga Jihudi ngāi kōma Jihudi ngāi anga kei om.
Dān thunuaia a om ngāi kei man theina ranga dān thunuaia a om ngāi kōma dān thunuaia kei om ani na.
21 Dān dōn lui ngāi kei man theina ranga dān dōn lui ngāi kōma dān dōn lui anga kei om ani na.
Tenchu hava kei ti na han Pathian dān dōn lui ni makunga,
tenchu Krista dān thunuaia om ka ni na.
22 Rāt lui ngāi kei man theina ranga rāt lui ngāi kōma rāt lui anga kei om ani na.
Angkhat pei ni ta rase mi senkhat lua chu kei mazōk theina ranga mitin kōma alom peia aloma kei chang ani na.
23 Hiva ngāi dōra hi thang ahui sika kei thō zit ani na nangni ngāi bila chang āi kei man theina ranga.
24 Atān anēng ngāi hi alom u na anruala atān ani u na,
tenchu angkhat dak kēng rātpāk chu aman ti hi na riat thei u mo?
Nangnīm rātpāk nei man thei u na ranga havan tin anga tān u ro.
25 Anēngna tina akop ngāi dōra hi dān ankhir sabaka dān ang taka alom peia azī ani u na.
Amānīn lukhum āsiat thei rātpāk aman ranga apūt ani u na.
Koini chu siat thei lui lukhum rātpāk aman ranga apūt kēng na ni.
26 Hasika han derdīn abuia atān duai ni makung.
Hanūk chu kei anbuanpui hīm akorong anbuanpui ni makung.
27 Tenchu ka taksa hi kei sepa ka racham taka kei siak theina ranga.
Asik chu mi tei ngāi kōma chong kei varila hin ting lui ati na kei antet thei nōkna ranga kei pūt ani na.