Israel ngāi rachi
nāta anrēng anāng
10
1 Unāi ngāi,
hiva rachi rui hi riat luia nei om u rang zōt makunga.
Asik chu koini na chipui ngāi ha ansūm thuaia ei om u na aloma tipuilian ei rakān u ani na.
2 Alom u na ansūm
le tipuilian malāia Mosi zāra baptisma ei chang u ani na.
3 Alom u na ratha sāk angkhat āta ei sāk u ani na.
4 Alom u na ratha ti angkhat āta ei nēk ani u na.
Amāni nūk azī Ratha Lungpui āta ti ei nēk u ani.
Hava Lungpui ha Krista ani na.
5 Hanum nisela hava mi ngāi bila mi tamtak chu Pathian rāi mansān u mak,
hasika han aruak u chu philchār rama ei thi zit u ani na.
6 Hiva rui ngāi hi koini ngāi enruana ranga ei hong man om ani na.
Amānīn ei thō u anga koinīn āsia tianga ningōlna dōn u nō rei.
7 Amāni bila senkhatin ramīl ei mōk u anga ramīl amōk u nō rei.
Asik chu Pathian Lekhabūna:
“Miring ngāi chu anēk le asāk
ranga ansut u na.
Andāi
ansiam ranga anding u na,”
(Ant.32:6 )
ei thō u sika ni khat sūnga asāngsōmanni asānganthum miring athi zita.
Tenchu koinīn havan tin anga hurna lama āsia thō u nō rei.
9 Amāni bila mi senkhat chu Krista ei mansin u sika marūlin ei machuka ei thi u.
Tenchu koinīn havan tin anga Krista mansin u nō rei.
10 Amāni bila senkhat chu ei theimāk u sika ansiatpu hān ei hong that ani na.
Nangni ngāi chu havan tin han theimāk u nō ro.
11 Hava ngāi dōra ha amāni kōm āta enrua ranga ei hong man om ani na.
Hanūk chu koini ngāi anrēnga nei om theina ranga ahong anziak ani na.
Asik chu koini na rang hun ahek asuak kēng ani zei.
12 Hasika han tukareng anding ka ni ei anti ha anrēng rase,
nangkana ei anba nōkna ranga.
13 Miring tak chunga ansinna atāngpui ngāi rong nōk chu atei ansinna itē na chung u na hong tung mak.
Pathian chu aiam rua ani na,
hasika han nangnīn nei diar thei u nōk ansinna chu na chung u na hong man tung nō ni.
Tenchu ansinna ei om bibila adiar theia nei zōk u na rang lampui um na sin pe unti.
Puma zāndui le ramīl abiak rui
14 Kei madit u ngāi,
hava ngāi sika han ramīl biakna nāta ankhāi u ro.
15 Riatna na dōn u ti kei na riat u sika hiva chong ngāi hi keina ril u.
Kei na ril u ngāi hi nangnīn na theia zēk thei u na ti.
16 Bōrsāng tungna khuri lehan koinīn raisānna chong nei mantung chachak ha Krista thisena nei anlopna ni mak mo?
Hanūk chu koinīn ruti pēk nei ansem chachak ha Krista taksana nei anlopna ni mak mo?
17 Asik chu ruti pēk khat ani na.
Koini tamtak hi taksa pumkhat na ni na.
Hasik han koini na loma hava ruti pēk khat āta nei ansem kiar ani na.
18 Taksa lama Israel nam ngāi rui ha mandon u ta.
Ramīl biakna muna andar dāli asāk ngāi chu māichām chunga andar dāli asākpui ti na ni u mak mo?
19 Hanle hivan tina kei ti hin ramīl biakna muna andar dāli atei,
hanūk chu ramīl abiak atei kei ti na mo?
Ni pial mak.
20 Tenchu kei ti na asik chu nam atei Pathian riatna dōn lui ngāi anbōlna dāli dar chu rathasia ngāi kōma adar kēng,
Pathian kōma adar ni u mak.
Tenchu nangnīn rathasia ngāi le nei anlop u rang zōt makung.
21 Asik chu Puma khuri le rathasia ngāi khuri anlop rita buang thei u mak che.
Hanūk chu Puma bu khalāi le ratha sia ngāi bu khalāi anlop rita kāi thei u mak che.
22 Havan ti na nei thō u chachak sika hin Puma amanar asia chu nei manrik riam ni u mak mo?
Ama nēka nangni mo arāt ual na ni u zei?
Aiam ngāi ranga anphal
23 Aloma ka ranga dān anthiang zit,
tenchu aloma mi tei ranga asatna kiar ni mak.
Aloma ka ranga dān ani zit,
tenchu aloma mi tei ranga ansōnna kiar ni mak.
24 Mi tukareng arang duaia satna arok nō rase.
Tenchu amān mi tei ngāi rangām satna arok rase.
25 Na kōma siat le sa riatna lehan itē ankelna dōn lui bazāra me anzuar chu sa pei ro.
26 Asik chu hintin hin anziak ani na:
“Maniapūr le asūnga aloma
akipa a om dōra hi Puma
ta zit kēng,”
(Sām 24:1 )
ati na.
27 Aiam nōk mi khatin nēksāk athō ranga na mathēm sela nang um asē rang nei zōt aniten,
siat le sa riatna lehan itē ankelna dōn luia na matona andar tak chu sa pei ro.
28 Tenchu mi khatin na kōma,
“Hiva hi ramīl biakna ranga andar kēng,”
ana ti ten,
anān theipu sika le siat le sa riatna sika sa nō ro.
29 Na kōma siat le sa riatna rui ni mak kei na ril,
tenchu hava mi kōma siat le sa riatna rui kēng kei na ril.
Asik chu mi siat le sa riatnān ichanga mo kei zōtna hi ei na la ril siat bang rang?
30 Rāisān chong kei mantunga kei sāk aniten,
ichanga rāisān chong kei mantung sua chunga mīn ei na la ril siat bang rang?
31 Hasika han na nēk mo na sāk mo,
nei thō u tak pei,
aloma Pathian ei anpākna ranga thō u ro.
32 Jihudi ngāi rang mo ani,
Grik ngāi rang mo ani,
Pathian kuibing ngāi rang mo ani,
tutē ei ankhārna ranga itē thō u nō ro.
33 Koi um nisela kongtin peia mi tin arāi kei mansān theina ranga kei pūt ani na.
Ka theia anlāpna rang duai pūt makunga,
tenchu amāni ei dam thei u na ranga mipui tamtak anlāpna ranga kei pūt ani na.